Sung Bazaangnu le Bachamnu Tako
Tako rwan ga bani bahak na ka thang makka ani Pa na kou thang nge, khatle sonnu le bacham ong briakpina sung bazaangnu le bacham ngamme. Christa na le hadanga kou thangnu ga ong rwe, khatle Bating riangre kananu bina chong zeinu ding bachu rwe. Atiga chap ga balung pwannu chong le han loi rwe: atun tangnu bi nani bachu thang mi tonu dou ngaake, atiyeda haba lu bi nani khou naosen om chaam dou ngaake.
Ani Pa na chongkhak hei bing bi kabia nge 5–6
5 1Mi nun lak pina lou swaknu takolu pumza ani Pa lang bing bi mi nun lang som thang nge, noh lang leithwan khatle rikhaang pot kat lang. 2Maanna thei maknu khatle lampui semaannu nun ding sung bazaangnu le bacham ngamme, balangbe Maan Bahak le sonnu thwei bi ongnu briakpina. 3Heiba sonnu briakpina, maanna bazan lang danga mi nun lang le noh lang rikhaang pot kat lang nge. 4Tudannuna le heiba lwat ding bazan lang lou make, atiyeda Aaron danga ani Pa na kou thangnu mi khatchana lousuwe.
5Hadanga Christa na le takolu toga Bazan lwat pi lian mak ngaake, atiyeda Bakhou hadanga rinnu Maan na Bating lwat pi lian thang rwe, “Nang Asa Kapaisa gaye, aniya Nating Eina pon thang rwe.”
6Bathang riak khat bi le Maanna hadanga rinne, “Nang Melchizedek na to damnu chaang bi khwa sei Takowe.” a a v6 Melchizedek, Abraham ding kadouga rithoi pi thangnu tako khatle krwang (Gen 14:18–20); baom baphut le bathan le hiak thang am maknu, Christa om khwa seinu takosei lang kakhan sanu gaye.
7Jisu Misa pum nung suiga ongnu kaan bi, Bating thinu bina kan thang ngamnu Maan khou, baraam basaangga paonu khatle mikthi taga kalum khatle ninu bing pi swak rwe, khatle Bating Rikrwang ding kachinu briakpina ngaisu thang rwe. 8Maan Sa Kapaisa ga ong peida, Maanna khaang damnu bina chong zeinu ding bachu rwe. 9Khatle Maan khopsaga to thangnu kaan bi, Bating chong zeinu mi nun bing lang ringzoknu ringriak om phutphang ga to thang rwe, 10Maan ani Pa na Melchizedek na to damnu chaang bi takolu toga som thang rwe.
Sen Kanu Tui ngaakle Kanatnu Thaisaak ngaakle
11Hei lang bi anina rin lang chong tam amme khatle rin chui thang lang le hoi make, balangbe nani kana ngaisunu mun thang rwe. 12Balangbe atun hakna nani bachu thangnu rwan to lang nge peida, ani Pa om chong om baphut bing ding nani khou pi lat bachu thang lang mi khat nani lang bathaang amme. Nani sen kanu tui bathaang amnu to rwe, thaisaak kanatnu make. 13Tudannu sen kanu tui inluga ringnu maan ga ririak senu chong bi theinu ngam make, balangbe maan naosen ga ye. 14Atiyeda kasanu khatle kasianu tamphaang lang chwan to damnu bina bani sensaak bing talen thang ongnu mipu phanu mi nun lang ga thaisaak kanatnu gaye.