Yiemei Ben-Hadad Samaria
Ki soomei Ben-Hadad fedhap Ahab, kwonyiikyik, ak lagokyik, ago ki terteer Israel ineendet oeng' ko uu ye ki yomisyi Kwandanyo koyob maotyot. Ago ki guure Ahab laitoryat ne kigobar ne tupchennyi ak kobakta kwo, ak ki ipwai maotyot ne kolaach si korwookyigei Ahab ineegei.
Ng'alaali Kwandanyo eng' mustarisyek 13–14, 28, 42
20 1Ki iyumji Ben-Hadad laitoryatap Syria lugosyekwak tugul, kobooto laitorinik sosom ak aeng' che ki mi ak ineendet, ak paraisisyek ak charunee. Ki togos ak konam Samaria koribisyo ak kobargei ak. 2Ki iyookto piik che ibu ng'aleek nganaseet ole mi Ahab laitoryatap Israel, koleenji, “Mwaei Ben-Hadad nguno: 3‘Chakyuk fedhang'ung' ak thahabung'ung', ak che karaaran eng' kwonyiiguk ak lagoguk ko chakyuk.’”
4Kowol laitoryatap Israel koleenji, “Ko uu ye imwae, kiptaiyandennyu laitoryat: anee ko neng'ung', ak tuguuk tugul che atinye.”
5Ki weeksei piik che ibu ng'aleek koleenji, “Mwaei Ben-Hadad nguno: ‘Ki aiyookwok ng'aleek, amagenin fedhang'ung' ak thahabung'ung', ak kwonyiiguk ak lagoguk. 6Ago eng' sait ni tomo, aiyooktoi otwogikyuk si koyom koong'ung' ak kooriigap otwogikyuk, ak konam koip tugul che ichame.’”
7Ki guure laitoryatap Israel poisyek tugul che po emet koleenji, “Ogeer komyee kole machei chiini kiy ne ya. Ki iyookto komagen kwonyiikyuk, lagokyuk, fedhanyu ak thahabunyu, ago ma asesen.”
8Ki leenji poisyek tugul ak piik tugul, “Amat igas ineendet, ak maticham.”
9Ki leenji anyun piigap ng'aleegap Ben-Hadad, “Omwachi kiptaiyandennyu laitoryat, ‘Tugul che ki image otwogindeng'ung' tai ko ayaei, ago magaetani mamuuchi ayai.’” Ki pa piik che ibu ng'aleek ak koweekyi ng'olyoondennyi.
10Ki iyookto anyun Ben-Hadad ng'aleek koleenji, “Ingoyaiywo kamuktaik ko uu nooto ak kotes kosiir, ngot koit ng'ung'unyeetap Samaria si konyi euut piik tugul che isup anee.”
11Kowol laitoryatap Israel koleenji, “Omwachi: ‘Mamuuchi chii ne ilaachi kariigap lugeet koloskei ko uu ne iistoi.’”
12Ye ki eei Ben-Hadad ak laitorinik eng' emaisyekwak, kingo kas niito, kong'at piikyik koleenji, “Otetkei,” ak kotetkei kobargei ak nganaseet.
Igoochi Kwanda Ahab Kabelisyet
13Ki nyoonji maotindet age Ahab laitoryatap Israel koleenji, “Mwaei Kwandanyo nguno: Igeere lugoni ne oo ne chaang'? Rani agoochini eng' eung'ung', ak inai ile anee Kwandang'ung'.”
14Kiteepsee Ahab kole, “Eng' ng'oo?” Kowol maotindet koleenji, “Mwaei Kwandanyo nguno: Eng' murenik che mengech che po kiptainigap emotinwek.” Kiteepsee, “Ng'oo ne tany pooryeet?” Koleenji, “Inyee.”
15Ki kwei anyun Ahab murenik che mengech che po kiptainigap emotinwek; ki piik bogol aeng' ak sosom ak aeng'. Yeityo kokwei alak tugul, piigap Israel tugul; ki piik eliphuusyek tisap. 16Ki mang'une peet kween, ye ki eei Ben-Hadad kobooto laitorinik sosom ak aeng' che ki mi ak ineendet kot koigen eng' emaisyekwak. 17Ki mang'une tai murenik che mengech che po kiptainigap emotinwek. Ki iyookto Ben-Hadad segeik, ak ki mwachi, “Mang'une piik eng' Samaria.”
18Koleenji, “Ngot komang'une agobo kaalyeet, onam kosabei; ngot komang'une agobo lugeet, onam kosabei.”
19Ki mang'une nganaseet murenik che mengech che po kiptainigap emotinwek, kosubi lugeet eng' let. 20Ki bar chii age tugul ne kibargei ak ineendet. Ki mwei piigap Syria, ko oon Israel, ago ki saruutigei Ben-Hadad laitoryatap Syria kotei paraisiit kobooto piik che tei paraisisyek. 21Ki mang' laitoryatap Israel ak ki iterteer paraisisyek ak charunee, ak ki bar che chaang' eng' piigap Syria. 22Ki nyoonji maotindet laitoryatap Israel koleenji, “Igimit itogung'ung' ak ibwaat komyee kiy ne imache iyai, amu eng' kenyiit ne isubi koweek laitoryatap Syria kobargei ak inyee.”
23Ki leenji kiptainigap laitoryatap Syria ineendet, “Kamuktaikwak ko kamuktaigap tuloonook; nooto ko amu ki koterteerech. Obargei ak eng' komoswek che litit, si tuun keterteer icheek. 24Yai niito: isto laitorinik tugul eng' poisyekwak, ak iweekyi icheek kiptainik alak. 25Iyum lugeet ne uu ne ki ibestoechin—paraisiit eng' paraisiit, charunee eng' charunee—ak ibargei ak Israel eng' komoswek che litit. Si tuun keegu kimnotik.” Ki kas icheek ak koyai uu nooto.
26Eng' kenyiit ne isubi, ki iyum Ben-Hadad piigap Syria ak ki togos Apek si kobargei ak Israel. 27Ye ki kiyum lagogap Israel ak kigoochi amitwogik, ki mang'une si kotorook. Ki teech Israel kobargei ak ko uu osotwek aeng' che mengech che po ng'oroik, ago ki noomei piigap Syria emet.
28Ki nyoonji chiitap Kamuktaindet laitoryatap Israel koleenji, “Mwaei Kwandanyo nguno: Amu le piigap Syria Kamuktaindet ne Toroor ko kamuktaindetap tuloonook, ma po atebwosyek, agoochini lugoni tugul ne oo eng' eung'ung', ak inai ile anee Kwandang'ung'.”
29Ki teech kobargei betusyek tisap; eng' peetuut ne po tisap kotany pooryeet. Ki bar lagogap Israel murenigap Syria che bendi kongeten, bogol eliphuusyek, eng' betut agenge. 30Ki mwei alak koba Apek, ole ki butyo irimeet eng' piik tiptem ak tisap eliphuusyek. Ki mwei Ben-Hadad koba nganaseet ak koun eng' koot ne mi ying'.
31Ki leenji otwogikyik, “Kagikas keele laitorinigap kootap laitoryatap Israel ko che rireegei. Keba ole mi laitoryatap Israel kelaach kuniet eng' kwenutosyekyok ak koroito eng' metoisyekyok; tamangap kosar saboondang'ung'.”
32Ki laach kuniet eng' kwenutosyekwak ak koroito eng' metoisyekwak, kobwa ole mi laitoryatap Israel ak kosaaei, “Leenji otwogindeng'ung' Ben-Hadad, ‘Kaigai asob.’” Kowol koleenji, “Sobei tai? Ko tupchennyu.”
33Ki nam pichooto nooto ko uu kiy ne myee, ak korwai konam ng'olyoondennyi. Koleenji, “Ee, tupcheng'ung' Ben-Hadad!” Koleenji laitoryat, “Oba, omut ineendet.” Ki mang' Ben-Hadad, ak ki toochi Ahab kolaany charunee.
34Koleenji Ben-Hadad, “Aweektoiwo nganasook che ki ip kwandanyu eng' kwandang'ung', ak imuuchi iyai akwotisyekyuk eng' Damascus, ko uu ye ki yai kwandanyu eng' Samaria.” Koleenji Ahab, “Eng' ng'aleechu atyachin.” Ki yai arorutyet kobooto ineendet ak koisto kwo.
Ng'alaaljin Maotindet Laitoryat
35Eng' ng'olyootap Kwandanyo, ki leenji age eng' lagogap maotik chorwennyi, “Kaigai iguot anee.” Ago ki sese chiito koguot ineendet.
36Koleenji maotindet, “Amu ma iisye kutitap Kwandanyo, ye iwe eng' anee kobar ng'etundo. Ye ki wo chiito, ki nyoor ng'etundo ak kobar.”
37Ki nyoor maotindet chiito age ak koleenji, “Kaigai iguot anee.” Ki guot chiito ineendet ak koriich.
38Yeityo kotonone maotindet eng' ooreet koigeni laitoryat, kowalilegei ak kolaach konyekyik ngoryeet. 39Ye ki bata laitoryat, kochot maotiindet, koleenji, “Ki wo otwogindeng'ung' ole mi lugeet, ak koweigei chiito age, komutwo chiito ne luulen, ak koleenji, ‘Riip chiito ne. Ngot kobet, koek saboondang'ung' agobo saboondanyi, anan igoito pounik ne po fedha che tamanwogik tisap ak mut.’ 40Ago ye ki boisye otwogindeng'ung' yu ak yu, koistogei chiito.” Koleenji laitoryatap Israel, “Nooto kirwoogeng'ung'; kitil inyee ineegei.”
41Korwai maotiindet koisto ngoroindo eng' koonyek, ak konai laitoryatap Israel kole ineendet ko agenge eng' maotik.
42Koleenji laitoryat, “Ni ne mwaei Kwandanyo: Amu kityaach chiito ne ki andoi ko ng'emisyet, koek saboondang'ung' agobo saboondanyi, ak piiguk agobo piikyik.”
43Ki wo laitoryatap Israel koonnyi, ko nyigiis muguleldanyi ak konereech, ak koweeksei Samaria.