Tengkot Singme kala Khamui Kasema
Pharaohwui ot kasā mi khanina phātop kā kathalāli mang shimanripa. Khalatkhami hi ithumwui Avāwuina da hāngda, Josephna khanini khamashung eina khalatmi: tengkot singme ringra, khamui kasema chi thingli zangra. Ana ali phaningmi khavai māngna kapo. Kha maphaningmamana — tengkot singme china Josephli ngāthuk malaihaowa eina hi kupsa.
40 1Atam khaleilaga Egypt awungawui tengkot singme kala khamui kasemana aniwui akhavā Egypt awungawui mangāli morei sāhaowa. 2Pharaohna awui kathānabing khani tengkot singme kala khamui kasemali malungvātlakhaowa. 3Ana anili Joseph narkahai kashina akhavāwui shimwui phātopli sanghaowa. 4Kashina akhavāna Josephli athumli otram ngatha̱ khavai pangsanga; athum zimiksho kaikha phātopli pamsai. 5Chieina phātopli narkahai Egypt awungawui tengkot singme kala khamui kasema ani khanina thangngayākha ava̱va̱na kakhalat ngatatei kahai kachichāwui mang shimana. 6Ngathorli Josephna anili khavā tharan ani wukkhananghaira kaji ana theihaowa. 7Ana awui akhavāwui shimli a ngasopamda phātopli khalei Pharaohwui kathānabingli hānga, "Khisāda aja nani ningkachot yangkhala?"
8Anina ali hānga, "Ini ava̱va̱na mang shimana, kha chi khalatmikashap mi khipākha maleithuwa." Josephna ngahānkai, "Mang khalatmi chi ithumwui Avāwuisera maningmala? Ili chi hāngmilu." a a v8 Josephna ithumwui Avāli mang kakhalat khamashung saikorawui haokaphokna da mingphokmi — ali matheia Egyptnaobingliva tangda.
9Tengkot singme china Josephli awui mang hānga: "Iwui mangshongli drakhārong akha iwui mangāli nganinga. 10Drakhārong chili aphāng kathum leisai; chi haksangda, awona phoklakhaowa, kala amazānbing drakhāthei theishiraihaowa. 11Pharaohwui tengkot iwui pāngli leisai; ina drakhāthei khuida Pharaohwui tengkotli surkhuida tengkot chi Pharaohwui pāngli misai."
12Chieina Josephna ali hānga, "Chiwui kakhalat chi hina: aphāng kathum china zimiksho kathumna. 13Zimiksho kathumli Pharaohna nawui kui reingasakra, nali nawui otpamli khuiungluishitra, kala khare nana awui tengkot singme sāsai thāda Pharaohwui tengkot awui pāngli mira. 14Kha nali kaphā leiakha ili phaningunglu; ina nali kapona, ili lukhamashan sāmida Pharaohli iwui vang hāngmiserlu, chithākha ana ili shim hiwui eina khuishokmira. 15Kaja ili kachangkhat Hebrewwui ngaleiwui eina khukhuikahaina, kala hilila ina phātop hiwui narngasak khavai khikha masāmana."
16Kakhalat chi phālakhaira kaji theilaga khamui kasema china Josephli hānga, "Ilala mang akha shimana: iwui kuitungli khamui kachar luk kathum leisai. 17Aton luk chili Pharaohwui vang khangui tharāzāt yur saikora kai, kha vānaobingna iwui kuitungli luk chiwui eina shaisai."
18Josephna ngahānkai, "Chiwui kakhalat chi hina: luk kathum chi zimiksho kathumna. 19Kathumthangwui alungli Pharaohna nawui kui na eina khāngkāra kala nali thingtungli phāshi sāra, kala vānaobingna nawui asā na eina shaira. 20Kakathumathang, Pharaohwui kapharā zimiksholi ana awui wungnaobing saikorali zātkhān akha sai, kala awui tengkot singmewui kui kala awui khamui kasemawui kui athumwui ngachaili khāngkāhaowa," 21Ana tengkot singmeli awui otpamli khuisangluishita, chieina ana tengkot chi Pharaohwui pāngli sangmi. 22Kha Josephna athumli khalatkhami chi tākam eina ana khamui kasemali phāshi sāhaowa. 23Chithālala tengkot singme Josephli maphaningungthuwa; ali malaihaowa.
