Taachei Joseph Piigap Koonnyi
Ki inde Pharaoh mestoik eng' Goshen ye po rubeet. Ki alda Misiriik fedhaisyekwak, tuugawyik, emennywa, ak let ineegei agobo peek, ak koek Joseph niito ng'atuutyet. Ki le Jakobo kole kenyiisyekyik ko ng'ering' ak che nyalileen, ak koyosyi Joseph kole matkotup ineendet eng' Misiri.
47 1Ki nyo Joseph ak koleenji Pharaoh, “Kabwa kwandanyu ak tupchosyekyuk, kobooto keechiirekwak, tuukwak, ak tugul che tinyei, kong'eetyee Kanaan. Mi rani Goshen.” 2Ki inam eng' tupchosyekyik murenik mut, ak koboorchi Pharaoh. 3Ki teebe Pharaoh tupchosyegap Joseph, koleenji, “Poisyeng'wong' ko nee?” Ak ki wolji icheek Pharaoh, kole, “Otwogiguk ko mestowegap keechiirek, acheek ak kwanisyekyok kibagenge.”
4Ki leenji Pharaoh, “Kabwa kemeny emoni koek toek, amu momi ole kiyage keechiiregap otwogiguk—king'wanit rubeet miising' eng' Kanaan. Asaa rani, chame otwogiguk komeny Goshen.”
5Ki leenji Pharaoh Joseph, “Kabwa kwandang'ung' ak tupchosyekyuk ole imi. 6Mi emetap Misiri taing'ung'. Inde kwandang'ung' ak tupchosyekyuk komeny ole karaaran eng' emet—ingomeny Goshen. Ngo ingen murenik che kiim eng' kwenunnywa, inde koboi tuugaguk.”
7Ki imut Joseph kwandanyi Jakobo, ak koboorchi Pharaoh, ak ki beruur Jakobo Pharaoh. 8Ki teebe Pharaoh Jakobo, koleenji, “Kenyiisyek ata che isabe?”
9Ki wolji Jakobo Pharaoh, kole, “Kenyiisyegap kombenatennyu ko pogol ak sosom. Ng'ering' ak che nyalileen, ma ki koit kenyiisyegap kombenatetap kwanisyekyuk.” 10Ki beruur Jakobo Pharaoh, ak kong'eet eng' taitap Pharaoh.
11Ki inde Joseph kwandanyi ak tupchosyekyik komeny, ak kogoochi emet eng' komoswek che kararaneen eng' Misiri, komostap Rameses, ko uu ye ki king'at Pharaoh. 12Ki chopchin Joseph kwandanyi, tupchosyekyik, ak piik tugul che po kootap kwandanyi amitwogik, ko uu borotetap lagokwak.
Tesaksei Rubeet
13Mom ki tagomi amitwogik eng' emet komugul, amu king'wanit rubeet miising', ak king'emak emetap Misiri ak emetap Kanaan amu rubeet. 14Ki yum Joseph fedha tugul che ki kinyoor eng' emetap Misiri ak emetap Kanaan amu peek che ki aldoi, ak ki ib Joseph fedha koba kootap Pharaoh. 15Ye kingo kesta fedha eng' emetap Misiri ak emetap Kanaan, ki pwa Misiriik tugul ole mi Joseph, koleen, “Koonech amitwogik! Amu nee si kebegu acheek eng' taing'ung'? Amu kagogesta fedha.”
16Ki wol Joseph, kole, “Koonjin tuugaguk; agoonok amitwogik koek walutik che po tuugaguk, amu kagogesta fedha.” 17Ki ib tuukwak ole mi Joseph, ak kogoochi amitwogik koek walutik che po paraisisyek, keechiirek, tuuga, ak sigiroik. Ki chopchin amitwogik eng' kenyinooto agobo tuukwak tugul. 18Ki keskei kenyinooto, ak ki bwa ole mi ineendet eng' kenyiit ne po aeng', kole, “Momuuchi keung' eng' kiptaiyandennyo ale kagogesta fedhanyo ak tuuga ko po kiptaiyandennyo; mom tagomi kiy age eng' kiptaiyandennyo, komanda poorwekyok ak emennyo. 19Amu nee si kebegu eng' koonyek—acheek ak emennyo? Al acheek ak emennyo amu amitwogik; kepoisyeeni acheek ak emennyo Pharaoh. Koonech kesweek si kesap, si ma kibegu, ak si ma koguber emet.”
20Ki al Joseph emet tugul ne po Misiri agobo Pharaoh, amu ki aldoi Misirindet age tugul mbareennyi—king'wanit rubeet miising' koosir icheek. Ki egu emet po Pharaoh. 21Ki landa piik koba nganasook, kong'eetyee kebeberta age po Misiri agoi age. 22Ago mom ki al emetap tisiik kityo, amu ki koochi Pharaoh kebeberta ne ki kibchobok ne sabei icheek; amu nooto mom ki aldoi emennywa. 23Ki leenji Joseph piik, “Keero, kaal okweek ak emeng'wong' agobo Pharaoh rani. Ang'ni kesweek—ogoole emet. 24Eng' kesisyet, ogoochi Pharaoh kebeberta agenge eng' muut; oriip partik ang'wan koek kesweegap mbareet ak amitwogik agobo okweek, piigap kooriikwok, ak lagokwok.”
25Ki leenji, “Kisarwech saboonwekyok. Kenyoor myeeindo eng' konyegap kiptaiyandennyo, ak keegu otwogigap Pharaoh.” 26Ki yai Joseph ng'atuutyet eng' Misiri—ne mi agoi ra—ale kebeberta agenge eng' muut ko po Pharaoh. Ago emetap tisiik kityo ko ma ki egu po Pharaoh.
27Ki meny Israel eng' emetap Misiri, eng' emetap Goshen. Ki yumjigei tuguuk eng' emonooto, ak ki sigiisyo ak kochang'a miising'. 28Ki sap Jakobo eng' Misiri kenyiisyek taman ak tisap; ki ek kenyiisyegap saboondanyi pogol ak tiptem ak tisap. 29Ye kingo neegit saitap meetap Israel, ki guure weeriinnyi Joseph, ak koleenji, “Ngo kaanyooru myeeindo eng' inyee, asaain inde eung' kwenutap tagateennyu, ak iboorwo chamyet ne po imanda ak myeeindo. Asaain mat itup anee eng' Misiri, a a v29 Konde eut kwenutap tagatetap chii ko ki ortinwetap asayweet ne po kisabkeny, ne rigini kayomiset eng' iyotetap chiito. 30ago achame aru kobooto kwanisyekyuk. Imutu anee kong'eetyee Misiri ak itup eng' kererinywa.” Ki le Joseph, “Ayae ko uu ye imwae.”
31Ki le Jakobo, “Iyasye.” Ki iyasye Joseph ineendet. Yeityo kong'oruitos Israel eng' metitap itoogutyennyi.