John 21

21 ¹Chiwui thili Jishuna Tiberias shamadru ngalemli sākhangatha̱bingli khalatta latluida chithei. Ana khalatta hithāda chithei. ²Simon Peter, Ngashira kaho Thomas, Galileeli khalei Canawui Nathanael, Zebedeewui naongarā, kala khangatei sākhangatha̱ khani katonga leisai. ³Simon Peterna athumli hānga, "Ina khai phākhavai vāra." Athumna, "Ithumla nala ngasovāra," da hānga. Chieina athum zatphoklaga marikhongli kātonga, kha chithang ngayā khiotkha mahorkhuimana.

⁴Kazing kathang eina Jishuna ngayipheili nganinga, kha chi Jishuna kaji sākhangatha̱bingna matheimana.

⁵Jishuna athumli hānga, "Inaongarā, nathumli khai leilā?" Athumna ali ngahānkai, "Maleimana."

⁶Ana athumli hānga, "Marikhongwui yāpangshongli khailan horsanglu, chithākha nathumna khai samphangra." Chieina athumna horsanga, kala khai kachungkhathaowui vang chi hokhui mashaplengmana.

⁷Jishuna leikashi sākhangatha̱na Peterli hānga, "Chi Prohona!" Chi Proho kaji kashā tharan, Simon Peterna awui kachon shaksālaga shamadruli khalatta horsanga. Kaja ana ot sākhavai awui kachon raitāhairasai. ⁸Khangatei sākhangatha̱bing china, khai pemtinghai khailan chi tukkhuida, marikhong tonglaga rāhaowa, kaja athum ngayipheiwui eina khuining shākha shakha tai. ⁹Athumna ngayipheili kashok tharan, charfa mei, chiwui tungli khai, kala khamui theihaowa.

¹⁰Jishuna athumli hānga, "Nathumna ara hokhui kahai khai kaikha khuirālu."

¹¹Chieina Simon Peterna marikhongli kālaga khai kahakva 153 pemtinghai khailan chi ngayipheili tukkhuishoka; chithā kachungkhathā-ilala chi makākmana.

¹²Jishuna athumli hānga, "Rālu, phazākhuilu." Sākhangatha̱bing khipānakha ali, "Na khipākhala?" da khangahān masālengmana, kaja chi Prohona kaji athumna thei.

¹³Jishuna rālaga khamui chi khuilaga athumli khamila, kala khaila chithai. ¹⁴Hi Jishuna kathiwui eina ringshok kahaiwui thili sākhangatha̱bingli khalatta chithei kakathumathangna.

¹⁵Athumna phazākhui kahaiwui thili, Jishuna Simon Peterli ngahāna, "Johnwui naomayara Simon, hibingli lāngmeida nana ili iwuklung katonga eina leishila?" Ana ngahānkai, "Mha, Proho, ina nali ngasotnao thāda leishi kaji nana thei." Jishuna ali hānga, "Iwui yaonaobing zākhavai khamilu."

¹⁶Kakhanethang Jishuna ngahāna, "Johnwui naomayara Simon, nana ili iwuklung katonga eina leishila?" Ana ngahānkai, "Mha, Proho, ina nali ngasotnao thāda leishi kaji nana thei." Jishuna hānga, "Iwui yaobing homkhamlu."

¹⁷Kakathumathang Jishuna ali hānga, "Johnwui naomayara Simon, nana ili ngasotnao thāda leishila?" Jishuna ali kakathumathang, "Nana ili ngasotnao thāda leishila?" da ngahānkakāwui vang Peterna ning khananghaira, kala hānga, "Proho, nana saikora thei; ina nali ngasotnao thāda leishi kaji nana thei." Jishuna ali hānga, "Iwui yaobing zākhavai khamilu."

¹⁸"Kachangkhat eina ina nali kahāngna, na nganuilakha eina, na khalatta shaksākhuida na vāngai kaji chili vai; kha na rarkai tharan, nana napāng katingvāra, kala khangatei akhana nali ngavaimilaga na mavāngai kaji chili nali khuivāra." ¹⁹Jishuna hi kahāng hi Peterna khithit eina ithumwui Avāli tekmatei ngasakrakhala kaji chitheida kahāngna. Chieina ana ali hānga, "Ithi shurlu."

²⁰Peterna ngareilaga, phazāt tharan Jishuwui mathikshong shaivāda "Proho, khipāna nali yansairakhala?" da ngahān kahai, Jishuna leikashi sākhangatha̱pā chi athi shurrākakā thei. ²¹Peterna ali theilaga, Jishuli hānga, "Proho, mipā hiwui vang khikhala?"

²²Jishuna ali hānga, "I marāranglakha eina tangda ana leiphalungra da ina ngaiakha, chi nawui vang khirakhala? Na ithi shurlu." ²³Chieina sākhangatha̱pā hi mathira da hāngkahai tui chi ivānaobing ngachaili ngayaovai. Chithālala Jishuna ali ana mathira da mahāngmana, kha, "I marāranglakha eina tangda ana leiphalungra da ina ngaiakha, chi nawui vang khirakhala?" da kahāngna.

²⁴Ot saikora hiwui shākhi kasā kala hibing kapi kahai sākhangatha̱pā chi hina; kala awui shākhi hi khamashungana da ithumna thei. ²⁵Jishuna khangatei ot kachungkhala sāhaira. Kachichā chi kapiserhaiakha, kapikahai lairik saikora chi okathui khalattali maleiphungphutmara da ina phaning. ^a a v25 Hi Jishuna khiyāk ot sāhaikhala kaji chitheikhavai khangarān eina sākahai chānjam tuina — akachang tamung maningmana.