نرمي سان پيش ايندڙ ڪاهن

ڪاهن پاڻ کي چونڊڻ بدران اسان جي پيءُ طرفان مقرر ٿين ٿا، ۽ نرم ٿي سگهن ٿا ڇاڪاڻ ته اهي به ڪمزوريءَ ۾ شريڪ آهن. مسيح به ساڳيءَ طرح مقرر ٿيو، ۽ جيڪي ڏک هن سٺا انهن مان فرمانبرداري سکي. پوءِ باب مايوسيءَ ۾ ٽٽي پوي ٿو: هن وقت تائين توهان کي سيکارڻ گهرجي ها، پر بدران توهان کي کير جي ضرورت آهي.

اسان جو پيءُ آيتن ۾ ڳالهائي ٿو 5–6

باب 5.

ماڻهن مان چونڊيل هر سردار ڪاهن ماڻهن لاءِ اسان جي پيءُ سان واسطو رکندڙ معاملن ۾ مقرر ڪيو وڃي ٿو، تہ جيئن هو گناهن لاءِ نذرانا ۽ قربانيون پيش ڪري. هو اڻڄاڻن ۽ ڀُلجي ويلن سان نرمي ڪري سگھي ٿو، ڇاڪاڻ تہ هو پاڻ بہ ڪمزوريءَ ۾ مبتلا آهي. انهيءَ ڪمزوريءَ سبب کيس لازم آهي تہ جيئن ماڻهن لاءِ تيئن پنهنجي لاءِ بہ گناهن جون قربانيون پيش ڪري. ڪوبہ هيءَ عزت پنهنجي لاءِ نہ ٿو وٺي، پر رڳو تڏهن وٺي ٿو جڏهن اسان جي پيءُ طرفان سڏيو وڃي، جيئن هارون سڏيو ويو هو.

ائين ئي مسيح پاڻ کي جلوو ڏيئي سردار ڪاهن نہ بڻايو، بلڪ انهيءَ بڻايو جنهن کيس چيو تہ ”تون منهنجو فرزند آهين؛ اڄ مون تو کي جنم ڏنو آهي.“

جيئن هو ٻئي هنڌ بہ فرمائي ٿو تہ ”تون ملڪيصدق جي طريقي موجب هميشه لاءِ ڪاهن آهين.“ ^a

پنهنجي دنياوي حياتيءَ ۾ يسوع انهيءَ کي، جيڪو کيس موت کان بچائي سگھندو هو، وڏي واڪي رڙيون ڪري ۽ ڳوڙها ڳاڙي دعائون ۽ التجائون پيش ڪيون، ۽ سندس خدا ترسيءَ سبب سندس ٻڌي وئي. جيتوڻيڪ هو فرزند هو، تڏهن بہ جيڪي ڏک سهيائين تن مان فرمانبرداري سکيائين. ڪامل ٿيڻ کان پوءِ هو سندس فرمانبرداري ڪندڙ سڀني لاءِ دائمي نجات جو سبب بڻيو، ڇاڪاڻ تہ اسان جي پيءُ کيس ملڪيصدق جي طريقي موجب سردار ڪاهن مقرر ڪيو هو.

کير يا سخت کاڌو

انهيءَ بابت اسان وٽ گهڻو ڪجھ چوڻ لاءِ آهي، پر سمجھائڻ ڏکيو آهي، ڇاڪاڻ تہ اوهان ٻڌڻ ۾ سست ٿي پيا آهيو. جيتوڻيڪ هينئر تائين اوهان کي استاد ٿيڻ گھرجي ها، تڏهن بہ اوهان کي وري ڪنهن جي ضرورت آهي جيڪو اوهان کي اسان جي پيءُ جي ڪلام جا بنيادي سبق سيکاري. اوهان کي کير جي ضرورت ٿي پئي آهي، سخت کاڌي جي نہ. جيڪو بہ کير تي گذارو ڪري ٿو سو سچائيءَ جي ڪلام ۾ مهارت نہ ٿو رکي، ڇاڪاڻ تہ هو ننڍڙو ٻار آهي. پر سخت کاڌو پختن لاءِ آهي، جن جا حواس مشق سان چڱي ۽ بڇڙي کي پرکڻ لاءِ سڌريل آهن.