ଯୋଷେଫ ମିସରକୁ ଅଣାଗଲେ

ଦାସତ୍ୱ ଯୋଷେଫଙ୍କ ଉନ୍ନତିକୁ ଅଟକାଇ ପାରେ ନାହିଁ — ଆମ ପିତା ତାଙ୍କ ସହିତ ଅଛନ୍ତି, ଓ ପୋଟୀଫର ତାଙ୍କ ହାତରେ ସବୁକିଛି ସମର୍ପଣ କରନ୍ତି। ସେ ଦିନକୁ ଦିନ ତାଙ୍କ ମାଲିକଙ୍କ ପତ୍ନୀକୁ ପ୍ରତ୍ୟାଖ୍ୟାନ କରନ୍ତି, ଓ ତାʼର ଅଭିଯୋଗ ତାଙ୍କୁ କାରାଗାରରେ ପକାଏ, ଯେଉଁଠାରେ ପୁଣି ତାଙ୍କୁ ସବୁକିଛିର ଭାର ଦିଆଯାଏ।

ଅଧ୍ୟାୟ 39।

ଯୋଷେଫ ମିସରକୁ ଅଣାଗଲେ; ଯେଉଁ ଇଶ୍ମାୟେଲୀୟମାନେ ତାହାଙ୍କୁ ସେଠାକୁ ନେଇଥିଲେ, ସେମାନଙ୍କଠାରୁ ଫାରୋଙ୍କ ମିସରୀୟ କର୍ମଚାରୀ ତଥା ରକ୍ଷକ ସୈନ୍ୟଗଣର ସେନାପତି ପୋଟୀଫର ତାହାଙ୍କୁ କିଣିଲେ। ଆମ୍ଭମାନଙ୍କ ପିତା ଯୋଷେଫଙ୍କ ସଙ୍ଗରେ ଥିଲେ; ସେ ଆପଣା ମିସରୀୟ ପ୍ରଭୁଙ୍କ ଗୃହରେ ସେବା କରି ଉନ୍ନତି ଲାଭ କଲେ। ଆମ୍ଭମାନଙ୍କ ପିତା ତାହାଙ୍କ ସଙ୍ଗରେ ଅଛନ୍ତି ଓ ସେ ଯାହା କରନ୍ତି, ତାହା ପିତା ତାହାଙ୍କ ହସ୍ତ ଦ୍ଵାରା ସଫଳ କରୁଅଛନ୍ତି ବୋଲି ତାହାଙ୍କ ପ୍ରଭୁ ଦେଖିଲେ। ଯୋଷେଫ ତାହାଙ୍କ ଦୃଷ୍ଟିରେ ଅନୁଗ୍ରହ ପାଇ ତାହାଙ୍କ ସେବା କଲେ; ତାହାଙ୍କ ପ୍ରଭୁ ଯୋଷେଫଙ୍କୁ ଆପଣା ଗୃହ ଉପରେ ନିଯୁକ୍ତ କରି ଆପଣାର ସର୍ବସ୍ଵ ତାହାଙ୍କ ହସ୍ତରେ ସମର୍ପଣ କଲେ। ଯେଉଁ ସମୟଠାରୁ ସେ ଯୋଷେଫଙ୍କୁ ଆପଣା ଗୃହ ଓ ସର୍ବସ୍ଵ ଉପରେ ନିଯୁକ୍ତ କଲେ, ସେହି ସମୟଠାରୁ ଆମ୍ଭମାନଙ୍କ ପିତା ଯୋଷେଫଙ୍କ ସକାଶେ ସେହି ମିସରୀୟର ଗୃହକୁ ଆଶୀର୍ବାଦ କଲେ; ଗୃହ ଓ କ୍ଷେତ୍ର, ତାହାର ସର୍ବସ୍ଵ ଉପରେ ଆମ୍ଭମାନଙ୍କ ପିତାଙ୍କ ଆଶୀର୍ବାଦ ଥିଲା। ପୋଟୀଫର ଆପଣାର ସର୍ବସ୍ଵ ଯୋଷେଫଙ୍କ ହସ୍ତରେ ଛାଡ଼ିଦେଲେ, ପୁଣି ଆପଣା ଭୋଜନ ବିନା ଆଉ କୌଣସି ବିଷୟ ବିଷୟରେ ସେ ଚିନ୍ତା କଲେ ନାହିଁ। ଯୋଷେଫ ସୁନ୍ଦର ଗଠନ ବିଶିଷ୍ଟ ଓ ଦେଖଣାହାରୀ ଥିଲେ।

ଏହିସବୁ ଘଟଣା ପରେ ତାହାଙ୍କ ପ୍ରଭୁଙ୍କ ଭାର୍ଯ୍ୟା ଯୋଷେଫଙ୍କ ଉପରେ ଦୃଷ୍ଟି ପକାଇ କହିଲା, “ମୋʼ ସହିତ ଶୟନ କର।”

ମାତ୍ର ସେ ଅସମ୍ମତ ହୋଇ ଆପଣା ପ୍ରଭୁଙ୍କ ଭାର୍ଯ୍ୟାକୁ କହିଲେ, “ଦେଖ, ମୁଁ ଏଠାରେ ଥିବାରୁ ମୋʼ ପ୍ରଭୁ ଗୃହ ମଧ୍ୟରେ କୌଣସି ବିଷୟ ବିଷୟରେ ଚିନ୍ତା କରନ୍ତି ନାହିଁ; ଆପଣାର ସର୍ବସ୍ଵ ସେ ମୋʼ ହସ୍ତରେ ସମର୍ପଣ କରିଅଛନ୍ତି। ଏହି ଗୃହରେ ସେ ମୋʼ ଅପେକ୍ଷା ବଡ଼ ନୁହଁନ୍ତି; ତୁମ୍ଭେ ତାହାଙ୍କ ଭାର୍ଯ୍ୟା ହୋଇଥିବାରୁ ତୁମ୍ଭ ବିନା ଆଉ କୌଣସି ବିଷୟ ସେ ମୋʼଠାରୁ ରଖିନାହାନ୍ତି। ତେବେ ମୁଁ କିପରି ଏହି ମହା ଦୁଷ୍କର୍ମ କରି ଆମ୍ଭମାନଙ୍କ ପିତାଙ୍କ ବିରୁଦ୍ଧରେ ପାପ କରିପାରେ?” ^a

ସେ ଦିନକୁ ଦିନ ଯୋଷେଫଙ୍କୁ କହିଲା, ମାତ୍ର ସେ ତାହା କଥା ଶୁଣିବାକୁ, ତାହା ପାଖରେ ଶୟନ କରିବାକୁ କିମ୍ବା ତାହା ସଙ୍ଗରେ ରହିବାକୁ ଅସମ୍ମତ ହେଲେ। ଦିନେ ଯୋଷେଫ ଆପଣା କର୍ମ କରିବା ନିମନ୍ତେ ଗୃହ ଭିତରକୁ ଗଲେ, ସେତେବେଳେ ଗୃହ ମଧ୍ୟରେ ପରିବାରର କୌଣସି ପୁରୁଷ ନ ଥିଲା। ତେଣୁ ସେ ତାହାଙ୍କ ବସ୍ତ୍ର ଧରି କହିଲା, “ମୋʼ ସହିତ ଶୟନ କର!” ମାତ୍ର ସେ ତାହା ହସ୍ତରେ ଆପଣା ବସ୍ତ୍ର ଛାଡ଼ି ବାହାରକୁ ପଳାଇଗଲେ।

ସେ ଯୋଷେଫ ଆପଣା ବସ୍ତ୍ର ତାହା ହସ୍ତରେ ଛାଡ଼ି ବାହାରକୁ ପଳାଇଯାଇଅଛନ୍ତି ବୋଲି ଦେଖି, ଆପଣା ପରିବାରର ଲୋକମାନଙ୍କୁ ଡାକି କହିଲା, “ଦେଖ—ସେ ଆମ୍ଭମାନଙ୍କୁ ପରିହାସ କରିବା ନିମନ୍ତେ ଗୋଟିଏ ଏବ୍ରୀୟ ପୁରୁଷକୁ ଆଣିଅଛନ୍ତି। ସେ ମୋʼ ସହିତ ଶୟନ କରିବାକୁ ମୋʼ ନିକଟକୁ ଆସିଲା, ପୁଣି ମୁଁ ଉଚ୍ଚସ୍ଵରରେ ଚିତ୍କାର କଲି। ପୁଣି ମୁଁ ଉଚ୍ଚସ୍ଵରରେ ଚିତ୍କାର କରିବାର ସେ ଶୁଣନ୍ତେ, ମୋʼ ପାଖରେ ଆପଣା ବସ୍ତ୍ର ଛାଡ଼ି ବାହାରକୁ ପଳାଇଗଲା।” ଆଉ ତାହାଙ୍କ ପ୍ରଭୁ ଗୃହକୁ ଆସିବା ପର୍ଯ୍ୟନ୍ତ ସେ ଯୋଷେଫଙ୍କ ବସ୍ତ୍ର ଆପଣା ପାଖରେ ରଖିଲା। ପୁଣି ସେ ତାହାଙ୍କୁ ସେହି କଥା କହିଲା, “ଆପଣ ଆଣିଥିବା ସେହି ଏବ୍ରୀୟ ଦାସ ମୋତେ ପରିହାସ କରିବା ନିମନ୍ତେ ମୋʼ ନିକଟକୁ ଆସିଲା। ମାତ୍ର ମୁଁ ଉଚ୍ଚସ୍ଵରରେ ଚିତ୍କାର କରନ୍ତେ, ସେ ମୋʼ ପାଖରେ ଆପଣା ବସ୍ତ୍ର ଛାଡ଼ି ବାହାରକୁ ପଳାଇଗଲା।”

“ଆପଣଙ୍କ ଦାସ ମୋʼ ପ୍ରତି ଏହିସବୁ କର୍ମ କଲା” ବୋଲି ଆପଣା ଭାର୍ଯ୍ୟା କହିଥିବା ଏହି କଥା ଯୋଷେଫଙ୍କ ପ୍ରଭୁ ଶୁଣନ୍ତେ, ତାହାଙ୍କ କ୍ରୋଧ ପ୍ରଜ୍ଵଳିତ ହେଲା।

ତେଣୁ ଯୋଷେଫଙ୍କ ପ୍ରଭୁ ତାହାଙ୍କୁ ନେଇ ରାଜାଙ୍କ ବନ୍ଦୀମାନେ ଯେଉଁ କାରାଗାରରେ ରୁଦ୍ଧ ଥିଲେ, ସେହି କାରାଗାରରେ ରଖିଲେ। ଆଉ ସେ ସେହି କାରାଗାରରେ ରହିଲେ। ତଥାପି ଆମ୍ଭମାନଙ୍କ ପିତା ଯୋଷେଫଙ୍କ ସଙ୍ଗରେ ଥିଲେ, ପୁଣି ତାହାଙ୍କ ପ୍ରତି ଦୟା ପ୍ରକାଶ କରି କାରାରକ୍ଷକ ଦୃଷ୍ଟିରେ ତାହାଙ୍କୁ ଅନୁଗ୍ରହପାତ୍ର କଲେ। କାରାରକ୍ଷକ କାରାଗାରସ୍ଥ ସମସ୍ତ ବନ୍ଦୀ ଉପରେ ଯୋଷେଫଙ୍କୁ ନିଯୁକ୍ତ କଲା; ଆଉ ସେଠାରେ ଯାହା କିଛି କରାଯାଉଥିଲା, ତାହା ସେ କଲେ। ଆମ୍ଭମାନଙ୍କ ପିତା ତାହାଙ୍କ ସଙ୍ଗରେ ଥିବାରୁ କାରାରକ୍ଷକ ଯୋଷେଫଙ୍କ ହସ୍ତସ୍ଥିତ କୌଣସି ବିଷୟ ବିଷୟରେ ତଦନ୍ତ କଲା ନାହିଁ—ଯେଣୁ ସେ ଯାହା କରୁଥିଲେ, ତାହା ଆମ୍ଭମାନଙ୍କ ପିତା ସଫଳ କରୁଥିଲେ।