Hebrewnao 5

5 ¹Mikumowui lungli eina khuikahai Pāngmon Kharei kachiva̱ hi mibingwui vang ithumwui Avā aponglina, moreiwui vang kachigat kala pha̱kaphayā chigatkhavai kapangkasangna. ²Ana makatheibing kala ma̱zatabingli khanim eina khayāng samphanga, kaja a khalattala ngazan eina khaleina. ³Ngazan hiwui vang eina ana mibingwui vang thada a khalattawui vangla moreiwui vang pha̱kaphayā chigatphalungra. ⁴Khipānakha hi khayākakā a khalattawui vang makhuimana; Aaronli hokakhui thāda ithumwui Avāna hokakhui mina chi samphanga.

⁵Chithada sāda Khristanala Pāngmon Kharei sākhavai a khalatta tekmatei ngasakmana, kha ali hithada hāngmi chinana: "Na iwui Naomayarana; aja zimiksho ina na avāva̱ ngasāhaira."

⁶Chithada, apam khangateilila ana hānga, "Na Melchizedek thada katang mavaila pāngmon china." ^a a v6 Melchizedek, Abrahamli sormi pāngmon-awunga (Gen 14:18–20); awui haokaphok lah akhavai shānkahai maleila, Khristawui katang makhavai pāngmon otwui aka̱lā akhana.

⁷Jishu okathui hili ringlakha, panglāk eina vaoda kala chāra̱ eina, kathiwui eina ali huimishapa a chili seihā kasā kala kapo chigata; kala awui khangachee chiwui vang eina shāmihaira. ⁸Ana Naomayara sālala, awui kakhanang samphang chiwui eina kahāng khanganā tamkhuiya. ⁹Kala kāshungchao ngasak kahai eina, ali kahāng nganā mi kachiva̱li katang makhavai huikhamiwui ura̱ ngasāhaira, ¹⁰ithumwui Avāna Melchizedek thada Pāngmon Kharei sāda kapang kahaina.

Seina̱ lah Zāt Khamarar

¹¹Hi chiwui pongli ithumna hāngkhavai kachungkha lei, kha hāngchithei khavai kharar, kaja nathumwui khanā shākhavai ngazanhaira. ¹²Kaja aruilakha nathum ojā ngasāphalungra sālala, ithumwui Avā tuiwui haokaphokwui tamkachithei chi khangatei akhana nathumli tamchitheiluishit khavai darkar leiya. Nathum seina̱ darkar leipinghaira, zāt khamarar maningmana. ¹³Seina̱ mang mi kachiva̱na khamashung khangarong tuili kashap maleimana, kaja a angangnao china. ¹⁴Kha zāt khamarar chi khararnaobingwui vangna. Athumwui ning chi kaphā eina makaphā theikhavai atam kachida otsak eina tamchithei kahaina.