Yowani 19 FHB Father's Heart Bible™

19 ¹Amana Philatu wábonga Yesu amana wámuzyatwasa mafimbu. ²Baphumbulu bátunga mukhonzi wa tsaku, bámutula kuna mutwa wandi, amana bámuvwatisa mvwela ya kabengi. ³Bakala kwisa kwena yandi mu kuzimbula: «Mboti, kyamvu wa Bayuta!» amana bakala muta mbata kuna mbunzu yandi.

⁴Philatu wálubuka hika ku phenza amana wubazimbwadi: «Talenu, yikulunatina yandi ku phenza, hanga luzayi ni mboniku kima kya muzengila ndola mwena yandi.» ⁵Buna Yesu wálubuka ku phenza, wávwata mukhonzi wa tsaku yi mvwela ya kabengi. Philatu wubazimbwadi: «Talenu mutu!»

⁶Tangwa bámumona bambuta ba banganga Nzambi yi batsinzidi, bábokila: «Khokenu yandi ha kitakani! Khokenu yandi ha kitakani!» Philatu wubazimbwadi: «Benu meni bongenu yandi ndangu lwákhoka ha kitakani, mukuma mboniku kima kya muzengila ndola mwena yandi.»

⁷Bayuta bámuzimbwala: «Betu thwenina yi mutsiku; mu mutsiku wuna yandi kafwana kufwa, mukuma wákituka yandi meni Mwana wa Nzambi.»

⁸Tangwa Philatu kázimbula bwabuna, wáyuka bweya bwa lawu. ⁹Wávutuka mu nganda hika amana wámuhyula Yesu: «Kweti wutuki?» Kaasi Yesu kámuvutwalaku mvutu. ¹⁰Buna Philatu wumuzimbwadini: «Ngeyi wuzonzaku kwena meni? Wuzayiku ni meni yenina yi ngolu za kukuyambwala, amana ngolu za kukukhoka ha kitakani?»

¹¹Yesu wumuzimbwadi: «Yuka ni ngolu zisi kuhanwaku kwena ngeyi tuka ku zulu, nga weku ngolu ni mosi mwena meni. Kikuma kya bwabuna, wuna wálambula meni kwena ngeyi kenina yi disumu dya lawu.»

¹²Tuka muna tangwa dina, Philatu wásanda phila ya kumuyambwala, kaasi Bayuta bábokila: «Yuka ni wumuyambwadi, ngeyi wisiku nkundi wa Sezale. Wosu wuna wukituki kyamvu kabati tendisa Sezale.»

¹³Tangwa kázimbula mambu mama, Philatu wánata Yesu ku phenza amana wásikuka hana kiti kya pfundusu, hana homa hana bisi tela: «Fulu kya Matadi», mu ndinga ya hebelu: «Gabata». ¹⁴Kyákala kilumbu kya kuyilama kwa Phaki, kitesu kya tangwa dya tsinzi. Wubazimbwadi Bayuta: «Talenu kyamvu wenu!»

¹⁵Bawu bábokila: «Katulenu yandi! Katulenu yandi! Khokenu yandi ha kitakani!» Philatu wubahyudi: «Yikhoka kyamvu wenu ha kitakani?» Bambuta ba banganga Nzambi bázimbwala: «Betu thweku yi kyamvu wa nkaka, kaasi Sezale kaka.»

Kulambula Yesu

¹⁶Buna wámulambula kwena bawu ndangu bamukhoka ha kitakani. Buna bábonga Yesu, ¹⁷wunata kitakani kyandi kumeni, wálubuka ku phenza homa hana bisi tela: «Fulu kya Kibelengenzi kya mutwa», mu ndinga ya hebelu: «Ngolungota». ¹⁸Hahana bámukhoka ha kitakani, hakimosi yi batu bodi bakwawu, mosi ku koku dimosi, mukwawu ku koku dyakwawu, Yesu ha kati. ¹⁹Philatu wásonika phi mukanda wumosi amana wátula wawu ha kitakani: «Yesu mwisi Nazaleti, Kyamvu wa Bayuta». ²⁰Bayuta bawombo bátanga mukanda wuna, mukuma homa hana bámukhoka Yesu hákala bela-bela yi mbanza; wásonuka mu ndinga ya hebelu, ya latini yi ya ngeleki. ²¹Buna bambuta ba banganga Nzambi ba Bayuta bázimbwala kwena Philatu: «Kusonikaku: “Kyamvu wa Bayuta”, kaasi: “Mutu wawu wázimbula: Meni yenina kyamvu wa Bayuta”.»

²²Philatu wázimbula: «Mana yisonikini, yisonikini.»

²³Kunima dya kumukhoka Yesu ha kitakani, baphumbulu bábonga miledi myandi amana bámikabula mu bitini biya, kitini kimosi kwena kosu phumbulu, amana bábonga phi tunimbaku. Tunimbaku yákala konda kuyita, yátungwa kima kimosi tuka ku londi yi kuna banda. ²⁴Buna bádizimbwadila bawu yi bawu: «Tubwisenu kuyata dyawu, kaasi tubetilenu zeki ndangu tuzayi nani kabonga dyawu.» Mama mábwa ndangu masonuku malungila: «Bákabana miledi myama hana kati dya bawu, amana bábetila muledi wama zeki.» Buna baphumbulu báhanga bwabu.

²⁵Ngudi wandi, phangi wa ngudi wandi, Madiya mukhetu wa Kolopa yi Madiya mwisi Makatala, bátelama bela-bela yi kitakani kya Yesu.

²⁶Tangwa Yesu kámona ngudi wandi yi mulonguki wuna kázola, bátelama hahana, wumuzimbwadini: «Mukhetu, tala mwana waku.» ²⁷Amana wuzimbudini kwena mulonguki: «Tala ngudi aku.» Tuka muna tangwa dina, mulonguki wámubonga ku nzu yandi.

Yimanisini

²⁸Kunima dya mama, Yesu bwosu kázaya ni byosu byamanisini kedi, wázimbula, ndangu masonuku malungila: «Yimweni phwila.»

²⁹Hahana hákala yi mulangi wumosi wabasa yi vinu dya ngani; bávundika kitini kya dinyuka muna vinu, bázitika dyawu ku muhandi wa yizophi, amana bázangula dyawu ku munwa wandi.

³⁰Yesu wábonga vinu dya ngani amana wázimbula: «Yimanisini.» Wázenzika mutwa wandi amana wáhana kitembu kyandi.

³¹Bwosu kyákala kilumbu kya kuyilama, amana Bayuta bázolaku ni bilutu byazingila ha kitakani muna kilumbu kya Sabata—mukuma sabata dina dyákala kilumbu kineni—bálomba kwena Philatu ni babukuna malu ma bawu amana bakatula bilutu. ³²Buna baphumbulu bakwísa amana bábukuna malu ma mutu wa theti, kunima ma mukwawu wuna bámukhoka hakimosi yi yandi. ³³Kaasi tangwa bakwísa kwena Yesu, bámona ni wafwa kedi, bábukunaku malu mandi. ³⁴Kaasi mosi wa baphumbulu wátobula luhati lwandi ni dyonga, amana muna tangwa dimosi menga yi mamba málubuka. ^a a v34 Yowani kabati tuzimbula ni yandi meni wámona mama, amana kabati matula hanga kimbangi ni Yesu wafwa kedi mu kyedika. ³⁵Mutu wuna wámona ni mesu mandi kabati tela kimbangi—kimbangi kyandi kyenina kya kyedika, amana kazaya ni yandi kazonza kyedika—hanga benu phi lwakwikila. ³⁶Mukuma mama mábwa ndangu masonuku malungila: «Ka wumosi ku wa mifufwa myandi wabukuka.» ³⁷Amana hika masonuku makwawu mazimbudini: «Bakatala mutu wuna bátobula.»

Yozefu yi Nikodemi

³⁸Kunima dya mama, Yozefu mwisi Adimate—yandi wákala mulonguki wa Yesu mu kitsweki, mukuma kákala yi bweya ya Bayuta—wálomba kwena Philatu ni kakatula lutu lwa Yesu. Philatu wátambwasa, buna wisa amana wákatula lwawu. ³⁹Nikodemi, wuna watekila kwisa kwena Yesu mu phipha, wisa phi, wunata nsangu wa mila yi alowesi, kitesu kya makumi tsambwadi yi tanu ma bakilo. ⁴⁰Bábonga lutu lwa Yesu amana báluvunga mu bitemba bya miledi hakimosi yi mananasi, bwosu kyenina kikalulu kya kuzika kwa Bayuta. ⁴¹Homa hana bámukhoka ha kitakani, hákala yi masamba; amana muna masamba mákala yi dizyamu dya pha, muna ka mutu ku wákala zika. ⁴²Mukuma kyákala kilumbu kya kuyilama kya Bayuta, amana dizyamu dyákala bela-bela, bámuzika Yesu hahana.