ዮሐንስ 17

17 ¹ኢየሱስ ይህን ከተናገረ በኋላ ወደ ሰማይ አሻቅቦ ተመለከተ፤ እንዲህም አለ፤ “አባት ሆይ፣ ሰዓቱ ደርሷል። ልጁ አንተን እንዲያከብር ልጅህን አክብረው፤ ^a a v1 ዮሐንስ 17 ኢየሱስ ለአብ ካቀረባቸው ጸሎቶች ሁሉ ተመዝግቦ የሚገኘው ረዥሙ ነው፤ ይህም ከመስቀሉ በፊት በነበረችው ሌሊት የተነገረ ሆኖ፣ አባት፣ ቅዱስ አባት፣ ጻድቅ አባት ብሎ ለሚጠራው ልቡን የከፈተበት ነው። ²ለሰጠኸውም ሁሉ የዘላለምን ሕይወት እንዲሰጥ፣ በሰዎች ሁሉ ላይ ሥልጣን ሰጥተኸዋልና። ³የዘላለም ሕይወት ይህች ናት፤ አንተን ብቸኛውን እውነተኛ አባት፣ የላክኸውንም ኢየሱስ ክርስቶስን ማወቅ ነው። ⁴እንዳደርግ የሰጠኸኝን ሥራ ፈጽሜ በምድር ላይ አከበርሁህ። ⁵አባት ሆይ፣ ዓለም ሳይፈጠር ከአንተ ጋራ በነበረኝ ክብር አሁን ከራስህ ጋራ አክብረኝ።

⁶ከዓለም ለሰጠኸኝ ሰዎች ስምህን ገለጥሁ። የአንተ ነበሩ፤ ለእኔም ሰጠሃቸው፤ ቃልህንም ጠብቀዋል። ⁷አሁን የሰጠኸኝ ሁሉ ከአንተ እንደ ሆነ ዐውቀዋል፤ ⁸የሰጠኸኝን ቃላት ሰጥቻቸዋለሁና፤ እነርሱም ተቀበሉ፤ ከአንተ ዘንድ እንደ መጣሁ በእውነት ዐወቁ፤ አንተም እንደ ላክኸኝ አመኑ። ⁹እኔ ስለ እነርሱ እለምናለሁ፤ ስለ ዓለም አይደለም፤ ነገር ግን ስለ ሰጠኸኝ ስለ እነርሱ ነው፤ የአንተ ናቸውና። ¹⁰የእኔ የሆነ ሁሉ የአንተ ነው፤ የአንተውም የእኔ ነው፤ በእነርሱም ከብሬአለሁ። ¹¹ከእንግዲህ በዓለም የለሁም፤ እነርሱ ግን በዓለም ናቸው፤ እኔም ወደ አንተ እመጣለሁ። ቅዱስ አባት ሆይ፣ እኛ አንድ እንደ ሆንን እነርሱ ደግሞ አንድ እንዲሆኑ፣ በሰጠኸኝ በስምህ ጠብቃቸው። ¹²ከእነርሱ ጋራ ሳለሁ፣ በሰጠኸኝ በስምህ ጠበቅኋቸው። ጠበቅኋቸው፤ መጽሐፉም ይፈጸም ዘንድ ከጥፋት ልጅ በቀር ከእነርሱ አንድ እንኳ አልጠፋም። ^b b v12 “የጥፋት ልጅ” የሚለው ኢየሱስን አሳልፎ ለሰጠው ለአስቆሮቱ ይሁዳ የተሰጠ ስም ነው። ¹³አሁንም ወደ አንተ እመጣለሁ፤ ደስታዬም በእነርሱ ዘንድ ተፈጽሞ እንዲገኝ ይህን በዓለም ሳለሁ እናገራለሁ። ¹⁴ቃልህን ሰጥቻቸዋለሁ፤ እኔ ከዓለም እንዳልሆንሁ እነርሱም ከዓለም ስላልሆኑ ዓለም ጠላቸው። ¹⁵ከዓለም እንድታወጣቸው አልለምንም፤ ነገር ግን ከክፉው እንድትጠብቃቸው እለምናለሁ። ¹⁶እኔ ከዓለም እንዳልሆንሁ እነርሱ ከዓለም አይደሉም። ¹⁷በእውነት ቀድሳቸው፤ ቃልህ እውነት ነው። ¹⁸አንተ ወደ ዓለም እንደ ላክኸኝ፣ እኔ ደግሞ እነርሱን ወደ ዓለም ላክኋቸው። ¹⁹እነርሱ ደግሞ በእውነት የተቀደሱ እንዲሆኑ፣ ስለ እነርሱ ራሴን እቀድሳለሁ።

²⁰ስለ እነዚህ ብቻ አይደለም የምለምነው፤ ነገር ግን በቃላቸው በእኔ ስለሚያምኑትም ጭምር ነው። ²¹አባት ሆይ፣ አንተ በእኔ እኔም በአንተ እንዳለሁ፣ እነርሱ ሁሉ አንድ ይሁኑ፤ እነርሱ ደግሞ በእኛ አንድ ይሁኑ፤ ዓለምም አንተ እንደ ላክኸኝ ያምን ዘንድ ነው። ²²እኛ አንድ እንደ ሆንን እነርሱም አንድ እንዲሆኑ፣ የሰጠኸኝን ክብር ሰጥቻቸዋለሁ። ²³እኔ በእነርሱ አንተም በእኔ ሆነህ፣ ፍጹም አንድ እንዲሆኑ፤ ዓለምም አንተ እንደ ላክኸኝና እኔን እንደ ወደድኸኝ እነርሱንም እንደ ወደድህ ያውቅ ዘንድ ነው። ²⁴አባት ሆይ፣ የሰጠኸኝ እኔ ባለሁበት ከእኔ ጋራ እንዲሆኑ፣ ክብሬንም እንዲያዩ እወዳለሁ፤ ይህም ዓለም ሳይፈጠር ስለ ወደድኸኝ የሰጠኸኝ ክብር ነው። ²⁵ጻድቅ አባት ሆይ፣ ዓለም አያውቅህም፤ እኔ ግን ዐውቅሃለሁ፤ እነዚህም አንተ እንደ ላክኸኝ ዐውቀዋል። ²⁶ስምህን አስታወቅኋቸው፤ ወደ ፊትም አስታውቀዋለሁ፤ ይህም የወደድኸኝ ፍቅር በእነርሱ እንዲኖር እኔም በእነርሱ እንድኖር ነው።”