ብኣኽሊል እሾዅ ተላጊፁ

ተገሪፉ፥ ኣኽሊል እሾዅ ተኸዲኑ፥ ተመሪሑ፥ እቶም ሊቃነ ካህናት “ብዘይ ቄሳር ካልእ ንጉስ የብልናን” ምስ በሉ ኢየሱስ ተወሃቦ። ባዕሉ መስቀሉ ፆይሩ፥ ነታ ኣዲኡ ነቲ ዘፍቀሮ ደቀ መዝሙር ሃቦ፥ “ተፈፀመ” ኢሉ ድማ ሞተ። ዮሴፍን ኒቆዲሞስን ከዓ ኣብ ሓደ ገነት ቀበርዎ።

ምዕራፍ 19።

ሽዑ ጲላጦስ ንኢየሱስ ወሲዱ ኣግረፎ። እቶም ወታደራት ኣኽሊል እሾዅ ኣልሚሞም ኣብ ርእሱ ገበሩሉ፥ ሓምራዊ ኽዳንውን ከደንዎ። ናብኡ እናመፁ ድማ “ኦ ንጉስ ኣይሁድ፥ ሰላም ንኣኻ!” እናበሉ ኣብ ገፁ ፀፍዕዎ።

ጲላጦስ መሊሱ ናብ ደገ ወፂኡ “እንሆ፥ ዝኾነ ኣበር ከም ዘይረኸብኩሉ ምእንቲ ኽትፈልጡ፥ ናባኻትኩም ከውፅኦ እየ” በሎም። ኢየሱስ ድማ ኣኽሊል እሾዅን ሓምራዊ ኽዳንን ተኸዲኑ ናብ ደገ ወፀ። ጲላጦስ ከዓ “እንሆ እቲ ሰብኣይ!” በሎም።

ሊቃነ ካህናትን ሓለውትን ምስ ረአይዎ፥ “ስቐሎ! ስቐሎ!” ኢሎም ዓው በሉ። ጲላጦስ ከዓ “ኣነ ዝኾነ ኣበር ኣይረኸብኩሉን እሞ፥ ንስኻትኩም ወሲድኩም ስቐልዎ” በሎም።

ኣይሁድ ድማ “ንሕና ሕጊ ኣለና፤ ባዕሉ ወዲ እግዚኣብሄር ስለ ዝገበረ ኸዓ፥ በቲ ሕጊ ኽመውት ይግብኦ” ኢሎም መለሱሉ።

ጲላጦስ እዝ ዘረባ እዙይ ምስ ሰምዐ፥ ኣዝዩ መሊሱ ፈርሐ። መሊሱ ናብ ኣደራሽ ኣትዩ ንኢየሱስ “ካበይ ኢኻ?” ኢሉ ሓተቶ፤ ኢየሱስ ግና ዝኾነ መልሲ ኣይሃቦን። ጲላጦስ ድማ “ንኣይ ኣይትዛረበንን ዲኻ? ክፈትሓካ ስልጣን ከም ዘለኒ፥ ክሰቕለካውን ስልጣን ከም ዘለኒ ኣይትፈልጥንዶ ኢኻ?” በሎ።

ኢየሱስ ድማ “ካብ ላዕሊ እንተ ዘይተውሂቡካ ነይሩ፥ ኣብ ልዕለይ ዝኾነ ስልጣን ኣይምሃለወካን። ስለዙይ እቲ ናባኻ ኣሕሊፉ ዝሃበኒ፥ ዝዓበየ ሓጢኣት ኣለዎ” ኢሉ መለሰሉ።

ካብኡ ንደሓር ጲላጦስ ክፈትሖ ደለየ፤ ኣይሁድ ግና “ንእኡ እንተ ፈቲሕካዮ፥ ዓርኪ ቄሳር ኣይኮንካን፤ ባዕሉ ንጉስ ዝገብር ኵሉ ንቄሳር ይፃረሮ” ኢሎም ዓው በሉ።

ጲላጦስ እዝ ዘረባ እዙይ ምስ ሰምዐ፥ ንኢየሱስ ናብ ደገ ኣውፂኡ፥ ኣብታ ምድሪ ቤት እምኒ እትበሃል ቦታ፥ ብዕብራይስጢ ጋባታ፥ ኣብ መንበር ፍርዲ ተቐመጠ። ናይ ፋሲካ መዓልቲ ምድላው ከዓ ነበረ፤ ዳርጋ ፍርቂ መዓልቲ ነበረ። ንኣይሁድ ድማ “እንሆ ንጉስኩም!” በሎም።

ንሳቶም ድማ “ኣርሕቆ! ኣርሕቆ! ስቐሎ!” ኢሎም ዓው በሉ። ጲላጦስ ከዓ “ንንጉስኩምዶ ክሰቕሎ?” በሎም። ሊቃነ ካህናት ድማ “ብዘይ ቄሳር ካልእ ንጉስ የብልናን” ኢሎም መለሱ።

ኣሕሊፉ ሃብዎ

ሽዑ ድማ ክስቀል ናባታቶም ኣሕሊፉ ሃቦ። ንኢየሱስ ከዓ ወሰድዎ፤ መስቀሉ ፆይሩ ድማ፥ ናብታ ቦታ ናላ እትበሃል፥ ብዕብራይስጢ ጎልጎታ፥ ወፀ። ኣብኡ ድማ ምስ ክልተ ኻልኦት፥ ሓደ በዝ ወገን ሓደ በቲ ወገን፥ ንኢየሱስ ከዓ ኣብ ማእኸል ገይሮም ሰቐልዎ። ጲላጦስ ከዓ ፅሑፍ ፅሒፉ ኣብቲ መስቀል ገበሮ፤ ናይ ናዝሬት ኢየሱስ፥ ንጉስ ኣይሁድ ዝብል ነበረ። ኢየሱስ ዝተሰቕለሉ ቦታ፥ ኣብ ጥቓ እታ ኸተማ ስለ ዝነበረ፥ ብዙሓት ኣይሁድ ነዝ ፅሑፍ እዙይ ኣንበብዎ፤ ብዕብራይስጢን ብላቲንን ብግሪኽን ተፅሒፉ ኸዓ ነበረ። ሊቃነ ካህናት ኣይሁድ ድማ ንጲላጦስ “‘ንጉስ ኣይሁድ’ ኢልካ ኣይትፅሓፍ፤ ‘እዝ ሰብኣይ እዚ፥ ኣነ ንጉስ ኣይሁድ እየ፥ በለ’ ኢልካ ደኣ ፅሓፍ” በልዎ።

ጲላጦስ ድማ “ዝፀሓፍክዎ ፅሒፈ እየ” ኢሉ መለሰ።

እቶም ወታደራት ንኢየሱስ ምስ ሰቐልዎ፥ ክዳውንቱ ወሲዶም ኣብ ኣርባዕተ ኽፍሊ መቐልዎ፤ ንነፍሲ ወከፍ ወታደር ሓደ ኽፍሊ ኾነ፤ ነቲ ቐሚሽ ውሽጥውን ወሰዱ። እቲ ቐሚሽ ውሽጢ ኸዓ ካብ ላዕሊ ኽሳዕ ታሕቲ ብምሉኡ ዝተኣልመ፥ ስፌት ዘይብሉ ነበረ። ስለዙይ ንሓድሕዶም “መን ከም ዝወስዶ፥ ዕፃ ደኣ ነውድቐሉ እምበር፥ ኣይንቕደዶ” ተባሃሃሉ። እዙይ ከዓ እቲ “ክዳውንተይ ንሓድሕዶም ተማቐሉ፥ ኣብ ክዳነይ ድማ ዕፃ ኣውደቑ” ዝብል ፅሑፍ ምእንቲ ኽፍፀም እዩ። እቶም ወታደራት ከዓ ኸምዙይ ገበሩ።

ኣብ ጥቓ መስቀል ኢየሱስ ድማ፥ እኖኡን ሓፍቲ እኖኡን፥ ማርያም ሰበይቲ ቀለዮጳን ማርያም መግደላዊትን ደው ኢለን ነበራ።

ኢየሱስ ድማ ነእኖኡን ነቲ ዘፍቅሮ ደቀ መዝሙርን ደው ኢሎም ምስ ረአየ፥ ነእኖኡ “ኣቲ ሰበይቲ፥ እንሆ ወድኺ!” በላ። ድሕሪኡ ነቲ ደቀ መዝሙር “እንሆ እኖኻ!” በሎ። ካብታ ሰዓት እቲኣ ጀሚሩ ኸዓ፥ እቲ ደቀ መዝሙር ናብ ገዛኡ ወሰዳ።

ተፈፀመ

ድሕሪዙይ ኢየሱስ፥ ኵሉ ነገር ሕዚ ከም ዝተፈፀመ ፈሊጡ፥ እቲ ፅሑፍ ምእንቲ ኽፍፀም፥ “ፀሚአ ኣለኹ” በለ።

ኣብኡ ድማ ብመፂፅ ወይኒ ዝመልአ ኣቕሓ ነበረ፤ ሓደ ሰፍነግ በቲ መፂፅ ወይኒ ኣፅጊቦም ኣብ ቀንፃ ስምዕዛ ገይሮም፥ ናብ ኣፉ ኣቕረቡሉ።

ኢየሱስ ድማ ነቲ መፂፅ ወይኒ ተቐቢሉ “ተፈፀመ” በለ። ርእሱ ኣድኒኑ ኸዓ መንፈሱ ኣሕለፈ።

መዓልቲ ምድላው ስለ ዝነበረ፥ ኣብ ሰንበት እቲ ሬሳታት ኣብ መስቀል ምእንቲ ኸይተርፍ፥ — እታ ሰንበት እቲኣ ኸዓ ፍልይቲ መዓልቲ ነበረት — ኣይሁድ ንጲላጦስ ኣእጋሮም ክሰብርዎም እሞ ነቲ ሬሳታት ከውርድዎ ለመንዎ። ስለዙይ ወታደራት መፂኦም፥ ናይቲ ቐዳማይ ሰብኣይ ኣእጋሩ ሰበሩ፤ ድሕሪኡ ኸዓ ናይቲ ምስኡ ዝተሰቕለ ኻልእ ሰብ ኣእጋሩ ሰበሩ። ናብ ኢየሱስ ምስ መፁ ግና፥ ድሮ ከም ዝሞተ ምስ ረአዩ፥ ኣእጋሩ ኣይሰበሩን። ሓደ ኻብቶም ወታደራት ግና ጎኑ ብዂናት ወግኦ፤ ሽዑ ንሽዑ ኸዓ ደምን ማይን ወፀ። ^a እቲ ዝረአየ መስካሪ መስኪሩ ኣሎ፤ ምስክርነቱ ኸዓ ሓቂ እዩ፤ ሓቂ ከም ዝዛረብ ድማ ይፈልጥ እዩ፤ ንስኻትኩምውን ምእንቲ ኽትኣምኑ እዩ። እዝ ነገር እዙይ ዝኾነ ኸዓ፥ እቲ “ካብ ኣዕፅምቱ ሓንቲ እኳ ኣይትስበርን እያ” ዝብል ፅሑፍ ምእንቲ ኽፍፀም እዩ። ካልእ ፅሑፍ ድማ መሊሱ “ነቲ ዝወግእዎ ኽጥምቱ እዮም” ይብል።

ዮሴፍን ኒቆዲሞስን

ድሕሪዙይ ዮሴፍ ዘርማትያስ፥ ንሱ ደቀ መዝሙር ኢየሱስ ኮይኑ፥ ንኣይሁድ ስለ ዝፈርሐ ግና ብምስጢር፥ ንሬሳ ኢየሱስ ከውርድ ንጲላጦስ ለመኖ። ጲላጦስ ከዓ ፈቐደ፤ ንሱ ድማ መፂኡ ኣውረዶ። ቅድም ናብ ኢየሱስ ብለይቲ ዝመፀ ኒቆዲሞስ ከዓ፥ ናይ ከርበን ዕረን ሕውስዋስ፥ ዳርጋ ሰላሳን ኣርባዕተን ኪሎ ግራም ሒዙ መፀ። ንሬሳ ኢየሱስ ወሲዶም ድማ፥ ከምቲ ናይ ኣይሁድ ልማድ ቐብሪ፥ ምስ ቀመማት ኣብ መግነዝ ጠቕለልዎ። ኣብቲ ዝተሰቕለሉ ቦታ ኸዓ ኣታኽልቲ ነበረ፤ ኣብቲ ኣታኽልቲ ድማ ገና ዋላ ሓደ ዘይተቐበረሉ ሓድሽ መቓብር ነበረ። መዓልቲ ምድላው ኣይሁድ ስለ ዝነበረ፥ እቲ መቓብር ከዓ ቀረባ ስለ ዝነበረ፥ ንኢየሱስ ኣብኡ ኣንበርዎ።