Melkizedek Zute Ebraham

Melkizedek pụtara nʼJenesis, onye nchụàjà nke Nna anyị Onye Kachasị Elu, gọzie Ebraham ma nara otu ụzọ nʼime iri, onye na-ede akwụkwọ wee wuo nʼelu ya: ọrụ nchụàjà kara nke Livaị nká ma dị nʼezí ya. Ebe ọrụ nchụàjà na-agbanwe, iwu na-agbanwekwa ya. Onye nchụàjà a na-adị ndụ mgbe niile ịrịọrọ anyị arịrịọ.

Isi 7.

Melkizedek a, bụ eze Salem na onye nchụaja nke Nna anyị Onye kachasị elu, zutere Ebraham mgbe ọ na-alọta site nʼimeri ndị eze ahụ, ma gọzie ya. Ebraham nyere ya otu ụzọ nʼụzọ iri nke ihe niile. Aha ya pụtara, nke mbụ, eze ezi omume, emesịakwa, eze Salem—nke pụtara eze udo. O nweghị nna, o nweghị nne, o nweghị usoro ọmụmụ, o nweghị mmalite ụbọchị maọbụ ọgwụgwụ ndụ, kama dịka Ọkpara Nna anyị, ọ na-anọgide bụrụ onye nchụaja ruo mgbe ebighị ebi.

Chee echiche otú nwoke a si dị ukwuu: Ebraham, bụ nna ochie ahụ, nyere ya otu ụzọ nʼụzọ iri nke ihe nkwata nʼagha. Ụmụ Livaị ndị na-aghọ ndị nchụaja, iwu nyere ha nʼiwu ka ha nakọta otu ụzọ nʼụzọ iri nʼaka ndị mmadụ—bụ ụmụnne ha—ọ bụ ezie na ha onwe ha sitekwara nʼagbụrụ Ebraham. Ma ọ bụ ezie na o sighị nʼagbụrụ ha, o weere otu ụzọ nʼụzọ iri site nʼaka Ebraham ma gọzie onye ahụ nwere nkwa ndị ahụ. O doro anya na-enweghị arụmụka ọbụla na onye dị nta na-anata ngọzi site nʼaka onye dị ukwuu. Nʼotu akụkụ, ọ bụ ndị mmadụ na-anwụ anwụ na-anata otu ụzọ nʼụzọ iri; ma nʼakụkụ nke ọzọ, ọ bụ onye a gbara ama na ọ dị ndụ. Mmadụ nwere ike ọbụna ikwu na Livaị, bụ onye na-anata otu ụzọ nʼụzọ iri, kwụrụ ya site nʼaka Ebraham, nʼihi na ọ ka nọ nʼime ahụ nna nna ya mgbe Melkizedek zutere Ebraham.

Ọ bụrụ na ọkwa nchụaja nke ndị Livaị wetara izu oke—ndị mmadụ natara iwu nʼokpuru ya—gịnị mere e ji chọọ onye nchụaja ọzọ, onye dịka usoro Melkizedek, nke a na-adịghị akpọ dịka usoro Erọn? Nʼihi na mgbe ọkwa nchụaja gbanwere, iwu aghaghịkwa ịgbanwe. Nʼihi na onye a na-ekwu ihe ndị a banyere ya si nʼebo ọzọ, ebo nke onweghị onye sitere na ya jeere ozi nʼebe ịchụ aja. O doro anya na Onyenwe anyị sitere na Juda; Mosis ekwughị ihe ọbụla banyere ndị nchụaja si nʼebo ahụ. Nke a na-apụtakwa ìhè karịa mgbe onye nchụaja ọzọ bilitere nʼụdịdị Melkizedek, onye ghọrọ onye nchụaja, ọ bụghị site nʼiwu nke ọmụmụ anụ ahụ kama site nʼike nke ndụ a na-apụghị imebi emebi.

Nʼihi na e gbara ama banyere ya, sị, “Ị bụ onye nchụaja ruo mgbe ebighị ebi, nʼusoro Melkizedek.”

Nʼotu akụkụ, e wepụrụ iwu mbụ ahụ nʼihi adịghị ike ya na enweghị uru ya. Iwu emeghị ka ihe ọbụla zuo oke; ma e webatara olileanya ka mma, nke anyị ji abịaru Nna anyị nso. Nke a abụghị ihe na-enweghị ịṅụ iyi, nʼihi na ndị ọzọ ghọrọ ndị nchụaja na-enweghị ịṅụ iyi,

ma ọ ghọrọ onye nchụaja site nʼịṅụ iyi, site nʼaka onye ahụ gwara ya, sị: “Nna anyị aṅụọla iyi, ọ gaghịkwa agbanwe obi ya, ‘Ị bụ onye nchụaja ruo mgbe ebighị ebi.’” ^a

Nʼotu ogo ahụ, Jisọs aghọọla onye nkwenye nke ọgbụgba ndụ ka mma.

Ndị nchụaja mbụ ahụ dị ọtụtụ, nʼihi na ọnwụ gbochiri ha ịnọgide nʼọkwa ha, ma ọ na-ejigide ọkwa nchụaja ya kpamkpam, nʼihi na ọ na-adịgide ruo mgbe ebighị ebi. Ya mere ọ pụrụ ịzọpụta nke zuru oke ndị na-abịakwute Nna anyị site na ya, ebe ọ na-adị ndụ mgbe niile ịrịọ arịrịọ nʼihi ha.

Onye dị otú ahụ bụ onyeisi nchụaja dabaara anyị: onye dị nsọ, onye na-enweghị ịta ụta, onye na-enweghị ntụpọ, onye e kewapụrụ site nʼebe ndị mmehie nọ, onye e buliri elu karịa eluigwe niile. Nʼadịghị ka ndịisi nchụaja ndị ahụ, ọ dịghị mkpa ka ọ na-achụ aja kwa ụbọchị—nke mbụ nʼihi mmehie nke aka ya, emesịa nʼihi nke ndị mmadụ—ebe o mere nke a otu mgbe maka mgbe niile, mgbe o ji onwe ya chụọ aja. Iwu na-ahọpụta ndị ikom na-adịghị ike ka ha bụrụ ndịisi nchụaja, ma okwu nke ịṅụ iyi ahụ, nke bịara mgbe iwu gasịrị, na-ahọpụta Ọkpara ahụ, onye e mere ka o zuo oke ruo mgbe ebighị ebi.