Haokaphok 48

48 ¹Chiwui thili Josephli hānghaowa, "Yanglu, navā kazāhaira." Chieina ana awui naomayara khani, Manasseh eina Ephraimli khuida vāhaowa. ²Jacobli hānga, "Yanglu, nawui naomayara Josephna nawuili rāhaira." Chieina Israelna awui yāng kazipkhuida pettungli ngakarthuida pama. ³Jacobna Josephli hānga, "El Shaddai, ithumwui Pangshap sāshapa Avāna, Canaan ngaleili khalei Luzli ili rāsamphangda somi. ⁴Ana ili hānga, 'Ina nali athei matheimida mataisangmira, kala nali miyur kahakva̱ ngasā ngasakra; kala ngalei hi nawui thili nawui ara̱-azāli katang makhavai shimlui sāda mira.' ⁵Ara, ina hili nawuili marāranglakha eina, Egyptli nali pharākhui nawui naomayara khani chi iwuina. Reuben eina Simeon thada Ephraim eina Manasseh iwui ngasāra. ⁶Kha athumwui thili na pharā naongarā chi nawuina; athum athumwui shimlui alungli achinā ngarāwui aming eina phokra. ⁷Iwui vanga, Paddanwui eina rā tharān Canaan ngaleiwui shongfali Ephrathli mavāshungnāla katāda leilakha, Rachel iwui pheili thihaowa; ina ali apam chili Ephrathwui shongfali chifahaowa" (chiya, Bethlehem).

⁸Israelna Josephwui naomayarabingli thei tharān, ana hānga, "Hibing khipālongkhala?"

⁹Josephna avāva̱li hānga, "Ithumwui Avāna hili ili mikahai iwui naomayarabingna." Ana hānga, "Ili kapona, ina athumli somi khavai iwuili khuirālu."

¹⁰Israelwui mik chi rarhaowui vang ngazanhaida ana kaphā matheirarthuwa. Chieina Josephna athumli awuili rānganai ngasakta, ana athumli maya̱khuida ngavamkhui. ¹¹Israelna Josephli hānga, "Ina namai theikhavai machihānsālakmana; kha ara ithumwui Avāna nawui ara̱-azālila ili yangkhui ngasakhaira." ¹²Chieina Josephna athumli avāva̱wui khuktiwui ngachaili eina khuilui, kala amai ngaleishong hortā kui mashunzanga. ^a a v12 Naongarāli khuktiwui ngachaili haipam chi achālakhawui nao khalattawui naothada khuirumwui khangachā akhana. ¹³Josephna khanini chi khuida, Ephraimli awui yāpang eina Israelwui veipangshong kala Manassehli awui veipang eina Israelwui yāpangshong, athumli awuili rānganai ngasaka. ¹⁴Israelna awui yāpang khangkāda paishova̱ Ephraimwui akuili haida, kala awui veipangva Manassehwui akuili haida, apāng katek ngasaka, kaja Manasseh naochizaina. ¹⁵Chieina ana Josephli somida hānga, "Iwui ishāvā ngarā Abraham eina Isaacna amangāli zatkahai ithumwui Avā, iwui mirin peida aja eina tangda ili homkhame ngasā kahai ithumwui Avā, ^b b v15 Jacobna ithumwui Avāli awui homkhame da phokmi—hi Vārelaili ithumwui Avāli hi aming khare mikahai atamna. Homkhamewui pong hi Sam 23li, Isaiah eina Ezekielli khalei Israelwui Homkhameshong vāshunga, kala khalattali Kaphā Yaokahoma da hāng Jishuli akup samphanga. ¹⁶makaphā katonga eina ili ngatangmi Kazingrao china naoshinaobingli somiranu. Iwui ming kala iwui ishāvā ngarā Abraham eina Isaacwui aming athumli leichingranu; kala athum okathui alungli mi kachungkha ngasā mataisangranu." ^c c v16 Jacobli ngatang Kazingrao chi ithumwui Avā khalattana—awui mirin peida rāsamphangda, ali ngatuka, kala awui khavāk ngasā zat kahai a china.

¹⁷Josephna avāva̱wui yāpang Ephraimwui akuili haikahai chi thei; china ali ning maung ngasakthuwa, chieina Ephraimwui akuiwui eina Manassehwui akuishong horngasaka khavai ana avāva̱wui pāng yonkhui. ¹⁸Josephna avāva̱li hānga, "Chithā maningmana, ishāvā, kaja hina naochizaina; nawui yāpang awui kuitungli hailu."

¹⁹Kha avāva̱na mamayāthuda hānga, "Ina theiya, inao, ina theiya. Anala mi akha ngasāra, anala khareiya ngasāra. Chithālala awui agato ali lāngda reikhameiya ngasāra, kala awui ara̱-azā miyur kachungkha ngasāra." ²⁰Chithang ngalāngda ana athumli somida hānga, "Israelna nawui vang eina somida hāngra, 'Ithumwui Avāna nali Ephraim thāda kala Manasseh thāda ngasakranu.'" Kala ana Ephraimli Manassehwui mangāli parhai. ²¹Israelna Josephli hānga, "Yanglu, I thiki jihaira, kha ithumwui Avāna nali ngasomira kala nali navā ngarāwui lamli khuiungluishitra. ²²Kala nachinā ngarāli lāngda nali, ina iwui raighai eina kala iwui malā eina Amorwui pāng eina khuikahai kaphung shongshan akha mihaira." ^d d v22 Hi "kaphung shongshan" china Shechemwui apamli lā ngasakla, chi tharan Ephraim eina Manasseh shangbingwui alung ngalei ngasakhaora.