Hebrewnao 7

7 ¹Salemwui awunga, Reikhamataia ithumwui Avāwui pāngmon Melchizedek hina awungabingli yuihaida latkhaung Abrahamli samphanga kala ali sochikata. ²Abrahamna ali saikorawui khum tharāwui akha mi. Awui aming kakhalat, khare, 'khamashung khangarongwui awunga', chiwui thili 'Salemwui awunga', chiya 'chingri kahaiwui awunga' da kakhalatna. ³avā maleila, ava̱ maleila, mi-un lairik maleila, zimikshowui haokaphok maleila lah mirinwui khangachang maleila, kha ithumwui Avāwui Naomayara thāda, ava mashimānda pāngmon sāchinga.

⁴Mipā hina kayākha hakmeikhala da machukkhuilu: yurwui avāva̱ Abrahamna ngaponkakhui otwui khum tharāwui akha ali mi. ⁵Pāngmon ngasā Leviwui naomayarabingli, athumwui achināngarā ngasā mibingla Abrahamwui ara̱-azā ngasāsālala, athumwui eina khum tharāwui akha khuirā khavai ainna ningmi. ⁶Kha ava, athumwui ara̱-azā maninglala, Abrahamwui eina khum tharāwui akha khui kala ngashitmi kahai singtit chili sochikata. ⁷Teokhamei china reikhameina sochikata ngasāhaira kaji chiya ngakaikashi maleimana. ⁸Apam akhali, thikapai mibingna khum tharāwui akha khuisanga; apam khangateili, kharing eina lei da shākhi sakhame akhana khuisanga. ⁹Hithada hāngpai jiakha, khum tharāwui akha khuisang Levina, Abrahamwui mangā eina chi mihaowa, ¹⁰kaja Melchizedekna Abrahamli samphang tharan, ava aruila awui avāva̱wui phasālungli leikasāna.

¹¹Levi pāngmonpam china kākashung mihaisai kaje (kaja chiwui azingli mibingna ain phāhai), khisāda Aaronwui thili maphokkhamea, Melchizedekwui thili kazang pāngmon khangatei akha darkar leihao? ¹²Kaja pāngmonpam khangachei tharan, ainla khangachei phalungra. ¹³Kaja tui hibing hāngkhami kajipa china shang khangateiwui zanga, chiwui eina khipānakha hanphutli otram matha̱lakmana. ¹⁴Ithumwui Proho hi Judahwui eina kharā kaji hi tharlak eina theihaira; shang chiwui pāngmonbingwui pongli Mosesna khikha mahāngmimana. ¹⁵Kala Melchizedekwui khangachā eina pāngmon khangatei akha shok tharan, hi kayākha mataisang phongshokhaowa, ¹⁶ava phasāwui ara̱-azā ainwui eina pāngmon sākahai maningmana, kha makashimān kharingwui pangshap eina sākahaina.

¹⁷Kaja awui vang hithada shākhi mihaira, "Na Melchizedek thada katang mavaila pāngmon china."

¹⁸Kharewui ningkhami akha chi awui khangazan kala kaphā maleiwui vang eina horngasakhaira. ¹⁹Ainna khikha kāshung ngasakmana; kha mathākhamei kachihān akha zathaira, chiwui mangā eina ithumna ithumwui Avāli rānganaira. ²⁰Hi tuingashit maleila shokkahai maningmana, kaja kateibingna tuingashit maleila pāngmon sāhaowa,

²¹kha ana tuingashit eina ngasoda pāngmon sāhaowa, ali hāngkahai chiwui mangā eina: "Ithumwui Avāna ngashithaira, kala awui ning mangacheimara, 'Nala katang mavaila pāngmon akha ngasāchingra.'" ^a a v21 Tuingashit chi 'hāngkahaia' chi ithumwui Avāna, ana Jishuwui katang mavai pāngmonpam sākahaina. Psalm 110 hi Kadhara Tuingashit alungli kachungkhashida shukkhui kahai psalmna—shukkhui saikorana Jishuli chitheina.

²²Chithada sāda, Jishuna mathākhamei tuingashit akhawui nganingkhame ngasāhaira.

²³Kharewui pāngmonbing chi kachungkhana, kaja kathina athumli otpamli mayonching ngasakmana, ²⁴kha ana katang mavaila leichingki vang, awui pāngmonpam makhangachei singtita. ²⁵Chiwui vang eina, ali ngasoda ithumwui Avāli kharābingli ana peichaoda huimishapa, kaja athumwui vang nganingmi khavai ana atam kachida ringchingda lei.

²⁶Chikathā pāngmon kharei akha ithumwui vang phāmei kahaina: kathara, shāt makā, makhamang, morei kaphungbing eina ngatei kahai, kala kazingramwuitungli mai kāngasak kahaina. ²⁷Chi pāngmon khareibing kathā maningla, ana khare eina awui khalattawui morei vang, chiwui thili mibingwui vang thangkachida pha̱kaphayā ot sākhavai maleimana; kaja ana a khalatta chigatkhami china akhashida hi sāhaira. ²⁸Ainna khangazan mibingli pāngmon kharei kapangkhui, kha ainwui naolak eina rā kahai tuingashitwui tui china, katang mavaila kāshung ngasak kahai Anaomayarali kapangkhui.