Josephli Egyptli Khuivāhaowa
Rao sākahai lala Josephwui ot kaphāmāng sāchingsai — ithumwui Avāna ali ngasomisai, kala Potipharna ali awui ot saikora mihaowa. Akhavāwui ashāmva̱li Josephna thangkachida manganāsanglakmana, kala ava̱wui mayonkhamei eina ali phātopli sanghaowa; chililā ali ot saikora ungmihaowa.
39 1Josephli Egyptli khuivāhaowa; Pharaohwui Egyptnao wungnao kala phātop kashina Potipharna ali chili khuivākahai Ishmaelnaobingwui eina lokhuihaira. 2Ithumwui Avāna Josephli ngasomisai; awui Egyptnao akhavāwui shimli otram ngatha̱lakha ana mataisanga. 3Awui akhavāna ithumwui Avā ali ngasomida, kala ana sākahai saikora ithumwui Avāna apāngli ungshung ngasak chi thei. 4Josephna awui mikyanli ngahānkhangai samphangda ali otram ngatha̱ya; awui akhavāna Josephli awui shimwuitungli yangmida, awui khalalei saikora apāngli horsangmi. 5Josephli awui shim kala awui khalalei saikorawuitungli yangmi kahai atam chiwui eina, ithumwui Avāna Josephwui vang Egyptpawui shimli somi; ithumwui Avāwui sokhami awui khalalei saikora, shim kala luiwuitungli leihaowa. 6Potipharna awui khalalei saikora Josephwui pāngli horsangmi, ana kazā kashakazā maningla khikha matheimana. Josephna azak mathālak kala yarkhoka akhana.
7Hi saikorawui thili awui akhavā preiva̱na Josephwuishong amik tāda hānga, "Ili ngasopilu."
8Kha ana mamayāthuda, awui akhavā preiva̱li hānga, "Yanglu, ina hili leilakha, iwui akhavāna shimli khikha mayangmimana; awui khalalei saikora ipāngli horsangmihaira. 9Shim hiwui alungli ana ili reimeimana; na maningla ana iwui eina khikha mashummana, kaja na awui preiva̱na. Kathāda ina hi makhayā kharei sāda ithumwui Avāli morei sāpairakhala?" a a v9 Josephna morei chi khi ngasāna da mingmi — ain akha ngakaishi maningla, kha atam hi eina tangda ali leishikahai Avā akhawui wuklungli sāza̱kahaina.
10Zimiksho ava̱va̱li ana Josephli hānglala, kha ana ali nganai khavai, ngasopi khavai kala ngasoung khavai mamayāthuwa. 11Zimiksho akha Josephna awui ot sākhavai shimli vāzanga, shimwui alungli shimkhurwui mi akhala maleithuwa. 12Ana awui kachon eina ali tukkhuida hānga, "Ili ngasopilu!" Kha ana kachon chi apāngli horhailaga kayāngli yāmhaowa.
13Ana awui kachon apāngli horhailaga kayāngli yāmhaira kaji preiva̱ china kathei tharan, 14ana awui shimkhurwui mibingli hokhuida hānga, "Yanglu, ithumli mana̱shi khavai Hebrewnao akha ithumli khuirāmihaira. Ana ili ngasopi khavai iwuishong vāzanga, kala ina panglāk eina vaowa. 15Ina panglāk eina vaokahai chi ana shā tharan, ana awui kachon iwuishong horhailaga kayāngli yāmhaowa. 16Awui akhavā shimli marāranglakha eina tangda ana awui kachon awuishong tharda mayona." 17Ana ali tui akhana hānga: "Nana ithumli khuirākhami Hebrewnao rao china ili mana̱shi khavai iwuishong vāzanga. 18Kha ina vaokahai tharan, ana awui kachon iwui ngalemli horhailaga kayāngli yāmhaowa."
19Awui akhavāna "Narao china ili hikatha sāhaira" da apreiva̱na ali kahāng tui chi shālaga, a malungvāthaowa.
20Josephwui akhavāna ali khuilaga awungawui phātop kazangbing khalei phātop shim chili sanghaowa. Ana chili phātop shimli apamhaowa. 21Kha ithumwui Avāna Josephli ngasomisai, kala ali makhangachei leikashi chitheimida, phātop khamayonawui mangāli ngahānkhangai samphang ngasakmi. 22Phātop khamayonana chili khalei phātop kazangbing saikorawui akhavā Josephli sāngasaka; chili sākasā saikora ana sāhaowa. 23Phātop khamayonana Josephwui pāngli khalei ot khikha akhala mayangmana, kaja ithumwui Avāna ali ngasomisai; ana kasā saikora ithumwui Avāna athei mathei ngasakmi.
