ዘፍጥረት 47 FHB Father's Heart Bible™

47 ¹ዮሴፍ መፂኡ ንፈርዖን ከምዙይ ኢሉ ነገሮ፦ “ኣቦይን ኣሕዋተይን ምስ ኣባጊዖምን ኣብዑሮምን ኵሉ ዘለዎምን፥ ካብ ከነዓን መፂኦም። ሕዚ ኸዓ ኣብ ጌሴም ኣለዉ።” ²ካብ ኣሕዋቱ ኸዓ ሓሙሽተ ሰባት ወሲዱ ንፈርዖን ኣቕረቦም። ³ፈርዖን ድማ ነሕዋት ዮሴፍ ከምዙይ ኢሉ ሓተቶም፦ “ስራሕኹም እንታይ እዩ?” ንሳቶም ከዓ ንፈርዖን “ባሮትካ ጓሶት ኣባጊዕ ኢና፥ ንሕናን ኣቦታትናን ማዕረ” በልዎ።

⁴ንፈርዖን ድማ ከምዙይ በልዎ፦ “ኣብ ከነዓን ጥሜት በርቲዑ እዩ እሞ፥ ንኣባጊዕ ባሮትካ መውፈሪ የለን። ስለዙይ ኣብዛ ምድሪ እዚኣ ስደተኛታት ኮይና ክንነብር መፂእና ኣለና። ሕዚ ድማ ባሮትካ ኣብ ጌሴም ክቕመጡ ፍቐደሎም።”

⁵ፈርዖን ድማ ንዮሴፍ ከምዙይ በሎ፦ “ኣቦኻን ኣሕዋትካን ናባኻ መፂኦም ኣለዉ። ⁶ምድሪ ግብፂ ኣብ ቅድሜኻ ኣላ። ነቦኻን ነሕዋትካን ኣብቲ ዝበለፀ ምድሪ ኣቐምጦም፤ ኣብ ጌሴም ይንበሩ። ካብኣቶም ክኢላታት ሰባት ከም ዘለዉ እንተ ፈሊጥካ ድማ፥ ኣብ ልዕሊ ማለይ ሹመሎም።”

⁷ዮሴፍ ድማ ንኣቦኡ ያእቆብ ናብ ውሽጢ ኣእትዩ ኣብ ቅድሚ ፈርዖን ኣቖሞ፤ ያእቆብ ከዓ ንፈርዖን ባረኾ። ⁸ፈርዖን ድማ ንያእቆብ “ዕድሜኻ ክንደይ ዓመት ኮይኑ?” ኢሉ ጠየቖ።

⁹ያእቆብ ድማ ንፈርዖን ከምዙይ ኢሉ መለሰሉ፦ “ዓመታት ስደተይ ሚእትን ሰላሳን ዓመት እዩ። ውሑድ፥ ክፉእውን እዩ፤ ናብ ዓመታት ስደት ኣቦታተይ ኣይበፅሐን።” ¹⁰ሽዑ ያእቆብ ንፈርዖን ባሪኹ ካብ ቅድሚኡ ወፀ።

¹¹ዮሴፍ ድማ ከምቲ ፈርዖን ዝኣዘዞ፥ ነቦኡን ነሕዋቱን ኣብ ዝበለፀ ምድሪ ግብፂ፥ ኣብ ከባቢ ራምሴ፥ ርስቲ ሂቡ ኣቐመጦም። ¹²ዮሴፍ ከዓ ኸም ቍፅሪ ደቆም ነቦኡን ነሕዋቱን ንዅሉ ስድራ ቤት ኣቦኡን ይቕልቦም ነበረ።

ጥሜት እናበርትዐ ከደ

¹³እቲ ጥሜት የመና በርቲዑ ስለ ዝነበረ፥ ኣብ ኵላ እታ ምድሪ ምግቢ ኣይተረፈን። ምድሪ ግብፅን ምድሪ ከነዓንን ከዓ ብጥሜት ተዳኸማ። ¹⁴ዮሴፍ ድማ በቲ ዝዓዱግዎ ዝነበሩ እኽሊ፥ ኣብ ምድሪ ግብፅን ኣብ ምድሪ ከነዓንን ዝተረኽበ ኵሉ ብሩር ኣከበ፤ ዮሴፍ ከዓ ነቲ ብሩር ናብ ቤት ፈርዖን ኣእተዎ። ¹⁵እቲ ብሩር ኣብ ምድሪ ግብፅን ኣብ ምድሪ ከነዓንን ምስ ወድአ ድማ፥ ኵሎም ግብፃውያን ናብ ዮሴፍ መፂኦም “ምግቢ ሃበና! ብሩር ስለ ዝወድአ ኣብ ቅድሜኻ ስለ ምንታይ ንመውት?” በልዎ።

¹⁶ዮሴፍ ድማ “ብሩርኩም ስለ ዝወድአ ማልኩም ኣረክቡ፤ ኣብ ክንዲ ማልኩም ምግቢ ክህበኩም እየ” ኢሉ መለሰሎም። ¹⁷ንሳቶም ድማ ማሎም ናብ ዮሴፍ ኣምፁ፤ ንሱ ኸዓ ኣብ ክንዲ ኣፍራስን ኣባጊዕን ኣብዑርን ኣእዱግን እንጀራ ሃቦም። በታ ዓመት እቲኣ ኣብ ክንዲ ኵሉ ማሎም እንጀራ ቐለቦም። ¹⁸እታ ዓመት እቲኣ ምስ ተወደአት ድማ፥ በታ ኻልአይቲ ዓመት ናብኡ መፂኦም ከምዙይ በልዎ፦ “ብሩርና ኸም ዝወድአን እቲ ማል ድማ ናይ ጐይታና ኸም ዝኾነን ካብ ጐይታና ክንሓብኦ ኣይንኽእልን ኢና፤ ብዘይ ሰብነትናን ምድርናን ንጐይታና ዝተረፈ የለን። ¹⁹ንሕናን ምድርናን ኣብ ቅድሚ ዓይንኻ ስለ ምንታይ ንመውት? ንሕናን ምድርናን ብምግቢ ዓድገና፤ ንሕናን ምድርናን ንፈርዖን ባሮት ክንኸውን ኢና። ከይንመውት ክንነብር ከዓ ዘርኢ ሃበና፤ እታ ምድሪ ድማ ከይትባድም ሓግዝ።”

²⁰ዮሴፍ ድማ ንፈርዖን ኵላ ምድሪ ግብፂ ዓደገ፤ እቲ ጥሜት ኣብ ልዕሊኦም የመና በርቲዑ ስለ ዝነበረ፥ ነፍሲ ወከፍ ግብፃዊ ግራቱ ሸጠ። እታ ምድሪ ኸዓ ናይ ፈርዖን ኮነት። ²¹ነቲ ህዝቢ ድማ ካብ ሓደ ወሰን ግብፂ ክሳዕ ካልኣይ ወሰና፥ ናብ ከተማታት ኣግዓዞ። ²²ፈርዖን ንካህናት ዝነብሩሉ ውሱን ግደ ይህቦም ስለ ዝነበረ፥ ምድሮም ኣይሸጡን። ስለዙይ ምድሪ ካህናት ጥራሕ ኣይዓደገን። ²³ዮሴፍ ድማ ነቲ ህዝቢ ከምዙይ በሎም፦ “እንሆ፥ ሎሚ ንኣኻትኩምን ንምድርኹምን ንፈርዖን ዓዲገኩም ኣለኹ። እንሆ ዘርኢ፤ ነታ ምድሪ ዝርእዋ። ²⁴ኣብ ቐውዒ ኸዓ ሓምሻይ ግደ ንፈርዖን ሃቡ፤ እቲ ኣርባዕተ ግደ ድማ ንዘርኢ ግራትን ንምግቢ ንስኻትኩምን ንስድራ ቤትኩምን ንደቅኹምን ይኹን።”

²⁵ንሳቶም ድማ “ህይወትና ኣድሓንካ። ኣብ ቅድሚ ዓይኒ ጐይታና ፀጋ ንርከብ፥ ንሕናውን ባሮት ፈርዖን ክንኸውን ኢና” በልዎ። ²⁶ዮሴፍ ድማ ሓምሻይ ግደ ንፈርዖን ከም ዝኸውን፥ ክሳዕ ሎሚ ፀኒዑ ዘሎ ሕጊ ኣብ ግብፂ ገበሮ። ምድሪ ካህናት ጥራሕ እያ ናይ ፈርዖን ዘይኮነት።

²⁷እስራኤል ድማ ኣብ ምድሪ ግብፂ፥ ኣብ ምድሪ ጌሴም ተቐመጠ። ኣብኣ ኸዓ ርስቲ ኣጥረዩ፤ ተፋረዩን የመናውን በዝሑ። ²⁸ያእቆብ ድማ ኣብ ግብፂ ዓሰርተ ሸውዓተ ዓመት ነበረ፤ ዕድመ ዕምሩ ኵሉ ሚእትን ኣርብዓን ሸውዓተን ዓመት ኮነ። ²⁹እስራኤል ዝመውተላ ጊዜ ምስ ቀረበት ድማ፥ ንወዱ ዮሴፍ ፀዊዑ ከምዙይ በሎ፦ “ኣብ ቅድሜኻ ፀጋ ረኺበ እንተ ኾይነ፥ በይዛኻ ኢድካ ኣብ ትሕቲ ሰለፈይ ኣንብር፤ እሙን ፍቕርን ተኣማንነትን ከዓ ግበረለይ። በይዛኻ ኣብ ግብፂ ኣይትቐብረኒ፤ ^a a v29 ኢድ ኣብ ትሕቲ ሰለፍ ሓደ ሰብ ምንባር፥ ኣብ ዘመነ ጥንቲ ኽቡር ናይ መሓላ ምልክት ነበረ፤ ነቲ ተስፋ ኸዓ ኣብ ልዕሊ ዘርኢ ሰብ ዘፅንዕ ነበረ። ³⁰ምስ ኣቦታተይ ደኣ ከደቅስ፤ ካብ ግብፂ ኣውፂእኻ ኣብ መቓብሮም ቕበረኒ።” ዮሴፍ ድማ “ከምቲ ዝበልካዮ ክገብር እየ” በሎ።

³¹ያእቆብ ድማ “ማሕለለይ” በሎ። ዮሴፍ ከዓ ማሐለሉ። ሽዑ እስራኤል ኣብ ርእሲ ዓራቱ ሰገደ።