Atun Tangga Han Ongnu Basaknu
Bataang la karen thang damnu lo basaknu ga atun tangga han ongme, haga ga lian takka chong gaye, balangbe haba chongren ga Joshua le bachamga kakham mak ngaake briakpina. Haba nung bi mi tamna theinu phaang batanu kani hung nge: ani Pa om chong ga katha le ringriak om bati ta thangluga pot pum ding laak thangnu, khatle ani danga tam thangnu Thiamting Kataknu khat, atibriakpina anina raangga paang thangnu ngam nge.
Ani Pa na chongkhak hei bing bi kabia nge 3, 5, 7
4 1Baom basaknu bi khut lang chongren ga atun tangga han ongme briakpina, nani lak pi pakhatchanale haba lou ngam mak ngaake diga mu mak lang ani cheksin ding ngo. 2Bani danga ani khou le sacham ga kasam thang ngaake. Atiyeda bani ngaisu damnu chong gana bani lang khatchale tong mak ngaake, balangbe ngaisu damnu nun danga banina haba ga balumsanu le pi khatcha mak ngaake briakpina.
3Balumsa damnu anina haba lo basaknu bi khut nge, Maanna rin damnu danga, “Eina Abalung pwanga karen thang damme, Bani ga Aom lo basaknu bi ga khutlaye.” Atiyeda talei ram dam baleina Baom chwan to bing nga loi ngaak rwe.
4Balangbe siarinu ni lang bi bariak khat pi Maanna atiga rinne, “Atiga ani Pa gana siarinu ni bi Baom chwan to bing khangsung khouna basak rwe.”
5Atiga haba chong khat pi Maanna rin late, “Bani ga Aom lo basaknu bi ga khutlaye.”
6Mi kasemna haba bi khut lang han ongnu briakpina, khatle kama katakka sacham lousu damnu nun bani om chong zei maknu riak pina khut ngam mak ngaake briakpina,
7Maanna atiga ni khat, “Aniya,” diga sem late, bataang la David paan bina rinluga, kama rin dam ngaaknu danga, “Aniya Bakhwan ga nanina ngai swaknuwe dabe, nani sung ding nat mako.”
8Balangbe Joshua na bani ding basaknu pi thang dam dabe, ani Pa gana bataang la ni katei lang bi rin lat laye. 9Atibriakpina, ani Pa om mi bing lang Sabbath basaknu khat han ongme. 10Tudannu ani Pa om basaknu bi khut damnu maan gana, ani Pa gana Bakhouza chwan to khouna basak damnu danga, Baom chwan to bing khouna le basak rwe. 11Atibriakpina haba basaknu bi khut lang ani rakanga karamzo, pakhatchanale hei dannu chong zei maknu chwan to paan bina ket basui lat mak lang.
12Balangbe ani Pa chong gabe ring ongme khatle chwan ong nge, balem kani amnu kachaak chem khangsung khouna le kangai zia nge, katha le ratha, ren khatle sarui sung ding pi kasem lang sui phao nge, khatle sung om baning thou khatle sung bi lan bing ding kakhanne. a a v12 “Ani Pa chong” gana “Rikrwang chong” ding le rwe — Bathiangnu chongdip gabe Basa rwan om baning thou bingza theinu Pa om ringnu khwan gaye. 13Bachaat pakhatchanale Bamikphaang bina inkam thangnu make; anina chong katak ding gaye diga Maan om mik meithaan bi pot bingza naket khatle indao swakka amme.
14Atibriakpina tambaan bing se phao damnu tako kaliannu khat—Jisu, ani Pa om Sa Kapaisa—ani ding amme briakpina, ani rin indaonu balumsat ga tipka choizo.
Jisu, Ani om Tako Kaliannu
15Ani om soinu bing bi ani le diga basung dou ngam maknu tako kaliannu ani ding amnu make; atiyeda rim rim bi ani danga tamphaang damnu, atiyeda noh khatchale to maknu tako kaliannu khat ani ding amme. 16Atibriakpina ani phaangkriang om krwang takung kim bi sung raangga nai hungzo, dinuba ani phaangkriang lousuluga, bathaang amnu kaan bi ani ding paang thangnu phaangkriang ga lousu lang naye.