Thung Jungbou hoba Wentek Ngoubou
Faraoeibü lombou shuong nyi samenbü thüngshanga mangh likei. Josefei, tetenkubü kho seneibü Boueibü ki dogo lauan, nyi hamei honei tetenkukei: thung jungbou lang kilabü, wentek ngoubou kho longa aptikulabü. Haoei hao sisiktiashi dogo liman sudajakei. Lausikei kho akümti—thung jungbouei hao thamtham mashikbei dogo ho meten penkei.
40 1Longche kian, Ijep chobaeibü thung jungbou hoba wentek ngoubou, haoenei haoeneibü bunyubou, Ijep choba khulimbo shabü shonkei. 2Faraoei haoeibü yaangenbü shuong penyi, thung jungbou hoba wentek ngoubou khulimbo maangpokkei. 3Haoei haoen lakjaibou chema, Josef thüngan phobü thüngshanga khinan phokei. 4Lakjaiboueibü Josef haoen khangenla shanga pienkei; haoen chalou juong thüngshanga thüngkei. 5Kheijinei haosi hamei, Ijep chobaeibü thung jungbou hoba wentek ngoubou, thüngshanga thüngbü, you chenei mangh che che likei, hoba lulu thüngthüng manghtet likei. 6Ngeyang Josef haoen jungto loujinei, haoei haoen senyüh ashem dogo hapbei. 7Haoei hao yoa bunyubou chema thüngshanga thüngbü Farao yaangenbü shuong to laukei, “Aila tat kaneibü thenyek maangmauko kida?”
8Haoenei hao to laukei, “Künei mangh che che lia, lausikei kho tetlabü lenla ao aki.” Josefei haoen to jongaikei, “Tetenkubü kho seneibü Boueibü aying lo? Sanoudambo kü la lenbüma.” a a v8 Josefei ngühmaibü tetenkubü pendou kho seneibü Bou ka longda dogo lenkei, hao angebü Ijepbü shuong to nyekchüh.
9Thung jungbouei Josef to jembü mangh lenkei, “Ngei mangha ngeibü thedanga semlühlong che kikei. 10Semlühlong ka bhek sem kikei; kho longjinei, khübü chipen pungan ipbei, hoba shen langan semlüh yeikei. 11Faraoeibü thung ngeibü ika kikei; ngei semlüh soan, kho Faraoeibü thung ka pian, hoba thung kho Faraoeibü ika jinkei.”
12Kheijinei Josefei hao to laukei, “Ho khübü tetenkubü ki: bhek sem kho chalou sem ki. 13Chalou sem kian Faraoei kaibü khu pholabü, ka kaibü shaangla pentilabü, hoba nyi Faraoeibü thung hao ika jinlabü, shangla kaibü hao thung jungbou kibü yam tegü. 14Lausikei ka la maibü kijinei ngo damenashi; sanoudambo kü la sanou lenshima, Farao to ngo maangsangashi, hibü haoei ngo ho chem ka leiyenlabü. 15Aishanga ngo maimaitham Ibribü kaodak ka kokan yankei, hoba hanei nyekchüh ngei ho thüngdanga phola lele ai amaibükei aküm.”
16Tetenkubü maibü dogo hapan, wentek ngoubouei Josef to laukei, “Ngo lahoba mangh che liakei: ngeibü khu thüka laang angbü wentek kam sem kikei. 17Maang kam ka Farao shanga lulu yaangbü wentek ngoubü kikei, lausikei aushuongei ngeibü khu thüka kam ka khübü shaukei.”
18Josefei jongaikei, “Ho haoeibü tetenbü ki: kam sem kho chalou sem ong. 19Chalou sem ka Faraoei kaibü khu no ka sungenlabü hoba no bunyu chenei saülabü—au shuongei no ka kaibü phe shaulabü. 20Sembounyeta, Faraoeibü bukbü chalou, haoei hao phanga yaangbü shuong pendou shanga lem likukei, hoba haoen yoa thung jungbou khu hoba wentek ngoubou khu sungenkei,” 21haoei thung jungbou shaangla penbü pentikei, kheijinei haoei thung Farao ika phokei. 22Lausikei Josefei haoen to tetenkubü tegü, haoei wentek ngoubou phenetnyu haikei. 23Lausikei thung jungbouei Josef adamen—haoei hao maan apbei.
