Yohana 19

19 ¹Ndipo Pilato akamtwaa Yesu, akampiga mijeledi. ²Askari wakasokota taji ya miiba, wakamvika kichwani, wakamvalisha vazi la zambarau. ³Wakawa wakija kwake, wakisema, "Salamu, Mfalme wa Wayahudi!" Nao wakampiga makofi usoni.

⁴Pilato akatoka tena nje, akawaambia, "Tazameni, namleta kwenu nje ili mjue ya kuwa mimi sioni hatia yoyote kwake." ⁵Basi Yesu akatoka nje amevaa taji ya miiba na vazi la zambarau. Pilato akawaambia, "Tazameni mtu huyu!"

⁶Wakuu wa makuhani na walinzi walipomwona, wakapiga kelele, wakisema, "Msulubishe! Msulubishe!" Pilato akawaambia, "Mtwaeni ninyi wenyewe mkamsulubishe, kwa maana mimi sioni hatia yoyote kwake."

⁷Wayahudi wakamjibu, "Sisi tunayo sheria; na kwa sheria hiyo yampasa kufa, kwa sababu alijifanya kuwa Mwana wa Mungu."

⁸Pilato aliposikia neno hilo, akazidi kuogopa. ⁹Akaingia tena ndani ya makao makuu, akamuuliza Yesu, "Wewe umetoka wapi?" Lakini Yesu hakumjibu neno. ¹⁰Basi Pilato akamwambia, "Hunisemeshi mimi? Hujui ya kuwa nina mamlaka ya kukufungua, na mamlaka ya kukusulubisha?"

¹¹Yesu akamjibu, "Wewe hungekuwa na mamlaka yoyote juu yangu kama usingepewa kutoka juu. Kwa sababu hiyo yeye aliyenitia mikononi mwako ana dhambi kubwa zaidi."

¹²Tangu wakati huo Pilato akatafuta kumfungua, lakini Wayahudi wakapiga kelele, wakisema, "Ukimfungua huyu, wewe si rafiki wa Kaisari. Kila mtu ajifanyaye kuwa mfalme humpinga Kaisari."

¹³Basi Pilato aliposikia maneno hayo, akamleta Yesu nje, akaketi juu ya kiti cha hukumu, mahali paitwapo Sakafu ya Mawe, na kwa Kiaramu Gabatha. ¹⁴Ilikuwa Siku ya Maandalio ya Pasaka, yapata saa sita mchana. Akawaambia Wayahudi, "Tazameni Mfalme wenu!"

¹⁵Wakapiga kelele, "Mwondoe! Mwondoe! Msulubishe!" Pilato akawauliza, "Nimsulubishe mfalme wenu?" Wakuu wa makuhani wakajibu, "Sisi hatuna mfalme ila Kaisari."

Atolewa

¹⁶Ndipo akawatia mikononi mwao ili asulubishwe. Basi wakamtwaa Yesu, ¹⁷naye akichukua msalaba wake mwenyewe, akatoka kwenda mahali paitwapo Fuvu la Kichwa, na kwa Kiaramu paitwapo Golgotha. ¹⁸Huko wakamsulubisha, na wengine wawili pamoja naye, mmoja upande huu na mmoja upande huu, na Yesu katikati. ¹⁹Pilato akaandika pia kibao, akakiweka juu ya msalaba, kimeandikwa: Yesu wa Nazareti, Mfalme wa Wayahudi. ²⁰Wayahudi wengi wakakisoma kibao hicho, kwa maana mahali pale aliposulubishwa Yesu palikuwa karibu na mji; nacho kilikuwa kimeandikwa kwa Kiaramu, na Kilatini, na Kiyunani. ²¹Basi wakuu wa makuhani wa Kiyahudi wakamwambia Pilato, "Usiandike, 'Mfalme wa Wayahudi,' bali, 'Mtu huyu alisema, Mimi ni Mfalme wa Wayahudi.'"

²²Pilato akajibu, "Niliyoyaandika, nimeyaandika."

²³Askari walipokwisha kumsulubisha Yesu, wakayatwaa mavazi yake, wakayagawa mafungu manne, kila askari fungu lake, na kanzu pia. Basi kanzu ile ilikuwa haina mshono, imefumwa yote pima moja tangu juu hata chini. ²⁴Wakaambiana, "Tusiipasue, bali tuipigie kura, ni nani atakayeipata." Hii ilikuwa ili yatimie Maandiko yasemayo, "Waligawana mavazi yangu, na juu ya nguo yangu wakapiga kura." Basi askari wakafanya hayo.

²⁵Mama yake, na umbu la mama yake, na Mariamu mke wa Klopa, na Mariamu Magdalene, walisimama karibu na msalaba wa Yesu.

²⁶Yesu alipomwona mama yake, na yule mwanafunzi aliyempenda amesimama karibu, akamwambia mama yake, "Mwanamke, tazama mwanao." ²⁷Kisha akamwambia yule mwanafunzi, "Tazama mama yako." Na tangu saa ile mwanafunzi yule akamchukua nyumbani kwake.

Imekwisha

²⁸Baada ya hayo, Yesu akijua ya kuwa yote yamekwisha kutimizwa, ili Maandiko yatimie, akasema, "Naona kiu."

²⁹Palikuwako mahali pale chombo kimejaa siki; basi wakatia sifongo iliyojaa siki, wakaiweka juu ya ufito wa hisopo, wakaipeleka kinywani mwake.

³⁰Yesu alipoipokea ile siki, akasema, "Imekwisha." Akainama kichwa, akaisalimisha roho yake.

³¹Basi kwa kuwa ilikuwa Siku ya Maandalio, ili miili isikae msalabani siku ya Sabato, kwa sababu Sabato ile ilikuwa siku kubwa, Wayahudi wakamwomba Pilato amivunje miguu na kuiondoa ile miili. ³²Basi askari wakaja, wakamvunja miguu wa kwanza, na yule mwingine aliyesulubishwa pamoja naye. ³³Lakini walipomjia Yesu, wakaona ya kuwa amekwisha kufa, hawakumvunja miguu yake. ³⁴Lakini askari mmoja akamchoma ubavu kwa mkuki, na mara ikatoka damu na maji. ^a a v34 Yohana anatuambia ya kuwa yeye mwenyewe aliliona jambo hili, naye analitoa kuwa ushahidi ya kwamba Yesu alikuwa amekufa kweli. ³⁵Naye aliyeliona ameshuhudia, na ushuhuda wake ni kweli, naye anajua ya kuwa anasema kweli, ili nanyi mpate kuamini. ³⁶Kwa maana mambo haya yalitukia ili Maandiko yatimie, "Hapana mfupa wake utakaovunjwa." ³⁷Na tena andiko lingine lasema, "Watamtazama yeye waliyemchoma."

Yosefu na Nikodemo

³⁸Baada ya hayo, Yosefu wa Arimathea, aliyekuwa mwanafunzi wa Yesu, lakini kwa siri kwa kuwaogopa Wayahudi, akamwomba Pilato ampe ruhusa auondoe mwili wa Yesu. Pilato akakubali, basi akaja akauondoa. ³⁹Akaja pia Nikodemo, yeye aliyemwendea Yesu usiku hapo kwanza, akaleta mchanganyiko wa manemane na uudi, kama ratli sabini na tano. ⁴⁰Basi wakautwaa mwili wa Yesu, wakaufunga sanda za kitani pamoja na manukato, kama ilivyo desturi ya Wayahudi katika kuzika. ⁴¹Na mahali pale aliposulubishwa palikuwa na bustani, na ndani ya bustani mlikuwa na kaburi jipya, ambalo hajazikwa mtu ndani yake bado. ⁴²Basi kwa sababu ya Siku ya Maandalio ya Wayahudi, na kwa kuwa kaburi lilikuwa karibu, wakamzika Yesu humo.