እስራኤል ናብ ግብፂ ተበገሰ

እስራኤል ክስውእ ኣብ ቤርሳቤህ ደው በለ፥ ኣቦና ድማ ኣብኡ ተራኸቦ፦ ክትወርድ ኣይትፍራሕ፤ ኣነ ምሳኻ ክወርድ፥ ክመልሰካ ድማ እየ። ቤተ ሰቡ ተቘፅረ፥ ኵሉ ኸዓ ሰብዓ ኮነ፥ ዮሴፍ ድማ ኣብ ክሳድ ኣቦኡ ነዊሕ ጊዜ በኸየ።

ምዕራፍ 46።

እስራኤል ድማ ምስ ኵሉ ዘለዎ ተልዒሉ ናብ ቤርሳቤህ መፀ፤ ነቲ ኣቦኡ ይስሓቅ ዝሰገደሉ ኣቦና ኸዓ ሰውአ።

ኣቦና ድማ ብራእይ ለይቲ ንእስራኤል “ያእቆብ፥ ያእቆብ” ኢሉ ተዛረቦ። ንሱ ኸዓ “እኔኹ” በለ።

ከምዙይ ድማ በለ፦ “ኣነ እቲ ኣቦኻ ዝሰገደሉ ኣቦኻ እየ። ኣብኡ ዓብዪ ህዝቢ ከም እትኸውን ክገብረካ እየ እሞ፥ ናብ ግብፂ ኽትወርድ ኣይትፍራሕ። ኣነ ባዕለይ ምሳኻ ናብ ግብፂ ክወርድ እየ፤ ብርግፅ ድማ ክመልሰካ እየ፤ ዮሴፍ ከዓ ባዕሉ ብኢዱ ኣዒንትኻ ኽዓፅወልካ እዩ።” ^a

ያእቆብ ድማ ካብ ቤርሳቤህ ተልዓለ። ደቂ እስራኤል ከዓ ነቦኦም ያእቆብን ንቘልዑቶምን ንኣንስቶምን፥ በተን ፈርዖን ዝሰደደሉ ሰረገላታት ፀዓኑ። መጓሰኦም ነቲ ኣብ ምድሪ ከነዓን ዘጥረይዎ ንብረትን ወሲዶም፥ ናብ ግብፂ መፁ፤ ያእቆብን ኵሉ እቲ ምስኡ ዝነበረ ዘርኡን።

ኣወዳቱን ደቂ ደቁን ኣዋልዱን ኣዋልድ ደቁን፥ ኵሉ ዘርኡ ምስኡ ናብ ግብፂ ኣምፅአ።

ናብ ግብፂ ዝመፁ ደቂ እስራኤል፥ ያእቆብን ደቁን፥ ስሞም እዚኣቶም እዮም፦ ሮቤል በዅሪ ያእቆብ። ደቂ ሮቤል ድማ፥ ሄኖህ፥ ፈሉስ፥ ኣስሮን፥ ከርሚ እዮም። ደቂ ስምኦን ከዓ እዚኣቶም እዮም፦ ይሙኤል፥ ያሚን፥ ኦሃድ፥ ያኪን፥ ፆሓር፥ ሳኡል ወዲ እታ ከነዓናዊት ሰበይቲ። ደቂ ሌዊ ድማ፥ ጌድሶን፥ ቀዓት፥ ሜራሪ እዮም። ደቂ ይሁዳ ድማ፥ ኤርን ኦውናንን ሴላን ፋሬስን ዛራን እዮም፤ ኤርን ኦውናንን ግና ኣብ ከነዓን ሞቱ። ደቂ ፋሬስ ከዓ፥ ኤስሮም፥ ሓሙል እዮም። ደቂ ይሳኮር ድማ፥ ቶላ፥ ፉዋ፥ ዮብ፥ ሺምሮን እዮም። ደቂ ዛብሎን ድማ፥ ሰረድ፥ ኤሎን፥ ያሕልኤል እዮም። እዚኣቶም ደቂ ልያ፥ ምስ ጓሉ ዲና፥ ኣብ ማእኸል ክልተ ሩባታት ንያእቆብ ዝወለደቶም እዮም፤ ኵሎም ኣወዳቱን ኣዋልዱን ድማ ሰላሳን ሰለስተን ነበሩ።

ደቂ ጋድ ድማ፥ ዚፍዮን፥ ሃጊ፥ ሹኒ፥ ኤስቦን፥ ኤሪ፥ ኣሮዲ፥ ኣርኤሊ እዮም። ደቂ ኣሴር ድማ፥ ዪምና፥ ይሽዋ፥ የሱዊ፥ በሪዓ፥ ሓፍቶም ሳራ እዮም። ደቂ በሪዓ ኸዓ፥ ሔቤር፥ መልኪኤል እዮም። እዚኣቶም ደቂ ዘለፋ፥ እታ ላባ ንጓሉ ልያ ዝሃባ እዮም፤ ንሳ ኸዓ እዚኣቶም ንያእቆብ ወለደትሎም፤ ኵሎም ዓሰርተ ሽዱሽተ ነፍሲ ኾኑ።

ደቂ ራሄል ሰበይቲ ያእቆብ ድማ፥ ዮሴፍ፥ ብንያም እዮም። ምናሴን ኤፍሬምን ድማ ኣብ ምድሪ ግብፂ ካብ ኣስናት፥ ጓል ጶጥፌራ ኻህን ሄልዮት፥ ንዮሴፍ ተወለዱሉ። ደቂ ብንያም ድማ፥ ቤላ፥ ቤኬር፥ ኣስቤል፥ ጌራ፥ ናዕማን፥ ኤሂ፥ ሮሽ፥ ሙፒም፥ ሑፒም፥ ኣርድ እዮም። እዚኣቶም ንያእቆብ ዝተወለዱ ደቂ ራሄል እዮም፤ ኵሎም ዓሰርተ ኣርባዕተ ነፍሲ ኾኑ።

ደቂ ዳን ድማ፥ ሑሺም እዩ። ደቂ ንፍታሌም ድማ፥ ያሕፅኤል፥ ጉኒ፥ ዬፅር፥ ሺሌም እዮም። እዚኣቶም ደቂ ቢላ፥ እታ ላባ ንጓሉ ራሄል ዝሃባ እዮም፤ ንሳ ኸዓ እዚኣቶም ንያእቆብ ወለደትሎም፤ ኵሎም ሸውዓተ ነፍሲ ኾኑ። ካብ ሕቘ ያእቆብ ዝወፁ፥ ናብ ግብፂ ዝመፁ ኵሎም፥ ብዘይ ኣንስቲ ደቂ ያእቆብ፥ ስሳን ሽዱሽተን ነፍሲ ነበሩ። ዮሴፍ ድማ ኣብ ግብፂ ዝተወለዱ ክልተ ኣወዳት ነበርዎ። ኵሎም ናብ ግብፂ ዝመፁ ስድራ ያእቆብ ድማ ሰብዓ ነፍሲ ኾኑ።

ናብ ጌሴም ዝወስድ መንገዲ

ያእቆብ ድማ ንይሁዳ፥ ናብ ጌሴም ዝወስድ መንገዲ ምእንቲ ኸርእዮ፥ ቀቅድሚኡ ናብ ዮሴፍ ሰደዶ፤ ናብ ምድሪ ጌሴም ከዓ መፁ። ዮሴፍ ድማ ሰረገላኡ ኣዳለወ፤ ነቦኡ እስራኤል ክቕበል ከዓ ናብ ጌሴም ደየበ። ኣብ ቅድሚኡ ተገሊፁ ኸዓ፥ ክሳዱ ሓቚፉ ነዊሕ ጊዜ በኸየ። እስራኤል ድማ ንዮሴፍ፥ “ገፅካ ርእየ፥ ንስኻ ገና ብህይወት ከም ዘለኻ ፈሊጠ እየ እሞ፥ ሕዚ እንተ ሞትኩ ይሕሸኒ” በሎ።

ዮሴፍ ድማ ነሕዋቱን ንስድራ ኣቦኡን ከምዙይ በሎም፦ “ክድይብ እሞ ንፈርዖን ከምዙይ ኢለ ክነግሮ እየ፦ ‘እቶም ኣብ ምድሪ ከነዓን ዝነበሩ ኣሕዋተይን ስድራ ኣቦይን፥ ናባይ መፂኦም እዮም። እቶም ሰባት ጓሶት እዮም፥ ናይ መጓሰ ጓሶት ነይሮም እዮም እሞ፤ ኣባጊዖምን ኣብዑሮምን ዘለዎም ዅሉን ኣምፂኦም እዮም።’ ፈርዖን ፀዊዑኩም፥ ‘ስራሕኹም እንታይ እዩ?’ እንተ በለኩም፥ ንስኻትኩም ድማ፥ ‘ኣገልገልትኻ ንሕናን ኣቦታትናን ካብ ንእስነትና ክሳዕ ሕዚ መጓሰ ኣርቢና ኔርና’ በልዎ፤ ከምኡ እንተ ጌርኩም ኣብ ምድሪ ጌሴም ክትቅመጡ ኢኹም፤ ኵሉ ጓሳ ኣብ ግብፃውያን ፀያፍ እዩ እሞ።”