Onouei Jungeibü Ungshedbou che
Thükkabü ungshedbou pendou hao lolo takettibü aying, lausikei seneibü Bouei taketbü ki, hoba hao lolo tokei hau akibü phela kubü aishanga, mütshuong to onouei jungeila khamda. Khrista kho tegütham taketbü kikei, hoba haoei haibü khonkua ngüha lebü ngean apbei. Kheijinei maangkaangbüei chühletkei: tou kan leilubü shuong yeiti ong, lausikei khantoje kan milka khünda.
5 1Thükkabü ungshedbou pendou mütshuong yoka taketan, Bou kümsilei danko, shabü shanga jongsak hoba lembü lemla shanga, mütshuong shanga pienda. 2Haoei angekebü hoba lam maan paibü shuong to onouei jungeila thükda, aishanga hao lolo tokei hau akibü phanga ki. 3Ho hau akibü hangshong, haoei hao lolo shanga lai mütshuong shanga tegü, shabü shanga lembü lemla pienda. 4Aoeikei ho nyenhang hao lolo shanga ataketlabü, lausikei Aron tegütham Bouei ngalaje ong taketlabü.
5Kho tegütham Khristaei thükkabü ungshedbou yeila shanga hao lolo asoneikangti, lausikei hao to hibü laubou soneikangtikei, “No kü Shou ki; tat ngo ka no pakkei.”
6Haoei lubü danaje tokei lauda, “No Melkhizedek lam tegü, ponpen thon akiko ungshedbou ki.” a a v6 Melkhizedek, Abraham haükubou ungshedbou choba che (Gen 14:18–20); haoeibü khangshang ayingsi thonbü laishiba ka aki, Khrista ponpen ungshed kümsilei süngsilop che ki.
7Hao kaodaka langbü jihsiphaia, Jisuei haibü ka hao khümenla thükbou to, ngüh kaangbüei haapbo hoba nyeksi yoa, welau hoba subüjabü lembei; hoba haoeibü Mühghaü to souhatbü hangshong hao la ditkukei. 8Hao Shou ki yingasikei, haoei hao aaobü shuong ka ngüha lebü ngean apbei. 9Hoba penan souan yeian, haoei hao to ngüha lebü shuong pendou la thon akibü khümenbüeibü tang yeikei, 10Bouei hao Melkhizedek lam tegü thükkabü ungshedbou yeitikei.
Sendei Ayingsi Shausiyung Yaangbü
11Ho shangabü künei lenlabü aei kia, hoba wanenkula yaangbü, aishanga kaneibü ditbü yuian kikei. 12Aishanga toukei kan lenbou yeijan yingasikei, Bou ngüheibü khangshang shuong kan to lai lentibou che kanei khamda. Kanei sendei khambü la yeia, shausiyung yaangbü aying. 13Sendei shauko langbü aoyou pendou, saopobü ngüh danko songadoa akitei, aishanga hao senyopbü ki. 14Lausikei shausiyung yaangbü kho inthonbü shuongeibü ki, haoeneibü sensimaang kho maibü si amaibü kanglanga lulu ngela shanga kümkümbüei leiyenbü kikei.
