Haokaphok 47

47 ¹Josephna Pharaohli rāhānga, "Ishāvā kala ishi china ngarā, athumwui mela, seila, kala khalalei saikorala Canaanwui eina rāhaira. Ara athum Goshenli lei." ²Achinā ngarāwui alungli mi phangā khuilaga Pharaohwui mangāli khuivāmi. ³Pharaohna Josephwui achinā ngarāli ngahāna, "Nathum khi ot sākhala?" Athumna Pharaohli hānga, "Naraobing ithum kala ithumwui shāvā ngarā ngarumda yao homa."

⁴Athumna Pharaohli hānga, "Ithum ngalei hili yaozat khavai rāhaira, kaja naraobingwui yaobingwui vang seihomphung maleimana, khikhalajila Canaanli zāt kasak kateokhamāng maningmana. Ara, ina kapona, naraobing Goshenli sompam ngasakmilu."

⁵Pharaohna Josephli hānga, "Navā kala nachinā ngarā nawuili rāhaira. ⁶Egypt ngalei nawui mangāli theida lei. Navā kala nachinā ngarāli ngalei mathāmeikap kaji apamli sompam ngasaklu; athum Goshenli sompamra. Athumwui alungli mi kashapa theiakha, iwui sha̱keitungli yangmi khavai athumli sanglu."

⁷Chieina Josephna avāva̱ Jacobli khuizanglaga Pharaohwui mangāli khuivāmi, kala Jacobna Pharaohli somi. ⁸Pharaohna Jacobli ngahāna, "Na zingkum khiphung ringhairakhala?"

⁹Jacobna Pharaohli ngahānkai, "Iwui ramkazat mirinwui zingkum hi shākha thumrāna. Kateokha kala kharlaka, ishāvā ngarāwui ramkazat mirinwui zingkum eina tangda masamphangthuwa." ¹⁰Chieina Jacobna Pharaohli somilaga awui mangā eina shokhaowa.

¹¹Chithāda Pharaohna kasoi athishurda Josephna avāva̱ kala achinā ngarāli sompam ngasakta, Egyptwui mathāmeikap kaji leiret, Rameseswui apamli lam mihaowa. ¹²Josephna avāva̱, achinā ngarā, kala avāva̱wui shimkhur saikorali, athumwui naoshinaobingwui mashing athishurda kashakazā mizāi.

Zāt Kasak Kachangkhathao

¹³Ngalei katongali kashakazā khikha maleithuwa, kaja zāt kasak kateokhamāng maningmana, kala Egypt ngalei kala Canaan ngalei zāt kasakna shimānhaowa. ¹⁴Athumna kashakazā loi chiwui vang Josephna Egypt ngalei kala Canaan ngaleili leikahai lupāsā saikora kazipkhui, kala Josephna lupāsā chi Pharaohwui shimli khuizanga. ¹⁵Egypt ngalei kala Canaan ngaleili lupāsā yaongakān kahai eina, Egyptnaobing saikora Josephwuili rāhānga, "Ithumli kashakazā khamilu! Khisāda ithumna nawui mangāli thira? Kaja lupāsā maleithura."

¹⁶Josephna ngahānkai, "Nathumwui sha̱kei khuirālu; nathumwui sha̱kei eina ngatha̱khui ina nathumli kashakazā mira, kaja nathumwui lupāsā maleithura." ¹⁷Athumna athumwui sha̱kei Josephwuili khuirāda, ana siguibing, mebing, seibing, kala gadhābingwui vang athumli khamui mi. Chikum ana athumwui sha̱kei saikorawui vang athumli khamui eina ngarānmi. ¹⁸Chikum peihaida, kakhane kumli athumna ali vaida hānga, "Ithumwui lupāsā thuihaira kala sha̱kei chi ameiwuisera kaji ithumna ameiwui eina mathum ngasakmara; ameiwui vang ithumwui phasā eina ithumwui ngalei maningla khikha maleimana. ¹⁹Ithum eina ithumwui ngalei khisāda nawui miktāli thira? Kashakazāwui vang ithum eina ithumwui ngalei lokhuilu; chithāda ithum eina ithumwui ngalei Pharaohli otram ngatha̱ra. Ithum ringkhavai kala ngalei chi ngachakyāng masā khavai ithumli athā khamilu; chithāda ithum mathira."

²⁰Chieina Josephna Egyptwui ngalei katonga Pharaohwui vang lokhui, kaja Egyptnao kachiva̱na awui lam yorhaowa, khikhalajila zāt kasak chi athumli kateokha maningmana. Ngalei chi Pharaohwui ngasāhaowa. ²¹Ana Egyptwui ngalem akhawui eina khangatei ngalem eina tangda mibingli keinungbingli khuiphunga. ²²Ana pāngmonbingwui lammāng malokhuimana, kaja Pharaohna athumli yar kapangkhui akha mi, chieina athumna ringsai; chiwui vang athumna athumwui ngalei mayormana. ²³Josephna mibingli hānga, "Yanglu, aja ina nathum eina nathumwui ngalei Pharaohwui vang lokhuihaira. Ara athā chi hili lei; ngaleili athā yaolu. ²⁴Māhāli Pharaohli kaphangā kai mira; kala kai mati chi luiwui athā sāda kala nathum, nathumwui shimkhur, kala nathumwui naoshinaowui kashakazā sāda yonlu."

²⁵Athumna hānga, "Nana ithumli huikhuihaira. Ithumna ameiwui miktāli lumashankhami samphangranu; ithum Pharaohwui rao ngasāra." ²⁶Chieina Josephna kaphangā kai chi Pharaohli vāra da Egyptli ain sāhaowa, kala chi aja eina tangda kānkhanā leichinga. Pāngmonbingwui lammāng Pharaohwui mangasāthuwa.

²⁷Israelna Egyptwui ngaleili, Goshenwui ngaleili sompama. Athumna chili lan samphanga, kala athei matheida kachungkha mayāsangmihaowa. ²⁸Jacobna Egyptli zingkum tharāda shini ringvai; awui mirin zingkum shākha hangmatida shinina. ²⁹Israelwui athitlam rākhanganai eina, anaomayara Josephli hokhuida hānga, "Ina nawui miktāli lumashankhami samphangkapai kaje, kalikhada nawui pāng iwui khaishāng singda haimilu, kala ili lukhamashan kala khamashit chitheimilu. Ili Egyptli machifahaialu, ^a a v29 Mi akhawui khaishāng singda pāng haimi hi ayā katamwui khangashit sāwui otsak katharana, ngashit chi awui naotunbingtungli hokthanga. ³⁰kha ina ishāvā ngarā eina ngasoda pira. Ili Egyptwui eina khuiphungshoklaga athumwui chikhurli achifahaolu." Josephna hānga, "Nana kahāng athishurda ina sāra."

³¹Jacobna hānga, "Ili ngashitmilu." Josephna ali ngashitmi. Chieina Israelna awui pet akuili kui mashunzanga.