Ahab Ya Yi Kwaɗayin Gonar Inabin Nabot

Nabot ba zai sayar da gonar inabin iyalinsa ba, sai Yezebel ta shirya azumi, da maƙaryata biyu da aka biya, da jifa. Ahab ya gangara don ya mallaki ƙasar sai ya gamu da Iliya a maimakon haka, da maganar Ubanmu game da karnuka da jini. Ya yi azumi, aka kuma jinkirta hukuncin har zuwa ga ɗansa.

Babi na 21.

Bayan waɗannan abubuwa, Nabot mutumin Yezireyel yana da gonar inabi a Yezireyel, kusa da fadar Ahab sarkin Samariya. Ahab ya ce wa Nabot, “Ka ba ni gonar inabinka in mai da ita lambun kayan lambu, gama tana kusa da gidana. Zan ba ka wata gonar inabi mafi kyau, ko kuma in ka fi so, zan biya ka kuɗinta da azurfa.”

Nabot ya amsa wa Ahab ya ce, “Faufau! A gaban Ubanmu, ba zan taɓa ba ka gādon kakannina ba!” ^a

Ahab ya tafi gida da fushi da ɓacin rai saboda maganar da Nabot mutumin Yezireyel ya yi, cewa, “Ba zan ba ka gādon kakannina ba.” Ya kwanta a gadonsa, ya juya fuskarsa, ya kuma ƙi ci. Matarsa Yezebel ta zo ta tambaye shi, “Me ya sa kake baƙin ciki har ka ƙi ci?”

Ya amsa ya ce, “Na ce wa Nabot mutumin Yezireyel, ‘Bari in sayi gonar inabinka, ko kuma in ka fi so, in musanya maka da wata,’ amma ya ce, ‘Ba zan ba ka gonar inabina ba.’”

Matarsa Yezebel ta ce masa, “Haka kake mulkin Isra'ila? Ka tashi, ka ci abinci, ka kuma faranta ranka. Ni zan ba ka gonar inabin Nabot mutumin Yezireyel.”

Ta rubuta wasiƙu da sunan Ahab, ta kuma hatimce su da hatiminsa, ta aika su ga dattawa da manyan gari waɗanda suke zama tare da Nabot a birninsa. A cikin wasiƙun ta rubuta, “Ku yi shelar azumi, ku zaunar da Nabot a gaba a cikin mutane. Ku zaunar da mugaye biyu ɗaura da shi, su ba da shaida a kansa, su ce, ‘Ka zagi Allah da sarki.’ Sa'an nan ku fitar da shi waje ku jajjefe shi da duwatsu har yă mutu.”

Mutanen birninsa, dattawa da manyan gari waɗanda suke zama a wurin, suka yi kamar yadda Yezebel ta umarce su a cikin wasiƙun da ta aika musu. Suka yi shelar azumi, suka zaunar da Nabot a gaba a cikin mutane. Mugaye biyu suka zo, suka zauna ɗaura da shi, suka ba da shaida a kan Nabot a gaban mutane, suka ce, “Nabot ya zagi Allah da sarki.” Sa'an nan suka fitar da shi bayan birnin suka jajjefe shi da duwatsu har ya mutu. Sa'an nan suka aika saƙo zuwa ga Yezebel, cewa, “An jajjefi Nabot har ya mutu.”

Da Yezebel ta ji an jajjefi Nabot har ya mutu, sai ta ce wa Ahab, “Ka tashi, ka mallaki gonar inabin Nabot mutumin Yezireyel wadda ya ƙi ya sayar maka. Nabot ba shi da rai, ya mutu.”

Da Ahab ya ji Nabot ya mutu, sai ya tashi ya gangara domin ya mallaki gonar inabin Nabot mutumin Yezireyel.

Sai maganar Ubanmu ta zo wa Iliya mutumin Tishbe, cewa,

“Ka tashi, ka gangara ka taryi Ahab sarkin Isra'ila wanda yake a Samariya. Yana a gonar inabin Nabot, ya gangara domin ya mallake ta. Ka ce masa, ‘Ga abin da Ubanmu ya ce, Ka yi kisan kai, ka kuma ƙwace mallakarsa?’ Sa'an nan ka ce, ‘Ga abin da Ubanmu ya ce, A inda karnuka suka lashe jinin Nabot, a can ma za su lashe naka, I, naka.’”

Ahab ya ce wa Iliya, “Ka same ni ke nan, ya maƙiyina!” Ya amsa ya ce, “Na same ka, domin ka sayar da kanka ga aikata mugunta a gaban Ubanmu.”

“Zan kawo maka masifa, zan cinye ka, zan kuma datse daga gidan Ahab dukan namiji a cikin Isra'ila, bawa da 'yantacce. Zan mai da gidanka kamar gidan Yerobowam ɗan Nebat, da kuma kamar gidan Ba'asha ɗan Ahiya, domin ka husata ni, ka kuma sa Isra'ila ta yi zunubi.’” Game da Yezebel kuma Ubanmu ya yi magana, cewa, “Karnuka za su cinye Yezebel kusa da katangar Yezireyel. Duk wanda yake na Ahab wanda ya mutu a cikin birni, karnuka za su cinye shi, kuma duk wanda ya mutu a jeji, tsuntsayen sama za su cinye shi.”

Babu wani kamar Ahab, wanda ya sayar da kansa ga aikata mugunta a gaban Ubanmu, wanda matarsa Yezebel ta zuga shi. Ya aikata abin ƙyama ƙwarai, yana bin gumaka kamar Amoriyawa, waɗanda Ubanmu ya kore su a gaban Isra'ila.

Da Ahab ya ji waɗannan kalmomi, sai ya yage tufafinsa, ya sa tufafin makoki a jikinsa, ya yi azumi, ya kwanta cikin tufafin makoki, yana kuma tafiya da baƙin ciki.

Sai maganar Ubanmu ta zo wa Iliya mutumin Tishbe, cewa,

“Ka ga yadda Ahab ya ƙasƙantar da kansa a gabana? Domin ya ƙasƙantar da kansa a gabana, ba zan kawo masifa a zamaninsa ba; zan kawo ta a kan gidansa a zamanin ɗansa.”