Mach Ahab Mbareetap Divaik ne po Naboth
Ma chamei Nabot koaal mbareetap divaik ne po kaptilyonutennyi, kou nooto koyai Jesebel rugutyet, piik aeng' che soksei, ak kemuch Nabot koik. Ki wo Ahab konam emet ak konyoorunee Elijah, kobooto ng'olyootap Kwandanyo agobo sesenik ak korotiik. Ki rugutkei, ak kitei kirwooget agoi weeriinnyi.
Ng'alaali Kwandanyo eng' mustarisyek 18–19, 21–24, 29
21 1Yeityo tuguuchu, ki tinye Nabot Jesreelyot mbareetap divaik eng' Jezreel, ne neegit koo ne oo ne po Ahab laitoryatap Samaria. 2Ki leenji Ahab Nabot, “Koono mbareeng'ung' ne po divaik koek kabungui, amu neegit koonnyu. Agoonin mbareetap divaik ne karaaran kosiir, anan ngot imache, alyennyi eng' fedha.”
3Kowolji Nabot Ahab, “Mageela! Eng' taitap Kwandanyo, magoonin poroteetap kwandaikyuk!” a a v3 Eng' ng'atutyetap Kwandanyo, ki emetap kaa koigei kiiyit ne kigiriipe ne ki igochoretoi eng' ibinwek tugul, ak ma ki nyolu koaldakei koigeny; ki ma suul Naboth amu menoteet, ago amu ko po iman.
4Ki wo Ahab koonnyi eng' muguleldo ne nyigiis agobo ng'aleegap Nabot Jesreelyot, ne ki le, “Magoonin poroteetap kwandaikyuk.” Ki ru eng' kitennyi, ak konereechi tainnyi, ak ko ma cham koam. 5Ki nyo osotyonnyi Jesebel ak kotebee, “Amune si nyigiis muguleldang'ung' kot ma iame?”
6Kowolji kole, “Ki aleenji Nabot Jesreelyot, ‘Chamwo aal mbareeng'ung' ne po divaik, anan ngot imache, agoonin age kowalak,’ ago ki le, ‘Magoonin mbareennyu ne po divaik.’ ”
7Ki leenji osotyonnyi Jesebel, “Uu ni laitornateng'ung' eng' Israel? Ing'eet, iam, ak iboiboi—agoonin mbareetap divaik ne po Nabot Jesreelyot.”
8Ki sir baruanik eng' kainetap Ahab, ak koing'ooch ng'ooksennyi, ak koyookto poisyek ak che taagunotiin che menyei ak Nabot eng' nganasennyi. 9Ki sir eng' baruanik koleenji, “Omwaite korugutkei ak onde Nabot taitap piik. 10Onde piik aeng' che njaamik ne tononchinigei si kobaoryanji, koleenji, ‘Ki ichotis Kamuktaindet ak laitoryat.’ Oibu saang' ak olach koik kot kome.”
11Ki yai piigap nganasennyi, poisyek ak che taagunotiin che menyei yooto, ko uu ye ki ng'at Jesebel eng' baruanik che ki koyookto. 12Ki mwaita korugutkei ak konde Nabot taitap piik. 13Ki nyo piik aeng' che njaamik, kotebee tononchinigei, ak kobaoryanji Nabot eng' taitap piik, koleenji, “Ki ichotis Nabot Kamuktaindet ak laitoryat.” Yeityo koibu saang'utap nganaseet ak kolach koik kot kome. 14Yeityo koyookto ng'olyoot Jesebel, koleenji, “Kagelach Nabot koik kome.”
15Kingo kas Jesebel keele kagelach Nabot koik kome, koleenji Ahab, “Ing'eet, inam mbareetap divaik ne po Nabot Jesreelyot ne ki ma cham koalda. Ma sabei Nabot—kagome.”
16Kingo kas Ahab keele kagome Nabot, ki ing'eet ak kochoorugei si konam mbareetap divaik ne po Nabot Jesreelyot.
17Yeityo konyo ng'olyootap Kwandanyo Elijah Tisbinindet, koleenji:
18“Ing'eet, iwe ole mi Ahab laitoryatap Israel eng' Samaria si ituiye. Miitei eng' mbareetap divaik ne po Nabot, ne kiga choorugei si konam. 19Ileenji, ‘Kamwa ko uu ni Kwandanyo: Ki ibar chii ak kora inam mogornatennyi?’ Yeityo ileen, ‘Kamwa ko uu ni Kwandanyo: Ole ki meel sesenik korotiikyik Nabot, komeel korotiguk inyee—ee, inyegei.’ ”
20Ki leenji Ahab Elijah, “Kaanyoorun anyun, puunyoonnyu!” Kowolji kole, “Kaanyoorun, amu kaildaagei si iyai yaityet eng' taitap Kwandanyo.”
21“Abunji yaityet, awong'in, ak atil eng' Ahab murenik tugul eng' Israel, kobooto otwogik ak piik che boigeen. 22Ayai anyun koong'ung' ko uu kootap Jeroboam weeriitap Nebat, ak ko uu kootap Baasha weeriitap Ahija, amu kitach koam ng'etkondanyu ak ibeete Israel si koyai tengekto.” 23Ak kora agobo Jesebel ko ki mwa Kwandanyo, koleenji, “Koam sesenik Jesebel eng' king'etap Jezreel. 24Ineendet ne po kap Ahab ne mechin nganaseet, koamei sesenik, ak ineendet ne mechin timiin, koamei toriitik che po parak.”
25Ma mi chiito ne ki koigei Ahab, ne ki ildaagei si koyai yaityet eng' taitap Kwandanyo, ne ki ichirchir osotyonnyi Jesebel. 26Ki yai tuguuk che kiwechei miising', kotogostoi kamuktaik che teer ko uu Amorik, che ki koisto Kwandanyo eng' taitap piigap Israel.
27Kingo kas Ahab ng'aleechu, ki gereer ngoroikyik, ak kogermenegei kuniok eng' poortanyi, ak korugutkei, ak koru eng' kuniok, ak kowendoti eng' muguleldo ne iik.
28Yeityo konyo ng'olyootap Kwandanyo Elijah Tisbinindet, koleenji:
29“Kaigeer ole kaming'ingei Ahab eng' tainnyu? Amu kaming'ingei eng' tainnyu, magabunji yaityet eng' peetuusyekyik; abunji koonnyi eng' peetuusyek che po weeriinnyi.”