John 17

17 ¹Jishuna hi hānghailaga, kazingramli yangkāda hānga: "Avā, atam rāhaira. Nawui Anaomayarali tekmatei ngasaklu, chieina Anaomayarana nali tekmatei ngasakra, ^a a v1 John 17 hi Jishuna Avāli sāmi kahai seihā kagap kahaibingwui alungli katangkhavai china — krush marāranglakhawui ngayā hāngkahai, ana Avā, Kathara Avā, kala Khamashung Avā da hoa Chiwuili awui wuklung phongmida. ²kaja nana ali mikahai saikorali katang makhavai kharing mikhavai, nana ali mi saikorawuitungli pangshap mihaira. ³Athumna khamashunga Avā akhamāng nali, kala nana kashirāta Jishu Khristali kathei, hi katang makhavai kharingna. ⁴Nana ili sākhavai mikahai ot chi kuphailaga, ina nali okathuili tekmatei ngasakhaira. ⁵Avā, okathui maleisāranglakha ina nali ngasoda leikasā tekhamatei chi eina, ara nakhalatta ngasoda ili tekmatei ngasaklu.

⁶Nana okathuiwui eina ili mikahai mibing chili ina naming phongmihaira. Athum nawuina; nana athumli ili mihaira, kala athumna nawui tui mayonhaira. ⁷Ara athumna nana ili mikahai ot saikora hi nawui eina kharā kaji theihaira, ⁸kaja nana ili mikahai tuibing chi ina athumli mihaira; athumna chi samphangkhui, I nawui eina kharā kaji kachangkhat eina theida, kala nana ili kashirāta kaji shitsanghaira. ⁹Ina athumwui vang seihā sāna, okathuiwui vang maningmana, kha nana ili mikahai mibingwui vang seihā sāna, kaja athum nawuina. ¹⁰Iwui khalei saikora hi nawuina, kala nawui khalei hi iwuina, kala athumwui eina iwui tekhamatei phonghaira. ¹¹Ina okathuili maleiluimana, kha athum okathuili lei, kala ina nawuili rāra. Kathara Avā, nana ili mikahai nawui ming eina athumli yangmilu, chieina ithum akha kasā thada athumla akha ngasāra. ¹²Ina athumli ngasoda leilakha, nana ili mikahai nawui ming eina ina athumli yangmihaira. Ina athumli ngākmihaira; kathara tui ungshung khavai shimānwui naomayara maningla khipākha mashimānmana. ^b b v12 "Shimānwui naomayara" hi Jishuli mikakā a, Judas Iscariotwui ming china. ¹³Ara ina nawuili rāra, kala iwui ringkaphā chi athumwui alungli kāshungchao khavai ina okathuili hi hāngna. ¹⁴Ina athumli nawui tui mihaira; okathuina athumli ningkachaihaowa, kaja I okathuiwui makhaning thada athumla okathuiwui maningmana. ¹⁵Athumli okathuiwui eina khuithui khavai ina nali mapona, kha makhayā a chiwui eina athumli ngākmi khavai kapona. ¹⁶I okathuiwui makhaning thada athumla okathuiwui maningmana. ¹⁷Khamashung eina athumli tharmathengmilu; nawui tui hi khamashungana. ¹⁸Nana ili okathuili chihovā kahai thada, ina athumli okathuili chihovāhaira. ¹⁹Athumla khamashungli tharchigatkapai ngasak khavai, athumwui vang ina I khalattali tharchigata.

²⁰Ina hibingwui vangmāng maningla, kha athumwui tui shālaga ili shitkasanga mibingwui vangla seihā sāna. ²¹Avā, nava iwuili leida kala ina nawuili leida thada, athum saikora akha ngasāranu, chieina athumla ithumwuili leira, kala nana ili kashirātna kaji okathuina shitsangra. ²²Ithum akha kasā thada athumla akha ngasā khavai, nana ili mikahai tekhamatei chi ina athumli mihaira. ²³Ina athumwuili leida kala nava iwuili leida, athum kaphen akha ngasāra; chieina nana ili kashirātna kaji kala nana ili leishi thada athumli leishi kaji okathuina theira. ²⁴Avā, okathui masākida rida nana ili leishida mikahai iwui tekhamatei chi theikhavai, nana ili mikahaibing chi ina leipam chili ilava ngasoda leingasakngai. ²⁵Khamashung Avā, okathuina nali matheimana, kha ina nali thei, kala hibingna nana ili kashirātna kaji theihaira. ²⁶Ina athumli naming theingasakhaira, kala theingasakchingra, chieina nana ili leishi kahai leikashi chi athumwuili leira, kala ina athumwuili leira."