யோவான் 21

21 ¹ இவைகளுக்குப் பின்பு இயேசு மறுபடியும் திபேரியா கடலருகே தம்முடைய சீஷருக்குத் தம்மை வெளிப்படுத்தினார்; அவர் தம்மை வெளிப்படுத்தின விதம் இதுவே. ² சீமோன் பேதுருவும், திதிமு எனப்படும் தோமாவும், கலிலேயாவிலுள்ள கானா ஊரானாகிய நாத்தான்வேலும், செபெதேயுவின் குமாரரும், அவருடைய சீஷரில் வேறே இரண்டுபேரும் ஒன்றாய்க் கூடியிருந்தார்கள். ³ சீமோன் பேதுரு அவர்களை நோக்கி: “நான் மீன்பிடிக்கப் போகிறேன்” என்றான். அதற்கு அவர்கள்: “நாங்களும் உன்னோடேகூட வருகிறோம்” என்றார்கள். அவர்கள் புறப்பட்டுப் படவில் ஏறினார்கள்; ஆனாலும் அன்று இராமுழுவதும் ஒன்றையும் பிடிக்கவில்லை.

⁴ விடியற்காலமானபோது இயேசு கரையிலே நின்றார்; ஆயினும் அவர் இயேசு என்று சீஷர்கள் அறியவில்லை. ⁵ இயேசு அவர்களை நோக்கி: “பிள்ளைகளே, புசிக்கிறதற்கு ஏதாவது மீன் உங்களிடத்தில் உண்டா?” என்றார். அதற்கு அவர்கள்: “இல்லை” என்றார்கள்.

⁶ அப்பொழுது அவர்: “படவின் வலதுபக்கத்தில் வலையைப் போடுங்கள், அப்பொழுது உங்களுக்குக் கிடைக்கும்” என்றார். அவர்கள் வலையைப் போட்டார்கள்; மீன்கள் மிகுதியாய் அகப்பட்டதினால் அதை இழுத்தெடுக்க அவர்களால் முடியாதிருந்தது.

⁷ ஆகையால் இயேசு நேசித்த சீஷன் பேதுருவை நோக்கி: “அவர் கர்த்தர்தான்!” என்றான். சீமோன் பேதுரு அவர் கர்த்தர் என்று கேட்டவுடனே, தான் வேலைக்காக ஆடை களைந்திருந்தபடியால் தன் மேலங்கியை உடுத்திக்கொண்டு கடலில் குதித்தான். ⁸ மற்ற சீஷர்கள் தரையிலிருந்து சுமார் நூறு கெசம் தூரமே தவிர, அதிக தூரத்திலிருக்கவில்லையாதலால், மீன் நிறைந்த வலையை இழுத்துக்கொண்டு படவில் வந்தார்கள். ⁹ அவர்கள் கரையிலே இறங்கினபோது, கரிநெருப்பையும், அதின்மேல் வைக்கப்பட்டிருந்த மீனையும், அப்பத்தையும் கண்டார்கள். ¹⁰ இயேசு அவர்களை நோக்கி: “நீங்கள் இப்பொழுது பிடித்த மீனில் சிலவற்றைக் கொண்டுவாருங்கள்” என்றார். ¹¹ சீமோன் பேதுரு படவில் ஏறி, நூற்றைம்பத்துமூன்று பெரிய மீன்கள் நிறைந்திருந்த வலையைக் கரையிலே இழுத்தான். அவைகள் அவ்வளவு மிகுதியாயிருந்தும் வலை கிழியவில்லை.

¹² இயேசு அவர்களை நோக்கி: “வந்து காலை உணவு புசியுங்கள்” என்றார். அவர் கர்த்தர் என்று அறிந்திருந்தபடியால், “நீர் யார்?” என்று சீஷர்களில் ஒருவனும் அவரிடத்தில் கேட்கத் துணியவில்லை. ¹³ இயேசு வந்து, அப்பத்தை எடுத்து அவர்களுக்குக் கொடுத்தார், மீனையும் அப்படியே கொடுத்தார். ¹⁴ இயேசு மரித்தோரிலிருந்து எழுந்தபின்பு தம்முடைய சீஷருக்குத் தம்மை வெளிப்படுத்தினது இது மூன்றாம்முறை.

¹⁵ அவர்கள் காலை உணவை முடித்தபின்பு, இயேசு சீமோன் பேதுருவை நோக்கி: “யோவானின் குமாரனாகிய சீமோனே, இவர்களைப் பார்க்கிலும் நீ என்னை உன் முழு இருதயத்தோடும் நேசிக்கிறாயா?” என்றார். அதற்கு அவன்: “ஆம் கர்த்தாவே, நான் உம்மை ஒரு சிநேகிதனாக நேசிக்கிறேன் என்பதை நீர் அறிவீர்” என்றான். அவர் அவனை நோக்கி: “என் ஆட்டுக்குட்டிகளை மேய்ப்பாயாக” என்றார்.

¹⁶ இரண்டாம்முறை இயேசு அவனை நோக்கி: “யோவானின் குமாரனாகிய சீமோனே, நீ என்னை உன் முழு இருதயத்தோடும் நேசிக்கிறாயா?” என்றார். அதற்கு அவன்: “ஆம் கர்த்தாவே, நான் உம்மை ஒரு சிநேகிதனாக நேசிக்கிறேன் என்பதை நீர் அறிவீர்” என்றான். அவர் அவனை நோக்கி: “என் ஆடுகளைக் காப்பாற்றுவாயாக” என்றார்.

¹⁷ மூன்றாம்முறை இயேசு அவனை நோக்கி: “யோவானின் குமாரனாகிய சீமோனே, நீ என்னை ஒரு சிநேகிதனாக நேசிக்கிறாயா?” என்றார். “நீ என்னை ஒரு சிநேகிதனாக நேசிக்கிறாயா?” என்று இயேசு மூன்றாம்முறை தன்னைக் கேட்டதினால் பேதுரு துக்கப்பட்டு, அவரை நோக்கி: “கர்த்தாவே, நீர் எல்லாவற்றையும் அறிந்திருக்கிறீர்; நான் உம்மை ஒரு சிநேகிதனாக நேசிக்கிறேன் என்பதையும் நீர் அறிவீர்” என்றான். இயேசு அவனை நோக்கி: “என் ஆடுகளை மேய்ப்பாயாக” என்றார்.

¹⁸ “மெய்யாகவே மெய்யாகவே நான் உனக்குச் சொல்லுகிறேன், நீ இளவயதாயிருந்தபோது உன்னை நீயே உடுத்திக்கொண்டு, உனக்கு விருப்பமான இடத்திற்குப் போனாய்; ஆனாலும் நீ முதிர்ந்த வயதுள்ளவனாகும்போது உன் கைகளை நீட்டுவாய், வேறொருவன் உன்னை உடுத்தி, உனக்கு விருப்பமில்லாத இடத்திற்கு உன்னை நடத்திக்கொண்டுபோவான்” என்றார். ¹⁹ (பேதுரு எப்படிப்பட்ட மரணத்தினாலே எங்கள் பிதாவை மகிமைப்படுத்துவான் என்பதைக் குறிக்கும்படி இயேசு இதைச் சொன்னார்.) இதைச் சொன்னபின்பு அவர் அவனை நோக்கி: “என்னைப் பின்பற்றி வா” என்றார்.

²⁰ பேதுரு திரும்பிப் பார்த்து, இயேசு நேசித்த சீஷன் பின்னே வருகிறதைக் கண்டான்; இவனே இராவணத்தில் இயேசுவின் மார்பிலே சாய்ந்து: “கர்த்தாவே, உம்மைக் காட்டிக்கொடுக்கப்போகிறவன் யார்?” என்று கேட்டவன். ²¹ பேதுரு இவனைக் கண்டு, இயேசுவை நோக்கி: “கர்த்தாவே, இவன் காரியம் என்ன?” என்றான்.

²² இயேசு அவனை நோக்கி: “நான் வருமட்டும் இவன் இருக்கவேண்டும் என்று நான் விரும்பினால், அதைப்பற்றி உனக்கென்ன? நீ என்னைப் பின்பற்றி வா” என்றார். ²³ ஆகையால் இந்தச் சீஷன் மரிக்கமாட்டான் என்கிற பேச்சு சகோதர சகோதரிகளுக்குள்ளே பரவிற்று. ஆயினும் அவன் மரிக்கமாட்டான் என்று இயேசு சொல்லவில்லை; “நான் வருமட்டும் இவன் இருக்கவேண்டும் என்று நான் விரும்பினால், அதைப்பற்றி உனக்கென்ன?” என்றே சொன்னார்.

²⁴ இந்தக் காரியங்களைக்குறித்துச் சாட்சிகொடுத்து, இவைகளை எழுதியவன் இந்தச் சீஷனே; அவனுடைய சாட்சி உண்மையானது என்று அறிந்திருக்கிறோம். ²⁵ இயேசு செய்த வேறே அநேக காரியங்களும் உண்டு; அவைகளில் ஒவ்வொன்றாய் எழுதப்படுமானால், எழுதப்படும் புத்தகங்களை உலகமும் கொள்ளாதென்று எண்ணுகிறேன்.