Yahaya 18 FHB Father's Heart Bible™

18 ¹Bayan da Yesu ya faɗi waɗannan abubuwa, sai ya fita tare da almajiransa, suka haye Rafin Kidron, inda akwai wani lambu; shi da almajiransa kuwa suka shiga ciki. ²Yahuza mai ba da shi ma ya san wurin, domin Yesu yakan taru a can tare da almajiransa. ³Saboda haka Yahuza ya zo can tare da ƙungiyar soja da 'yan dōgari daga wurin manyan firistoci da Farisiyawa, ɗauke da fitilu da tocilai da makamai.

⁴Sai Yesu, da yake ya san dukan abin da zai zo masa, ya fito ya ce musu, “Wa kuke nema?”

⁵Suka amsa masa, “Yesu Banazare.” Yesu ya ce, “NI NE.” Yahuza kuwa, mai ba da shi, yana tsaye tare da su. ^a a v5 Yesu ya furta sunan Allah mai tsarki wanda Ubanmu ya ba Musa a wurin kurmin da yake cin wuta. Halin da sojojin suka nuna a aya ta gaba — faɗuwa da baya ƙasa — ya nuna sun ji daidai abin da ya ce shi ne.

⁶Da Yesu ya ce musu, “NI NE,” sai suka jā da baya suka faɗi ƙasa.

⁷Sai ya sāke tambayarsu, “Wa kuke nema?” Suka ce, “Yesu Banazare.”

⁸Yesu ya amsa ya ce, “Na gaya muku, NI NE. Saboda haka in ni kuke nema, ku bar waɗannan mutane su tafi.” ⁹Wannan ya cika maganar da Yesu da kansa ya faɗa cewa, “Ban rasa ko ɗaya daga cikin waɗanda ka ba ni ba.”

¹⁰Sai Siman Bitrus ya zāre takobinsa, ya kai wa bawan babban firist sāra, ya yanke masa kunnen dāma—bawan nan mai suna Malkus.

¹¹Sai Yesu ya ce wa Bitrus, “Mai da takobinka cikin kube. Ashe, bai kamata in sha kwaf da Ubana ya ba ni ba?”

¹²Sa'an nan sojojin da shugabansu da 'yan dōgarin Yahudawa suka kama Yesu suka daure shi.

¹³Suka fara kai shi wurin Annas, domin shi surukin Kayafas ne, wanda yake babban firist a shekarar. ¹⁴Kayafas kuwa shi ne wanda ya ba Yahudawa shāwara cewa, gāra mutum ɗaya yă mutu saboda mutane.

Bitrus ya Bi har Cikin Harabar

¹⁵Siman Bitrus da wani almajiri suka bi Yesu. Wannan almajiri kuwa babban firist ya san shi, saboda haka ya shiga tare da Yesu cikin harabar babban firist, ¹⁶amma Bitrus yana tsaye a waje kusa da ƙofa. Sai ɗayan almajirin, wanda babban firist ya san shi, ya fita, ya yi magana da yarinyar da take gadin ƙofa, ya shigar da Bitrus ciki. ¹⁷Yarinyar da take gadin ƙofa ta ce wa Bitrus, “Kai ma ba ɗaya daga cikin almajiran mutumin nan ba ne, ko?” Ya ce, “A'a, ba ni ba ne.”

¹⁸Bayin da 'yan dōgari kuwa, da yake sanyi yake yi, suka hura wutar gāwayi, suna tsaye suna jiɓin wuta; Bitrus kuma yana tsaye tare da su, yana jiɓin wuta.

An Yi masa Tambayoyi da Dare

¹⁹Sa'an nan babban firist ya tambayi Yesu game da almajiransa da kuma koyarwarsa.

²⁰Yesu ya amsa masa ya ce, “Na yi magana a fili ga duniya; kullum ina koyarwa a majami'u da kuma a Haikali, inda dukan Yahudawa suke taruwa. Ban faɗi kome a ɓoye ba. ²¹Don me kake tambayata? Ka tambayi waɗanda suka ji abin da na faɗa musu; sun san abin da na faɗa.”

²²Da ya faɗi haka, sai ɗaya daga cikin 'yan dōgarin da suke kusa ya mari Yesu, yana cewa, “Haka kake amsa wa babban firist?”

²³Yesu ya amsa masa ya ce, “In na faɗi abin da ba daidai ba, ka shaida kuskuren; amma in daidai ne na faɗa, don me kake buga ni?”

²⁴Sa'an nan Annas ya aike shi, har yanzu a daure, wurin Kayafas babban firist.

Bitrus ya Sāke Yin Mūsu

²⁵Siman Bitrus kuwa yana nan tsaye yana jiɓin wuta. Suka ce masa, “Kai ma ba ɗaya daga cikin almajiransa ba ne?” Ya yi mūsu ya ce, “A'a, ba ni ba ne.”

²⁶Sai ɗaya daga cikin bayin babban firist, ɗan'uwan mutumin da Bitrus ya yanke masa kunne, ya ce, “Ashe, ban gan ka tare da shi a lambun ba?”

²⁷Bitrus ya sāke yin mūsu, nan da nan kuwa zakara ya yi cara.

An Miƙa shi ga Bilatus

²⁸Sa'an nan suka kai Yesu daga wurin Kayafas zuwa fādar gwamna. Lokacin kuwa asussubah ne. Su kansu ba su shiga ba, domin kada su ƙazantu, su kuma iya cin abincin Idin Ƙetarewa. ²⁹Saboda haka Bilatus ya fito wurinsu ya ce, “Wace ƙara kuke kawowa a kan mutumin nan?”

³⁰Suka amsa masa, “Da mutumin nan ba mai aikata mugunta ba ne, dā ba mu miƙa shi gare ka ba.”

³¹Bilatus ya ce, “Ku ɗauke shi, ku yi masa shari'a bisa ga dokarku.” Yahudawa suka ce, “Ba a yardar mana mu kashe kowa ba.”

³²Wannan ya cika maganar da Yesu ya faɗa, yana nuna irin mutuwar da zai yi.

³³Sai Bilatus ya sāke shiga cikin fādar, ya kirawo Yesu, ya tambaye shi, “Kai ne Sarkin Yahudawa?”

³⁴Yesu ya amsa ya ce, “Daga kanka kake faɗin haka, ko kuwa waɗansu ne suka gaya maka game da ni?”

³⁵Bilatus ya amsa ya ce, “Ni Bayahude ne? Al'ummarka da manyan firistoci su suka miƙa ka gare ni. Me ka yi?”

³⁶Yesu ya amsa ya ce, “Mulkina ba na wannan duniya ba ne. Dā na wannan duniya ne, dā barorina sun yi yāƙi domin kada a miƙa ni ga Yahudawa. Amma mulkina ba na nan ba ne.”

³⁷Sai Bilatus ya ce masa, “To, kai sarki ne?” Yesu ya amsa ya ce, “Kai ka ce ni sarki ne. An haife ni domin wannan, na kuma zo duniya domin wannan—in shaida gaskiya. Duk wanda yake na gaskiya yakan ji muryata.”

³⁸Bilatus ya ce, “Mene ne gaskiya?” Sa'an nan ya sāke fita wurin Yahudawa ya ce, “Ban sami wani laifi a kansa ba.

³⁹Amma kuna da wata al'ada: ina sakar muku mutum ɗaya a lokacin Idin Ƙetarewa. To, kuna so in sakar muku Sarkin Yahudawa?”

⁴⁰Sai suka sāke ihu suna cewa, “Ba wannan ba, sai dai Barabbas!” Barabbas kuwa ɓarawo ne.