Eng' ngeguutap araraita ne po Tiberia
Koweek koanam njireenik ago ma konam kiy, ak koip njireenik pogol ak konom ak somok eng' ng'olyootap chiito ne ma ngen, ak konyoor amitwogik che kagochobe. Eng' maat age ne po charu koteebe Jeso Petero taosyek somok kole mache ineendet, ak koochi ineendet keechiirek si koriibe, ak komwachi komyee, ‘Isuwo.’
21 1Eng' let koboorunegei Jeso kogeny eng' kasubik eng' ngeguutap araraita ne po Tiberia; ki uu ni ole kiboorunegei. 2Ki mi togeet Simion Petero, ak Thomas ne kiguure Didumo, ak Nathanael ne po Kana ne mi emetap Galilaya, ak weeriigap Zebedayo, ak kasubik alak aeng'. 3Koleenji Simion Petero icheek, “Awendi anam njireenik.” Kole icheek, “Kebendi kobooto inyee.” Ki mang'u anyun ak kochut moinget, ago ma ki nam kiy age tugul eng' kemounooto.
4Kingo kagoeech, kotonon Jeso eng' ngeguut; ago ki ma ngen kasubik ile Jeso.
5Koleenji Jeso icheek, “Lagok, otinye njireenik?” Kowoluunji icheek, “Achicha.”
6Koleenji icheek, “Owiir regereiywot eng' tabandap moinget ne po tai, ak onyooru njireenik.” Ki wiir anyun, ago ma ki muuchi koip koigeny amu chaang'indap njireenik.
7Koleenji kasubindet ne ki chame Jeso Petero, “Ko Kiptaiyat!” Kingo kas Simion Petero ile Kiptaiyat, korategei ngoryennyi — amu ki kagoreegune si koboisye — ak koisto ineegei eng' araraita. 8Ki nyo kasubik alak eng' moinget, kola regereiywot ne iyetyin njireenik, amu ki neegit icheek ak ngeguut, kityo ko uu mita pogol. 9Ye kingo lany emet, kogeer maat ne po charu, ak njireenik che tuon paragunnyi, ak kimnyet.
10Koleenji Jeso icheek, “Oibu njireenik alak che kagonam.”
11Ki lany anyun Simion Petero moinget, ak kola regereiywot koit emet, ne iyetyin njireenik che eecheen pogol ak sosom ak somok; agot nga chaang' nooto, ko ma ki reer.
12Koleenji Jeso icheek, “Obwa, oamisye karon.” Ma ki tinye kasubik age tugul ne kitwek koteebe ineendet, “Ii ng'oo?” — amu ki ngen ile Kiptaiyat.
13Ki nyo Jeso, ak konam kimnyet, ak kogochi icheek, ak njireenik agine. 14Nooto ko koigagenge ne po somok ne koboorunegei Jeso eng' kasubik, eng' let ye kingo king'eet eng' meet.
15Ye kingo kagoamis karon, koteebe Jeso Simion Petero, “Simion, weeriitap Johana, ichame anee eng' muguleldang'ung' tugul, kosiiro chu?” Kowol kole, “Ee, Kiptaiyat, ingen ile achame inyee ko uu chorweet.” Koleenji Jeso, “Iriip sigeiyogaapchu.”
16Koteebe Jeso koigagenge ne po aeng', “Simion weeriitap Johana, ichame anee eng' muguleldang'ung' tugul?” Kowol kole, “Ee, Kiptaiyat, ingen ile achame inyee ko uu chorweet.” Koleenji Jeso, “Iriip keechirkaapchu.”
17Koleenji Jeso koigagenge ne po somok, “Simion weeriitap Johana, ichame anee ko uu chorweet?” Ki ng'waan Petero amu koteebe Jeso koigagenge ne po somok, “Ichame anee ko uu chorweet?” ak kole, “Kiptaiyat, ingen tuguuk tugul; ingen ile achame inyee ko uu chorweet.” Koleenji Jeso, “Iriip keechirkaapchu.”
18“Amwaun iman, iman, ale: ye kingo imi lakweet, kilaakyigei inyegei ak iwe ole imache; ago ye imoegu poiyot, ichuul euneguk, ak kolaakyi age ak koibin ole ma imache iwe.” 19Ki mwa Jeso niito si koboor meet ne uu ne ki toroorchi Petero Kwandanyo. Yeityo koleenji, “Isuba.”
20Koweektagei Petero ak kogeer kasubindet ne ki chame Jeso koosup — ineendet ne ki rutotyi togeennyi Jeso eng' amisyet ne po lagat, ak koteebe, “Kiptaiyat, ng'oo ne ng'wektoin?” 21Ye kingo keer Petero ineendet, koleenji Jeso, “Kiptaiyat, ne niito chiini?”
22Koleenji Jeso, “Ngot amache kotebi agoi anyoone, nee niito eng' inyee? Isuba inyee.” 23Ki yaek anyun ng'olyoondoni among tupchosyek, kole ma mei kasubindeni. Ago ma ki leenji Jeso ineendet ile ma mei, ago, “Ngot amache kotebi agoi anyoone, nee niito eng' inyee?”
24Nooto ko kasubindet ne paoryanjin tuguuchu ak ne ki sir tuguuchu; kingen ile po iman paornatennyi. 25Ki yai Jeso tuguuk alak che chaang' agine. Ngot kisir age tugul, ma apwaat ale muuchi ng'wony ineegei koip bukuisyek che kisir. a a v25 Ko ng'aleek che ki kiyae si koboor ole chaang'tos tuguuk che ki yai Jeso — ma kieenet ne iman.