ዕብራውያን 5

5 ¹ከሰዎች መካከል የተመረጠ ሊቀ ካህናት ሁሉ፣ ስለ ኀጢአት መባንና መሥዋዕትን ያቀርብ ዘንድ፣ ከአባታችን ጋር በተያያዙ ነገሮች ስለ ሰዎች ይሾማል። ²እርሱ ራሱ ደግሞ ለድካም የተገዛ ስለ ሆነ፣ ለማያውቁትና ለሚስቱት በረጋ መንፈስ ሊይዝ ይችላል። ³ከዚህ ድካም የተነሣ፣ ለራሱ እንደሚያቀርብ ሁሉ ለሕዝቡም ስለ ኀጢአት መሥዋዕት ማቅረብ ይገባዋል። ⁴ይህን ክብር ማንም ለራሱ አይወስድም፤ ነገር ግን እንደ አሮን በአባታችን በተጠራ ጊዜ ብቻ ነው።

⁵እንዲሁም ክርስቶስ ሊቀ ካህናት ሊሆን ራሱን አላከበረም፤ ነገር ግን፣ “አንተ ልጄ ነህ፤ ዛሬ እኔ ወልጄሃለሁ” ያለው እርሱ አከበረው።

⁶በሌላም ስፍራ ደግሞ እንዲህ እንደሚል፦ “አንተ እንደ መልከ ጼዴቅ ሥርዐት ለዘላለም ካህን ነህ።” ^a a v6 መልከ ጼዴቅ፣ አብርሃምን የባረከ ካህንና ንጉሥ (ዘፍ 14፥18-20)፤ የተመዘገበ መጀመሪያም ሆነ መጨረሻ የሌለው፣ የክርስቶስ የዘላለም ክህነት ምሳሌ ነው።

⁷ኢየሱስ በምድራዊ ሕይወቱ ዘመን፣ ከሞት ሊያድነው ወደሚችለው አካል በታላቅ ጩኸትና በእንባ ጸሎትንና ልመናን አቀረበ፤ ፈሪሃ እግዚአብሔርም ስለ ነበረው ተሰማለት። ⁸ምንም እንኳ ልጅ ቢሆንም፣ ከተቀበለው መከራ መታዘዝን ተማረ። ⁹ፍጹምም ከሆነ በኋላ፣ ለሚታዘዙት ሁሉ የዘላለም ድነት ምንጭ ሆነ፤ ¹⁰በአባታችንም እንደ መልከ ጼዴቅ ሥርዐት ሊቀ ካህናት ሆኖ ተሾመ።

ወተት ወይስ ጠንካራ ምግብ

¹¹ስለዚህ ጒዳይ የምንናገረው ብዙ ነገር አለን፤ ነገር ግን ለመስማት ዳተኞች ስለ ሆናችሁ ለማስረዳት የሚከብድ ነው። ¹²እስካሁን አስተማሪዎች ልትሆኑ የሚገባችሁ ብትሆኑም፣ የአባታችንን ቃል መሠረታዊ ነገሮች እንደ ገና የሚያስተምራችሁ ሰው ያስፈልጋችኋል። ጠንካራ ምግብ ሳይሆን ወተት የሚያስፈልጋችሁ ሆናችኋል። ¹³በወተት የሚኖር ሁሉ ሕፃን ስለ ሆነ፣ በጽድቅ ቃል የተካነ አይደለም። ¹⁴ጠንካራ ምግብ ግን፣ መልካሙንና ክፉውን ለመለየት ስሜታቸው በተግባር የለመደ ለጎለመሱ ሰዎች ነው።