يوسف مصر ته راوستلے شو

مریتوب یوسف له ودې نه نه منع کوي — زموږ پلار ورسره دی، او فوطیفار هر څه هغه ته سپاري. هغه ورځ تر بلې د خپل بادار مېرمنې ته انکار کوي، او د هغې تور هغه زندان ته لېږي، چېرې چې بیا پر هر څه باوري ګڼل کېږي.

څپرکی 39.

يوسف مصر ته راوستلے شو. فوطيفار چې د فرعون مصرى عهدېدار او د محافظو سردار وو، هغه يې د هغه اِسماعيليانو نه واخستو چې هغه يې هلته راوستلے وو. زمونږ پلار د يوسف سره وو، نو هغه کامياب شو او د خپل مصرى مالِک په کور کښې يې خدمت کولو. د هغۀ مالِک وليدل چې زمونږ پلار د هغۀ سره دے او هر څۀ چې هغه کوى زمونږ پلار يې په لاس کښې کامياب کوى. يوسف د هغۀ په نظر کښې مقبول شو او د هغۀ خدمت يې وکړو، نو د هغۀ مالِک يوسف په خپل کور باندې مقرر کړو او هر څۀ چې د هغۀ وو هغۀ ته يې وسپارل. د هغه وخت نه چې هغۀ يوسف په خپل کور او په هر څۀ باندې چې د هغۀ وو مقرر کړو، زمونږ پلار د يوسف په خاطر د هغه مصرى کور ته برکت ورکړو. زمونږ پلار برکت په هر څۀ باندې وو چې د هغۀ وو، کور او پټے. فوطيفار هر څۀ چې د هغۀ وو د يوسف په حواله کړل او د دې نه سوا چې څۀ به يې خوړل د بل هيڅ شى خبر نۀ وو. يوسف ښۀ جوړ جسم والا او ښائسته وو.

د دې خبرو نه پس د هغۀ د مالِک ښځې خپلې سترګې په يوسف باندې واچولې او ورته يې ووئيل، ”زما سره مۀ پرېوځه.“

خو هغۀ اِنکار وکړو او د خپل مالِک ښځې ته يې ووئيل، ”وګوره، زما د دلته اوسېدو سره زما مالِک په کور کښې د هيڅ شى خيال نۀ ساتى، هر څۀ چې د هغۀ دى هغۀ زما په لاس کښې ورکړل. هغه په دې کور کښې زما نه لوئ نۀ دے او هغۀ د تا نه سوا زما نه هيڅ شے نۀ دے ساتلے، ځکه چې تۀ د هغۀ ښځه يې. نو زۀ به دا دومره لوئ بدى څنګه وکړم او د زمونږ پلار په خلاف به ګناه وکړم؟“ ^a

ورځ په ورځ هغې يوسف ته خبرې کولې، خو هغۀ د هغې خبره نۀ منله چې د هغې سره پرېوځى يا د هغې سره وى. يوه ورځ يوسف خپل کار کولو دپاره کور ته ننوتو او د کور نه هيڅ سړے دننه نۀ وو. هغې هغه د جامو نه ونيولو او ورته يې ووئيل، ”زما سره پرېوځه!“ خو هغۀ خپله جامه د هغې په لاس کښې پرېښوله او دباندې وتښتېدو.

کله چې هغې وليدل چې هغۀ خپله جامه د هغې په لاس کښې پرېښوله او دباندې وتښتېدو، نو هغې د خپل کور سړى راوبلل او ورته يې ووئيل، ”وګورئ، دۀ زمونږ دپاره يو عبرانى سړے راوستو چې مونږ پرې مسخرې وکړى. هغه زما سره پرېوتلو دپاره ما ته راغلو او ما په لوړ آواز چغه کړه. کله چې هغۀ واورېدل چې ما چغه کړه، نو هغۀ خپله جامه زما سره پرېښوله او دباندې وتښتېدو.“ هغې د هغۀ جامه د ځان سره ساتله ترڅو چې د هغۀ مالِک کور ته راغلو. هغې هغۀ ته هم هغه کيسه وکړه، ”هغه عبرانى نوکر چې تا زمونږ دپاره راوستے وو ما سره مسخرو کولو دپاره راغلو. خو کله چې ما چغه کړه، نو هغۀ خپله جامه زما سره پرېښوله او دباندې وتښتېدو.“

کله چې د هغۀ مالِک د خپلې ښځې خبرې واورېدلې چې هغې ورته ووئيل، ”ستا نوکر ما سره دا کارونه وکړل،“ نو د هغۀ غصه جوشان شوه.

د يوسف مالِک هغه ونيولو او په هغه قېدخانه کښې يې واچولو چې د بادشاه قېديان پکښې وُو. هغه هلته په قېدخانه کښې پاتې شو. خو زمونږ پلار د يوسف سره وو او هغۀ ته يې مينه وښودله او د قېدخانې داروغه ته يې د هغۀ دپاره مهربانى په زړۀ کښې واچوله. د قېدخانې داروغې ټول قېديان چې هلته وُو د يوسف په حواله کړل او هر څۀ چې هلته کيدل هغه يې کول. داروغه د هغۀ په حواله کوم شى خيال نۀ ساتلو، ځکه چې زمونږ پلار د هغۀ سره وو او هر څۀ چې هغۀ کول زمونږ پلار يې کامياب کول.