1 Ọba 20

Orí 20.

20 ¹Beni-Hadadi ọba Aramu kó gbogbo ọmọ ogun rẹ̀ jọ—ọba méjìlélọ́gbọ̀n wà pẹ̀lú rẹ̀, àti ẹṣin àti kẹ̀kẹ́ ogun. Ó gòkè lọ, ó dó ti Samaria, ó sì kọlù ú. ²Ó rán àwọn ìránṣẹ́ sí inú ìlú náà, sọ́dọ̀ Ahabu ọba Israẹli, ó wí pé, “Báyìí ni Beni-Hadadi wí: ³‘Fàdákà rẹ àti wúrà rẹ jẹ́ tèmi, àti àṣàyàn àwọn aya rẹ àti àwọn ọmọ rẹ jẹ́ tèmi.’”

⁴Ọba Israẹli dáhùn pé, “Gẹ́gẹ́ bí ẹ ti wí, olúwa mi ọba: èmi jẹ́ tiyín, àti ohun gbogbo tí mo ní.”

⁵Àwọn ìránṣẹ́ náà padà wá, wọ́n sì wí pé, “Báyìí ni Beni-Hadadi wí: ‘Mo ránṣẹ́ sí ọ, mo béèrè fàdákà àti wúrà rẹ, àwọn aya rẹ àti àwọn ọmọ rẹ. ⁶Ṣùgbọ́n ní nǹkan bí àkókò yìí lọ́la, èmi yóò rán àwọn ìránṣẹ́ mi láti wá inú ààfin rẹ àti ilé àwọn ìránṣẹ́ rẹ, wọn yóò sì gbá ohun gbogbo tí ó ṣọ̀wọ́n lójú rẹ mú, wọn yóò sì kó wọn lọ.’”

⁷Ọba Israẹli pe gbogbo àwọn àgbà ilẹ̀ náà jọ, ó sì wí pé, “Ẹ wo ó dájúdájú pé ọkùnrin yìí ń wá wàhálà. Ó ránṣẹ́ sí mi fún àwọn aya mi, àwọn ọmọ mi, fàdákà mi àti wúrà mi, èmi kò sì kọ̀ fún un.”

⁸Gbogbo àwọn àgbà àti gbogbo àwọn ènìyàn wí fún un pé, “Má ṣe fetí sí i, má sì ṣe gbà fún un.”

⁹Nítorí náà ó wí fún àwọn ìránṣẹ́ Beni-Hadadi pé, “Ẹ sọ fún olúwa mi ọba pé, ‘Gbogbo ohun tí ẹ kọ́kọ́ béèrè lọ́wọ́ ìránṣẹ́ yín, èmi yóò ṣe é, ṣùgbọ́n ohun tí ẹ ń béèrè yìí, èmi kò lè ṣe é.’” Àwọn ìránṣẹ́ náà lọ, wọ́n sì gbé èsì rẹ̀ padà.

¹⁰Nígbà náà Beni-Hadadi ránṣẹ́ pé, “Kí àwọn òrìṣà fìyà jẹ mí gidigidi bí eruku Samaria bá tó láti fún ẹnìkọ̀ọ̀kan àwọn ọmọ-ẹ̀yìn mi ní ẹ̀kúnwọ́ kan.”

¹¹Ọba Israẹli dáhùn pé, “Ẹ sọ fún un pé: ‘Kí ẹni tí ó wọ ìhámọ́ra ogun má ṣe ṣògo bí ẹni tí ó bọ́ ọ sílẹ̀.’”

¹²Nígbà tí Beni-Hadadi àti àwọn ọba náà ń mutí nínú àgọ́ wọn, ó gbọ́ èyí, ó sì pàṣẹ fún àwọn ọkùnrin rẹ̀ pé, “Ẹ dúró sí ipò yín,” wọ́n sì dúró sí ipò wọn dojú kọ ìlú náà.

Baba Fi Ìṣẹ́gun fún Ahabu

¹³Wòlíì kan tọ Ahabu ọba Israẹli wá, ó sì wí pé, “Báyìí ni Baba wa wí: Ṣé ìwọ rí ọ̀pọ̀lọpọ̀ ọmọ ogun yìí? Lónìí èmi yóò fi í lé ọ lọ́wọ́, ìwọ yóò sì mọ̀ pé èmi ni Baba rẹ.”

¹⁴Ahabu béèrè pé, “Láti ọwọ́ ta ni?” Wòlíì náà dáhùn pé, “Báyìí ni Baba wa wí: Láti ọwọ́ àwọn ọ̀dọ́ ìjòyè ti àwọn alákòóso àgbègbè.” “Ta ni yóò bẹ̀rẹ̀ ogun náà?” Ó dáhùn pé, “Ìwọ ni.”

¹⁵Nítorí náà Ahabu pe àwọn ọ̀dọ́ ìjòyè ti àwọn alákòóso àgbègbè jáde—igba ó lé méjìlélọ́gbọ̀n ni wọ́n jẹ́. Lẹ́yìn náà ó pe àwọn tókù jáde, gbogbo àwọn ọmọ Israẹli—ẹgbẹ̀rún méje ní àpapọ̀. ¹⁶Wọ́n jáde lọ ní ọ̀sán gangan nígbà tí Beni-Hadadi àti àwọn ọba méjìlélọ́gbọ̀n tí ó jẹ́ alájọṣepọ̀ rẹ̀ ń mutí yó nínú àgọ́ wọn. ¹⁷Àwọn ọ̀dọ́ ìjòyè ti àwọn alákòóso àgbègbè ni ó kọ́kọ́ jáde. Beni-Hadadi ti rán àwọn amí, wọ́n sì ròyìn fún un pé, “Àwọn ọkùnrin ń jáde wá láti Samaria.”

¹⁸Ó wí pé, “Bí wọ́n bá jáde wá fún àlàáfíà, ẹ mú wọn láàyè; bí wọ́n bá jáde wá fún ogun, ẹ mú wọn láàyè.”

¹⁹Àwọn ọ̀dọ́ ìjòyè ti àwọn alákòóso àgbègbè jáde kúrò nínú ìlú náà, ọmọ ogun sì tẹ̀lé wọn lẹ́yìn. ²⁰Ẹnìkọ̀ọ̀kan pa ọ̀tá rẹ̀. Àwọn ará Aramu sá, àwọn ọmọ Israẹli ń lé wọn, ṣùgbọ́n Beni-Hadadi ọba Aramu sá àsálà lórí ẹṣin pẹ̀lú àwọn ẹlẹ́ṣin díẹ̀. ²¹Ọba Israẹli tẹ̀síwájú, ó sì ṣẹ́gun àwọn ẹṣin àti àwọn kẹ̀kẹ́ ogun, ó sì pa ọ̀pọ̀lọpọ̀ àwọn ará Aramu. ²²Lẹ́yìn náà wòlíì náà tọ ọba Israẹli wá pé, “Fún ipò rẹ lókun, kí o sì ronú jinlẹ̀ nípa ohun tí ìwọ gbọ́dọ̀ ṣe, nítorí ní ìbẹ̀rẹ̀ ọdún tí ń bọ̀ ọba Aramu yóò tún kọlù ọ.”

²³Nígbà náà àwọn ìjòyè ọba Aramu wí fún un pé, “Àwọn òrìṣà wọn jẹ́ òrìṣà orí òkè; ìdí nìyí tí wọ́n fi borí wa. Ẹ bá wọn jà ní pẹ̀tẹ́lẹ̀, dájúdájú àwa yóò sì borí wọn. ²⁴Ẹ ṣe èyí: ẹ mú gbogbo àwọn ọba kúrò ní ipò àṣẹ wọn, kí ẹ sì fi àwọn olóyè mìíràn rọ́pò wọn. ²⁵Ẹ kó ọmọ ogun jọ gẹ́gẹ́ bí èyí tí ó ti sọnù fún yín—ẹṣin dípò ẹṣin, kẹ̀kẹ́ ogun dípò kẹ̀kẹ́ ogun—kí ẹ sì bá Israẹli jà ní pẹ̀tẹ́lẹ̀. Nígbà náà dájúdájú àwa yóò ní agbára jù.” Ó sì fetí sí wọn, ó sì ṣe bẹ́ẹ̀.

²⁶Ní ìbẹ̀rẹ̀ ọdún tí ń bọ̀, Beni-Hadadi kó àwọn ará Aramu jọ, ó sì gòkè lọ sí Afeki láti bá Israẹli jà. ²⁷Nígbà tí a kó àwọn ọmọ Israẹli jọ, tí a sì pèsè fún wọn, wọ́n jáde lọ láti pàdé wọn. Àwọn ọmọ Israẹli pàgọ́ dojú kọ wọ́n bí agbo ewúrẹ́ kékeré méjì, nígbà tí àwọn ará Aramu kún ilẹ̀ náà.

²⁸Ènìyàn Ọlọ́run náà tọ ọba Israẹli wá, ó sì wí pé, “Báyìí ni Baba wa wí: Nítorí tí àwọn ará Aramu rò pé Olúwa jẹ́ ọlọ́run orí òkè, kì í ṣe ti àfonífojì, èmi yóò fi gbogbo ọ̀pọ̀lọpọ̀ ọmọ ogun yìí lé ọ lọ́wọ́, ìwọ yóò sì mọ̀ pé èmi ni Baba rẹ.”

²⁹Fún ọjọ́ méje wọ́n pàgọ́ dojú kọ ara wọn; ní ọjọ́ keje ogun náà bẹ̀rẹ̀. Ní ọjọ́ kan àwọn ọmọ Israẹli pa ọ̀kẹ́ márùn-ún àwọn ọmọ ogun ẹlẹ́sẹ̀ ará Aramu. ³⁰Àwọn tókù sá lọ sí Afeki, níbi tí odi náà ti wó lù ẹgbẹ̀rún méjìdínlọ́gbọ̀n wọn. Beni-Hadadi sá lọ sí inú ìlú náà, ó sì fi ara pamọ́ sínú yàrá kan nínú inú.

³¹Àwọn ìránṣẹ́ rẹ̀ wí pé, “Àwa ti gbọ́ pé àwọn ọba ilé ọba Israẹli jẹ́ aláàánú. Ẹ jẹ́ kí a tọ ọba Israẹli lọ pẹ̀lú aṣọ ọ̀fọ̀ ní ẹ̀gbẹ́ wa àti okùn ní orí wa; bóyá yóò dá ẹ̀mí yín sí.”

³²Nítorí náà pẹ̀lú aṣọ ọ̀fọ̀ ní ẹ̀gbẹ́ wọn àti okùn ní orí wọn, wọ́n tọ ọba Israẹli wá, wọ́n sì bẹ̀bẹ̀ pé, “Ìránṣẹ́ yín Beni-Hadadi wí pé, ‘Jọ̀wọ́ jẹ́ kí n wà láàyè.’” Ó dáhùn pé, “Ṣé ó wà láàyè síbẹ̀? Arákùnrin mi ni.”

³³Àwọn ọkùnrin náà kà á sí àmì rere, wọ́n sì yára gbá ọ̀rọ̀ rẹ̀ mú. Wọ́n wí pé, “Bẹ́ẹ̀ ni, arákùnrin yín Beni-Hadadi!” Ọba náà wí pé, “Ẹ lọ, ẹ mú un wá.” Nígbà náà Beni-Hadadi jáde wá, Ahabu sì mú un gòkè wá sínú kẹ̀kẹ́ ogun.

³⁴Beni-Hadadi wí pé, “Èmi yóò dá àwọn ìlú tí baba mi gbà lọ́wọ́ baba rẹ padà, ìwọ sì lè gbé ọjà tìrẹ kalẹ̀ ní Damasku, gẹ́gẹ́ bí baba mi ti ṣe ní Samaria.” Ahabu wí pé, “Lórí àdéhùn wọ̀nyí ni èmi yóò dá ọ sílẹ̀.” Nítorí náà ó bá a dá májẹ̀mú, ó sì jẹ́ kí ó lọ.

Wòlíì Kan Dojúkọ Ọba náà

³⁵Nípa ọ̀rọ̀ Baba wa, ọ̀kan nínú àwọn ọmọ wòlíì wí fún ẹlẹgbẹ́ rẹ̀ pé, “Jọ̀wọ́ lù mí.” Ṣùgbọ́n ọkùnrin náà kọ̀ láti lù ú.

³⁶Wòlíì náà wí pé, “Nítorí tí ìwọ kò gbọ́ ohùn Baba wa, ní kété tí o bá fi mí sílẹ̀, kìnnìún yóò pa ọ́.” Nígbà tí ọkùnrin náà kúrò, kìnnìún rí i, ó sì pa á.

³⁷Wòlíì náà rí ọkùnrin mìíràn, ó sì wí pé, “Jọ̀wọ́ lù mí.” Nítorí náà ọkùnrin náà lù ú, ó sì ṣe é ní ọgbẹ́.

³⁸Nígbà náà wòlíì náà dúró ní ẹ̀gbẹ́ ọ̀nà láti dúró de ọba náà, ó sì pa ara rẹ̀ dà nípa fífi aṣọ bo ojú rẹ̀. ³⁹Bí ọba náà ti ń kọjá, wòlíì náà ké pé, “Ìránṣẹ́ yín lọ sí àárín gbungbun ogun, ọkùnrin kan sì yà sí apá kan, ó mú ẹlẹ́wọ̀n kan wá fún mi, ó sì wí pé, ‘Ṣọ́ ọkùnrin yìí. Bí ó bá sọnù, ẹ̀mí rẹ ni yóò dípò ẹ̀mí rẹ̀, bí bẹ́ẹ̀ kọ́ ìwọ yóò san páùǹdì fàdákà márùndínlọ́gọ́rin.’ ⁴⁰Nígbà tí ìránṣẹ́ yín ń ṣiṣẹ́ níhìn-ín àti lọ́hùn-ún, ọkùnrin náà yọ́ lọ.” Ọba Israẹli wí pé, “Ìyẹn ni ìdájọ́ rẹ; ìwọ fúnra rẹ ló pinnu rẹ̀.”

⁴¹Wòlíì náà yára mú aṣọ náà kúrò ní ojú rẹ̀, ọba Israẹli sì mọ̀ ọ́n pé ó jẹ́ ọ̀kan nínú àwọn wòlíì.

⁴²Ó wí fún ọba náà pé, “Báyìí ni Baba wa wí: Nítorí tí ìwọ dá ọkùnrin tí mo ti yà sọ́tọ̀ fún ìparun sílẹ̀, ẹ̀mí rẹ ni yóò dípò ẹ̀mí rẹ̀, àwọn ènìyàn rẹ dípò àwọn ènìyàn rẹ̀.”

⁴³Pẹ̀lú ìbànújẹ́ àti ìbínú, ọba Israẹli lọ sí ilé rẹ̀, ó sì padà sí Samaria.