John 18

Chapter 18.

18 ¹Jishuna kaphenbing hi hānghailaga awui sākhangatha̱bingli ngasoda Kidron kong kānhaida yāmgui akha khalei apam chili shoka, kala ana awui sākhangatha̱bingli ngasoda chili zanga. ²Yorkazā Judasnala apam chi theisera, kaja Jishuna awui sākhangatha̱bingli ngasoda apam chili ra̱ra̱ kazipchinga. ³Chieina Judasna raimibing katong, kala pāngmon akhokabing eina Phariseebingwui otva̱bing chi ngasoda, thaomei, meirā kala raisāri singlaga apam chili rai.

⁴Chiwui vang Jishuna awuitungli rāhaira saikora theida, shokta athumli hānga, "Nathumna khipāli phāda leikhala?"

⁵Athumna ali ngahānkai, "Nazarethwui Jishuli phāda lei." Jishuna hānga, "Ina Kho." Awui yorkazā Judasla athumli ngasoda nganinga. ^a a v5 Jishuna ithumwui Avāna meiwonzā thingpompa̱ chili Mosesli mikahai kathara ming chi hānga. Kavā verseli raimibingna khanukshong ngaleili tāhaowa—chi ana khisai kaji athumna nganākhui kaji theikhuina.

⁶Jishuna athumli "Ina Kho" da hāngkhaleoda, athum khanukshong latvai ngaleili tāhaowa.

⁷Chieina ana athumli ngahānluishita, "Nathumna khipāli phāda leikhala?" Chieina athumna hānga, "Nazarethwui Jishuli phāda lei."

⁸Jishuna ngahānkai, "Ina 'Ina Kho' da nathumli hāngkahaina. Chiwui vang, nathumna ili phāda leiakha, mi hibingli vāngasaklu." ⁹Hi Jishuna khalatta hāngkahai tui chi ungshung khavaina: "Nana ili mikahaibingwui ngachaili akhalala mashimān kahaina."

¹⁰Chieina Simon Peterna awui raighai sutkhuilaga, pāngmon khareiwui raoli shātlaga, awui akhanā yāshong pang chi yortāmihaowa. Rao chiwui aming Malchusna.

¹¹Chiwui vang Jishuna Peterli hānga, "Nawui raighai ahonli sanghaolu. Iwui Avāna ili mikahai tengkot chi ina mamangpaimara?"

¹²Chiwui thili raimibing, athumwui kathāna, kala Jihudiwui otva̱bingna Jishuli tukkhuida chiphunhaowa.

¹³Athumna ali rimeikapta Annasli khuivai, kaja a chikum Pāngmon Kharei sākasapā Caiaphaswui awova̱na. ¹⁴Jihudibingli, mibingwui vang mi akha thihaira phamei da hāngchithei kahaipā chi Caiaphasna.

Peterna Kayāngshong Shurvai

¹⁵Simon Peter eina sākhangatha̱ khangatei akhana Jishuli shurvai. Sākhangatha̱ chi pāngmon khareina theisera, chiwui vang ana Jishuli ngasoda pāngmon khareiwui kayāngli zanga, ¹⁶kha Peterna ayarli khāmongli nganinga. Chieina pāngmon khareina theisera sākhangatha̱ khangatei chi shokta, khāmong khamayona raosha̱nao chili hānglaga Peterli khuizanga. ¹⁷Khāmong khamayona raosha̱nao china Peterli hānga, "Nala mipā hiwui sākhangatha̱bingwui ngachaili akha maningmala?" Ana, "Maningmana" da ngahānkai.

¹⁸Raobing eina otva̱bingna khamakui theilaga, kashok mei sāhailaga nganinglaga tikpama; Peterla athumli ngasoda nganinglaga meili tikpama.

Ngayāli Ngahāna

¹⁹Chieina pāngmon khareina Jishuli awui sākhangatha̱bing eina awui tamkachitheiwui pongli ngahāna.

²⁰Jishuna ali ngahānkai, "Ina okathuili phonglāk eina hānga; Jihudi saikora kazipta synagogueli kala khorumshimli ina atam kachida tamchithei kahaina. Ngathumda ina khikha mamatuimana. ²¹Khisāda ili ngahānkhala? Ina athumli kahāng chi kashā mibingli ngahānlu; ina kahāng chi athumna thei."

²²Chi tharan Jishuwui ngalemli nganingkasā shantri akhana ali kapheda hānga, "Pāngmon khareili nana kathāda ngahānkākhala?"

²³Jishuna ali ngahānkai, "Ina khayon matuiakha, khayon chiwui shākhi sālu; kha mashung matuiakha, khisāda ili shaokhala?"

²⁴Chieina Annasna ali khalaplaga pāngmon kharei Caiaphasli chihovā.

Peterna Latluida Mamayā

²⁵Chitharan Simon Peterna nganinglaga meili tikpama. Athumna hānga, "Nala awui sākhangatha̱bingwui ngachaili akha maningmalā?" Ana mamayāmada hānga, "I maningmana."

²⁶Peterna khanā yortāmi mipāwui nganailak, pāngmon khareiwui rao akhana ngahāna, "Ina nali yāmguili ali ngasoda theiya maningmalā?"

²⁷Peterna latluida mamayā, kala heng sāda harvā khonghaowa.

Pilateli Vamisang

²⁸Chieina ngathorthak athumna Jishuli Caiaphaswui eina governorwui kārotli shimenvai. Athum khalattana makathar ngasak makhavai, kha Makānkhami phanit shaipai khavai, kārotli mazangmana. ²⁹Chieina Pilatena athumwui mangāli shokta hānga, "Mipā hiwui pongli nathumna khi kaphen khuirākhala?"

³⁰Athumna ali ngahānkai, "Mipā hina khayon ot masā maningsi kaja, ithumna ali nawui pāngli mahorsangmimara."

³¹Pilatena hānga, "Nathum khalattana ali khuida nathumwui ain eina bichar sālu." Jihudibingna hānga, "Ithumna khipālikha shaothat khavai masamphangmana."

³²Ana kathāda thira kaji phongmi khavai Jishuna hānghaikasā tui chi hiwui eina ungshunghaowa.

³³Chieina Pilatena kārotli zangluishitta Jishuli hozanga, "Na Jihudiwui Awungala?" da ngahāna.

³⁴Jishuna ngahānkai, "Na khalattana hi hāngla, lah kateibingna iwui pongli nali unghānga?"

³⁵Pilatena ngahānkai, "Ina Jihudinilā? Nakhalattawui yur kala pāngmon akhokabingna nali iwui pāngli horsangmihaira. Nana khi kasākhala?"

³⁶Jishuna ngahānkai, "Iwui wungram hi okathui hiwui maningmana. Chithākha okathui hiwuina jiakha, ili Jihudibingwui pāngli horsang makhavai iwui raobingna ngararmira. Kha iwui wungram hi hili eina maningmana."

³⁷Chieina Pilatena ali hānga, "Chithākha na awungalā?" Jishuna ngahānkai, "Ina awunga jira da nana hānghaira. Khamashungwui vang shākhi sākhavai, hiwui vang eina ina pharai, kala hiwui vang eina ina okathuili kharāna. Khamashungwui mi kachiva̱na iwui akhon shāra."

³⁸Pilatena hānga, "Khamashung hi khikhala?" Chieina ana Jihudibingwui kayāngli shokluishitta hānga, "Ina awuili khikha khayon masamphangmana.

³⁹Kha Makānkhami phanitli ina nathumwui vang mi akhali chihomichinga kaji nathumwui khangachā akha lei. Chithākha Jihudiwui Awungali nathumwui vang chihomi ngasakngailā?"

⁴⁰Athumna vaoluishita hānga, "Mipā hi maningmana, kha Barabbasli!" Barabbas hi phama̱kashao mi akhana.