Yo mennen Jozèf desann nan peyi Lejip

Esklavaj pa anpeche Jozèf mache byen: Papa nou an avè l, epi Potifa renmèt li tout bagay. Li refize madanm mèt li jou apre jou, epi akizasyon fanm nan voye l nan prizon, kote yo fè l konfyans ankò pou tout bagay.

Chapit 39.

Yo te mennen Jozèf desann nan peyi Lejip. Potifa, yon ofisye peyi Lejip ki t'ap sèvi farawon an epi ki te chèf gad yo, achte l nan men moun Izmayèl yo ki te mennen l desann la a. Papa nou te avèk Jozèf. Li te byen reyisi, l'ap sèvi nan kay mèt li a, yon moun peyi Lejip. Mèt li a te wè Papa nou te avèk li, Papa nou t'ap fè tou sa l t'ap fè a mache byen nan men l. Jozèf jwenn favè nan je l, li t'ap sèvi l. Mèt li a mete Jozèf chèf lakay li, li renmèt li tou sa li te genyen. Depi lè li te mete Jozèf chèf lakay li ak tou sa li te genyen, Papa nou beni kay moun peyi Lejip la poutèt Jozèf. Benediksyon Papa nou te sou tou sa li te genyen, nan kay la ak nan jaden an. Potifa kite tou sa li te genyen nan men Jozèf. Li pa t okipe anyen pase manje li t'ap manje a. Jozèf te byen bati, li te yon bèl gason.

Apre bagay sa yo, madanm mèt li a vin ap gade Jozèf, li di l: “Vin kouche avè m.”

Jozèf refize, li di madanm mèt li a: “Gade, avèk mwen la a, mèt mwen pa okipe anyen nan kay la. Tou sa li genyen, li mete yo nan men m. Li pa pi gran pase m nan kay sa a. Li pa kenbe anyen pou li pa ban mwen, esepte ou menm, paske se madanm li ou ye. Kijan mwen ta ka fè gwo mal sa a epi peche kont Papa nou?” ^a

Jou apre jou li t'ap pale ak Jozèf, men li refize koute l, li refize kouche bò kote l, li refize rete avè l. Yon jou Jozèf antre nan kay la pou l fè travay li, pa t gen yon moun lakay la anndan an. Li kenbe l nan rad li, li di: “Vin kouche avè m!” Jozèf kite rad la nan men l, li kouri soti deyò.

Lè li wè Jozèf te kite rad li nan men l epi li te kouri soti deyò, li rele moun ki nan kay li a, li di yo: “Gade—li mennen yon ebre ban nou pou pase nou nan betiz. Li antre vin jwenn mwen pou l kouche avè m, epi mwen rele byen fò. Lè li tande m rele byen fò, li kite rad li bò kote m epi li kouri soti deyò. Li kenbe rad la bò kote l jouk mèt li a vin lakay.” Li rakonte l menm istwa a: “Esklav ebre ou te mennen ban nou an vin jwenn mwen pou l pase m nan betiz. Men lè m rele byen fò, li kite rad li bò kote m epi li kouri soti deyò.”

Lè mèt li a tande pawòl madanm li te di l yo—“Men sa esklav ou a fè m”—li fè yon sèl kòlè.

Mèt Jozèf la pran l, li mete l nan prizon kote yo te fèmen prizonye wa a. Jozèf rete la nan prizon an. Men Papa nou te avèk Jozèf. Li te moutre l renmen ki p'ap janm sispann, li te fè l jwenn favè nan je chèf prizon an. Chèf prizon an mete Jozèf reskonsab tout prizonye ki te la yo. Nenpòt sa ki te fèt la, se li ki te fè l. Chèf prizon an pa t tcheke anyen ki te nan men Jozèf, paske Papa nou te avèk li—nenpòt sa li te fè, Papa nou te fè l mache byen.