Hebrewnao 6

6 ¹Chiwui vang eina, Khristawui pongli haokaphokwui tamkachithei chi ithumna chihohailaga, matuishong tāusa; thikahai otwui eina ning ngatei kala ithumwui Avāli shitkasang chiwui shimphunga latluida masākāluila, ²hi ra̱kahikbingwui pongli tamkachithei, pāng parrorda, kathiwui eina ringshok, kala katang makhavai bichar chiwui pongli tamkachithei china. ³Kala ithumwui Avāna mayāmiakha, ithumna hi sāra. ⁴Kaja khareli kahor samphang kahaibing, kazingramwui lemmet mazap kahaibing, Manglā Katharali ngarum kahaibing, ⁵kala ithumwui Avāwui tui khamathā, kala aruihonwui thotwui pangshapbing mazap kahaibing, ⁶kala yāmser kahaibingli, ning ngateili latluida khuisangluipaikhavai masāpaimana; kaja athumna ithumwui Avāwui Naomayarali latluida krushli shaoshānda, akhalattali sākashi sāda, ali phongda mana̱shida maikashi sāhaira. ^a a v6 "ithumwui Avāwui Naomayara" chi Bible khangateibingna "Varewui Naomayara" da kapiki chi hina — Kathara tuina Vareli Khristawui eina ngapaida chithei tharan, "Vare" da kapiki chi Avāna. ⁷Chiwuitungli ra̱ra̱ ro kahai zingrot khamanga, kala lui khavābingwui vang kānnai heiun ungngasaka ngalei china ithumwui Avāwui eina sokhami samphanga. ⁸Kha ka̱shāt kala kuivā shokakha, chi aremana, khonshi nganaihaira, kala naolak eina meili thāhaora.

⁹Kha nathumwui pongli, leikashebing, ithum chithāda matuilala, huikhamili ngarum phāmei otbing chi ithumna shitsangchaowa. ¹⁰Kaja ithumwui Avā chi makhangaronga maningmana. Nathumwui ot, kala aruila nathumna ithumwui Avāwui mibingli otram ngatha̱ching, awui mingli nathumna chithei kahai leikashi chi, ana malaimara. ¹¹Ithumna nathum ava̱va̱na khanao eina tangda kachihānwui hakkhamahā ngashitmi samphang khavai, chithākha mathānthup chitheiki chi sāngai, ¹²chithāda nathum chāngshe masāla, kha shitkasang kala khāngkathei mangā eina ngashitmi kahai samkaphangbing chi tamkhuiphalungra.

Avāwui Abrahamli Tuingashit

¹³Kaja ithumwui Avāna Abrahamli ngashit kahai tharan, awuitungli reikhameia mi khipākha maleilakla, ana akhalattali mingzaida ngashit sai,

¹⁴hānga, "Ina nali kachangkhat eina somira kala kachangkhat eina mataisangmira."

¹⁵Chieina Abrahamna ning nganungkhung eina ngaraipamda, ngashit kahai chi samphanga. ¹⁶Mibingna athumtungli reikhameia mili mingzaida ngashit sai, kala khangashit china ngapai khangarok saikora kupngasaka. ¹⁷Ithumwui Avāna ngashitmi kahai chiwui shimluikatbingli, awui kharin machanchingra kaji kayākha tharlak eina theingasakngaida, khangashit eina nganingkhuihaira, ¹⁸chiwui vang eina, ithumwui Avāna makapikwui mangacheikapai ot khani chiwui mangā eina, ngayin khavai yāmsang kahai ithumna ithumwui mangāli haikahai kachihān chi singtit khavai kapanga kasatkasang samphangra. ¹⁹Kachihān hi manglāwui vang huikazat, khamayona kala ngasaka, mairār alungshong khalei alunga kāli kazang kahaina, ^b b v19 'mairār' hi kachonshim alungli ayār kayāngbing chi Tharmathengmeikap kaje Apam eina ngatei ngasak kahai mairārna — chiya Varewui mangā khalei alunga kā kharei china. ²⁰chili Jishuna ithumwui vang, ithum rida vākhala sāda azanga, Melchizedek kathā katang mavaila Pāngmon Kharei sāchinghaowa. ^c c v20 Melchizedek hi Genesis 14wui eina rāda matheirar kahai pāngmon-awunga akhana; kagapipana chapter 7li ngarithi hi khare khanao sāda tamtharāhaira.