1 ነገሥት 21

21 ¹ከዚህ በኋላ ይዝራኤላዊው ናቡቴ በይዝራኤል፣ በሰማርያው ንጉሥ በአክዓብ ቤተ መንግሥት አጠገብ የወይን ተክል ነበረው። ²አክዓብም ናቡቴን እንዲህ አለው፤ “የወይን ተክልህ ከቤቴ አጠገብ ስለሆነ፣ የአትክልት ቦታ እንዲሆንልኝ ስጠኝ፤ በምትኩ የተሻለ የወይን ተክል እሰጥሃለሁ፤ ብትወድም ዋጋውን በብር እከፍልሃለሁ።”

³ናቡቴ ግን አክዓብን፣ “በፍጹም! በአባታችን ፊት የአባቶቼን ርስት ለአንተ አልሰጥም!” ብሎ መለሰለት። ^a a v3 በአባታችን ሕግ መሠረት፣ የቤተ ሰብ መሬት ከትውልድ ወደ ትውልድ የሚተላለፍ ዘላቂ አደራ ነበር፤ ለዘላለምም ተሽጦ መለቀቅ አይገባውም ነበር፤ ናቡቴ እምቢ ያለው በግትርነት ሳይሆን በታማኝነት ነው።

⁴ይዝራኤላዊው ናቡቴ፣ “የአባቶቼን ርስት አልሰጥህም” ስላለው፣ አክዓብ አኵርፎና ተቈጥቶ ወደ ቤቱ ሄደ፤ በዐልጋውም ላይ ተኝቶ ፊቱን መለሰ፤ መብላትም እምቢ አለ። ⁵ሚስቱ ኤልዛቤልም መጥታ፣ “እንዲህ አኵርፈህ መብላት እምቢ ያልኸው ለምንድን ነው?” ብላ ጠየቀችው።

⁶እርሱም፣ “ይዝራኤላዊውን ናቡቴን፣ ‘የወይን ተክልህን ሽጥልኝ፤ ወይም ብትወድ በሌላ የወይን ተክል እለውጥልሃለሁ’ ብዬ ነገርሁት፤ እርሱ ግን፣ ‘የወይን ተክሌን አልሰጥህም’ አለኝ” ብሎ መለሰላት።

⁷ሚስቱ ኤልዛቤልም፣ “በእስራኤል ላይ የምትነግሠው እንዲህ ነውን? ተነሥተህ እንጀራ ብላ፤ ደስም ይበልህ፤ የይዝራኤላዊውን የናቡቴን የወይን ተክል እሰጥሃለሁ” አለችው።

⁸በአክዓብም ስም ደብዳቤዎችን ጻፈች፤ በማኅተሙም አተመቻቸው፤ ከናቡቴ ጋራ በከተማው ለሚኖሩ ሽማግሌዎችና መኳንንትም ላከች። ⁹በደብዳቤዎቹም እንዲህ ብላ ጻፈች፤ “ጾም ዐውጁ፤ ናቡቴንም በሕዝቡ ፊት በከፍተኛ ስፍራ አስቀምጡት። ¹⁰ሁለት ወስላታ ሰዎችን በፊቱ አስቀምጡ፤ ‘እግዚአብሔርንና ንጉሡን ረገምህ’ ብለው በእርሱ ላይ ይመስክሩበት፤ ከዚያም አውጥታችሁ በድንጋይ ወግራችሁ ግደሉት።”

¹¹የከተማውም ሰዎች፣ በዚያ የሚኖሩት ሽማግሌዎችና መኳንንት፣ ኤልዛቤል በላከችላቸው ደብዳቤዎች ባዘዘቻቸው መሠረት አደረጉ። ¹²ጾም ዐወጁ፤ ናቡቴንም በሕዝቡ ፊት በከፍተኛ ስፍራ አስቀመጡት። ¹³ሁለት ወስላታ ሰዎችም መጥተው በፊቱ ተቀመጡ፤ በሕዝቡም ፊት በናቡቴ ላይ፣ “ናቡቴ እግዚአብሔርንና ንጉሡን ረገመ” ብለው መሰከሩበት፤ ከዚያም ከከተማው ውጭ አውጥተው በድንጋይ ወግረው ገደሉት። ¹⁴ከዚያም ለኤልዛቤል፣ “ናቡቴ በድንጋይ ተወግሮ ሞተ” ብለው ላኩ።

¹⁵ኤልዛቤልም ናቡቴ በድንጋይ ተወግሮ መሞቱን በሰማች ጊዜ አክዓብን፣ “ተነሥተህ ይዝራኤላዊው ናቡቴ ሊሸጥልህ እምቢ ያለውን የወይን ተክል ውረስ፤ ናቡቴ ሞቷል እንጂ በሕይወት የለም” አለችው።

¹⁶አክዓብም ናቡቴ መሞቱን በሰማ ጊዜ፣ የይዝራኤላዊውን የናቡቴን የወይን ተክል ይወርስ ዘንድ ተነሥቶ ወረደ።

¹⁷የአባታችንም ቃል ወደ ቴስብያዊው ኤልያስ እንዲህ ሲል መጣ፤

¹⁸“ተነሥተህ በሰማርያ ያለውን የእስራኤልን ንጉሥ አክዓብን ልትቀበለው ውረድ፤ የናቡቴን የወይን ተክል ሊወርስ ወርዶ በዚያ አለ። ¹⁹እንዲህም በለው፤ ‘አባታችን እንዲህ ይላል፤ ገድለህ ደግሞ ርስቱን ወሰድህን?’ ከዚያም እንዲህ በለው፤ ‘አባታችን እንዲህ ይላል፤ ውሾች የናቡቴን ደም በላሱበት ስፍራ፣ ደምህን እነርሱው ይልሳሉ፤ አዎን፣ ደምህን።’”

²⁰አክዓብም ኤልያስን፣ “ጠላቴ ሆይ፣ አገኘኸኝን?” አለው። እርሱም፣ “በአባታችን ፊት ክፉ ለማድረግ ራስህን ስለ ሸጥህ አግኝቼሃለሁ” አለው።

²¹“እነሆ፣ በአንተ ላይ መዓትን አመጣለሁ፤ አጠፋህማለሁ፤ በእስራኤልም ያለውን፣ ባሪያም ነጻም የሆነውን ወንድ ሁሉ ከአክዓብ አስወግዳለሁ። ²²“ወደ ቍጣ ስላስነሣኸኝ፣ እስራኤልንም ስላስኀጠእህ፣ ቤትህን እንደ ናባጥ ልጅ እንደ ኢዮርብዓም ቤት፣ እንደ አኪያ ልጅ እንደ ባኦስም ቤት አደርገዋለሁ።” ²³ስለ ኤልዛቤልም አባታችን እንዲህ ሲል ተናገረ፤ “ውሾች ኤልዛቤልን በይዝራኤል ቅጥር አጠገብ ይበሏታል። ²⁴ከአክዓብ ወገን የሆነ፣ በከተማ የሚሞተውን ውሾች ይበሉታል፤ በሜዳ የሚሞተውንም የሰማይ ወፎች ይበሉታል።”

²⁵በአባታችን ፊት ክፉ ለማድረግ ራሱን እንደ ሸጠ እንደ አክዓብ ያለ አልነበረም፤ ሚስቱ ኤልዛቤልም አነሣሣችው። ²⁶አባታችን ከእስራኤል ፊት እንዳሳደዳቸው እንደ አሞራውያን ጣዖታትን እየተከተለ እጅግ አስጸያፊ ሥራ ሠራ።

²⁷አክዓብም ይህን ቃል በሰማ ጊዜ ልብሱን ቀደደ፤ ሰውነቱንም በማቅ ከደነ፤ ጾመ፤ በማቅም ተኛ፤ በሐዘንም ይመላለስ ነበር።

²⁸የአባታችንም ቃል ወደ ቴስብያዊው ኤልያስ እንዲህ ሲል መጣ፤

²⁹“አክዓብ በፊቴ እንዴት ራሱን እንዳዋረደ አየህን? በፊቴ ራሱን ስላዋረደ፣ መዓቱን በእርሱ ዘመን አላመጣም፤ በልጁ ዘመን ግን በቤቱ ላይ አመጣዋለሁ።”