Gẹnẹsisi 40

40 ¹Lẹ́yìn nǹkan wọ̀nyí, agbọ́tí àti alásè búrẹ́dì ọba Ejibiti ṣẹ̀ sí olúwa wọn, ọba Ejibiti. ²Inú Farao sì bí gidigidi sí àwọn ìjòyè rẹ̀ méjèèjì, olórí àwọn agbọ́tí àti olórí àwọn alásè búrẹ́dì. ³Ó sì fi wọ́n sí àtìmọ́lé ní ilé olórí àwọn ẹ̀ṣọ́, túbú tí a ti fi Jósẹ́fù sí. ⁴Olórí àwọn ẹ̀ṣọ́ sì yan Jósẹ́fù láti máa sìn wọ́n; wọ́n sì wà ní àtìmọ́lé fún ọjọ́ díẹ̀. ⁵Nígbà náà, àwọn méjèèjì, agbọ́tí àti alásè búrẹ́dì ọba Ejibiti, tí a fi sẹ́wọ̀n nínú túbú, ẹnìkọ̀ọ̀kan lá àlá ní òru kan náà, àlá kọ̀ọ̀kan sì ní ìtúmọ̀ tirẹ̀. ⁶Nígbà tí Jósẹ́fù dé ọ̀dọ̀ wọn ní òwúrọ̀, ó rí i pé inú wọn kò dùn. ⁷Ó béèrè lọ́wọ́ àwọn ìjòyè Farao tí ó wà pẹ̀lú rẹ̀ ní àtìmọ́lé ní ilé olúwa rẹ̀ pé, “Èéṣe tí ojú yín fi fàro lónìí?”

⁸Wọ́n sì wí fún un pé, “Ẹnìkọ̀ọ̀kan wa ló lá àlá, kò sì sí ẹni tí yóò túmọ̀ rẹ̀.” Jósẹ́fù sì dáhùn pé, “Ṣé kì í ṣe ti Baba wa ni àwọn ìtúmọ̀? Ẹ jọ̀wọ́, ẹ sọ wọ́n fún mi.” ^a a v8 Jósẹ́fù pe Baba wa ní orísun gbogbo ìtúmọ̀ tòótọ́ — àní fún àwọn ará Ejibiti tí wọn kò mọ̀ ọ́n.

⁹Olórí àwọn agbọ́tí sì sọ àlá rẹ̀ fún Jósẹ́fù pé, “Nínú àlá mi, àjàrà kan dúró níwájú mi. ¹⁰Àjàrà náà ní ẹ̀ka mẹ́ta; bí ó ti ń rúwé, ìtànná rẹ̀ ṣẹ̀, àwọn ìdìpọ̀ rẹ̀ sì pọ́n di èso àjàrà. ¹¹Ago Farao wà ní ọwọ́ mi; mo mú àwọn èso àjàrà náà, mo fún wọn sínú ago Farao, mo sì fi ago náà lé Farao lọ́wọ́.”

¹²Nígbà náà ni Jósẹ́fù wí fún un pé, “Èyí ni ìtúmọ̀ rẹ̀: ẹ̀ka mẹ́ta náà jẹ́ ọjọ́ mẹ́ta. ¹³Láàrin ọjọ́ mẹ́ta, Farao yóò gbé orí yín sókè, yóò sì dá yín padà sí ipò yín, ẹ ó sì fi ago Farao lé e lọ́wọ́, bí ti àtẹ̀yìnwá, nígbà tí ẹ jẹ́ agbọ́tí rẹ̀. ¹⁴Ṣùgbọ́n ẹ rántí mi nígbà tí ó bá dára fún yín; ẹ jọ̀wọ́ ẹ ṣàánú fún mi—ẹ dárúkọ mi fún Farao, kí ó lè mú mi jáde kúrò nínú ilé yìí. ¹⁵Nítorí pé a jí mi gbé ní tòótọ́ kúrò ní ilẹ̀ àwọn Heberu, àní níhìn-ín pàápàá, èmi kò ṣe ohunkóhun tí ó tọ́ sí kí a fi mí sínú ihò túbú yìí.”

¹⁶Nígbà tí olórí àwọn alásè búrẹ́dì rí i pé ìtúmọ̀ náà dára, ó wí fún Jósẹ́fù pé, “Èmi náà lá àlá: agbọ̀n búrẹ́dì funfun mẹ́ta wà lórí mi. ¹⁷Agbọ̀n tí ó wà lókè ní onírúurú oúnjẹ dídín fún Farao, ṣùgbọ́n àwọn ẹyẹ ń jẹ wọ́n nínú agbọ̀n tí ó wà lórí mi.”

¹⁸Jósẹ́fù sì dáhùn pé, “Èyí ni ìtúmọ̀ rẹ̀: agbọ̀n mẹ́ta náà jẹ́ ọjọ́ mẹ́ta. ¹⁹Láàrin ọjọ́ mẹ́ta, Farao yóò gbé orí yín sókè kúrò lára yín, yóò sì gbé yín kọ́ sórí igi—àwọn ẹyẹ yóò sì jẹ ẹran-ara yín kúrò lára yín.” ²⁰Ní ọjọ́ kẹta, ọjọ́ ìbí Farao, ó ṣe àsè fún gbogbo àwọn ìjòyè rẹ̀, ó sì gbé orí olórí àwọn agbọ́tí rẹ̀ àti orí olórí àwọn alásè búrẹ́dì rẹ̀ sókè láàrin wọn, ²¹Ó dá olórí àwọn agbọ́tí padà sí ipò rẹ̀, ó sì fi ago náà lé Farao lọ́wọ́. ²²Ṣùgbọ́n ó so olórí àwọn alásè búrẹ́dì kọ́, gẹ́gẹ́ bí Jósẹ́fù ti túmọ̀ rẹ̀ fún wọn. ²³Síbẹ̀, olórí àwọn agbọ́tí kò rántí Jósẹ́fù—ó gbàgbé rẹ̀.