1ይ ነገስት 21 FHB Father's Heart Bible™

21 ¹ድሕሪ እዙይ ነገር፥ ናቦት ኢይዝራኤላዊ ኣብ ኢይዝራኤል፥ ኣብ ጥቓ ቤተ መንግስቲ ኣክኣብ ንጉስ ሰማርያ፥ ወይኒ ነበሮ። ²ኣክኣብ ከዓ ንናቦት ከምዙይ በሎ፦ “ወይንኻ ኣታኽልቲ ሓምሊ ክኾነኒ ሃበኒ፤ ናብ ጥቓ ቤተይ እዩ እሞ። ኣነ ድማ ካብኡ ዝበለፀ ወይኒ ክህበካ እየ፤ እንተ ደሊኻ ኸዓ ዋጋኡ ብሩር ክህበካ እየ።”

³ናቦት ከዓ ንኣክኣብ “ኣብ ቅድሚ ኣቦና፥ ርስቲ ኣቦታተይ ክህበካ ከቶ ኣይኸውንን!” ኢሉ መለሰሉ። ^a a v3 ብሕጊ ኣቦና፥ ምድሪ ስድራ ብውሉድ ወለዶ እናተመሓላለፈ ዝኸይድ ናይ ዘለኣለም ኣደራዕ ነበረ፥ ከቶ ድማ ንሓዋሩ ኣይሽየጥን ነበረ፤ ናቦት ከዓ ብትሪ ዘይኮነስ ብእሙንነት እዩ ዝኣበየ።

⁴ኣክኣብ ከዓ በቲ ናቦት ኢይዝራኤላዊ “ርስቲ ኣቦታተይ ኣይህበካን” ኢሉ ዝተዛረቦ ቓል፥ ጕህዩ ተቘጢዑ ናብ ቤቱ ኸደ። ኣብ ዓራቱ ደቂሱ ድማ ገፁ መለሰ፤ እንጀራ ኸዓ ኣበየ። ⁵ኤልዛቤል ሰበይቱ ድማ መፂኣ “ስለ ምንታይ ጕሂኻ እንጀራ ዘይትበልዕ?” በለቶ።

⁶ንሱ ኸዓ “ንናቦት ኢይዝራኤላዊ፥ ‘ወይንኻ ክዕድገካ፥ እንተ ደሊኻ ድማ ካልእ ክልውጠልካ’ በልክዎ፤ ንሱ ግና ‘ወይነይ ኣይህበካን’ በለ” ኢሉ መለሰ።

⁷ኤልዛቤል ሰበይቱ ድማ “ንስኻ ኣብ ልዕሊ እስራኤል እትነግስ ከምዙይ ዲኻ? ተሲእካ እንጀራ ብላዕ፤ ልብኻ ይተሓጐስ፤ ኣነ ንወይኒ ናቦት ኢይዝራኤላዊ ክህበካ እየ” በለቶ።

⁸በስም ኣክኣብ ደብዳቤታት ፀሓፈት፤ ብማሕተሙ ድማ ሓተመተን፤ ናብቶም ምስ ናቦት ኣብ ከተማኡ ዝነብሩ ዓበይትን ክቡራትን ድማ ሰደደተን። ⁹ኣብተን ደብዳቤታት ድማ ከምዙይ ኢላ ፀሓፈት፦ “ፆም ኣውጁ፤ ንናቦት ድማ ኣብ ቅድሚ እቲ ህዝቢ ኣቐምጥዎ። ¹⁰ክልተ ዘይረብሑ ሰባት ድማ ‘ንእግዚኣብሄርን ንንጉስን ረጊምካ ኢኻ’ ኢሎም ምእንቲ ክምስክርሉ፥ ኣብ ቅድሚኡ ኣቐመጥዎም። ሽዑ ናብ ወፃኢ ኣውፂእኹም ብእምኒ ቐጥቂጥኩም ቕተልዎ።”

¹¹እቶም ሰብ ከተማኡ፥ እቶም ኣብኡ ዝነብሩ ዓበይትን ክቡራትን ድማ፥ ከምቲ ኤልዛቤል ኣብተን ዝሰደደትሎም ደብዳቤታት ዝኣዘዘቶም ገበሩ። ¹²ፆም ኣወጁ፤ ንናቦት ድማ ኣብ ቅድሚ እቲ ህዝቢ ኣቐመጥዎ። ¹³ክልተ ዘይረብሑ ሰባት ድማ መፂኦም ኣብ ቅድሚኡ ተቐመጡ፤ ኣብ ቅድሚ እቲ ህዝቢ ኸዓ “ናቦት ንእግዚኣብሄርን ንንጉስን ረገመ” ኢሎም ኣብ ናቦት መስከሩ። ሽዑ ናብ ወፃኢ ኸተማ ኣውፂኦም ብእምኒ ቐጥቂጦም ቀተልዎ። ¹⁴ሽዑ ናብ ኤልዛቤል “ናቦት ብእምኒ ተቐጥቂጡ ሞይቱ ኣሎ” ኢሎም ለኣኹ።

¹⁵ኤልዛቤል ናቦት ብእምኒ ተቐጥቂጡ ኸም ዝሞተ ምስ ሰምዐት፥ ንኣክኣብ “ተሲእካ ነቲ ናቦት ኢይዝራኤላዊ ኽሸጠልካ ዝኣበየካ ወይኒ ውረሶ፤ ናቦት ብህይወቱ የለን፥ ሞይቱ እዩ እሞ” በለቶ።

¹⁶ኣክኣብ ናቦት ከም ዝሞተ ምስ ሰምዐ፥ ተሲኡ ንወይኒ ናቦት ኢይዝራኤላዊ ክወርሶ ወረደ።

¹⁷ሽዑ ናብ ኤልያስ ቴስቢያዊ ካብ ኣቦና ከምዙይ ዝብል ቃል መፀ፦

¹⁸“ተሲእካ ንኣክኣብ ንጉስ እስራኤል ኣብ ሰማርያ ክትረኽቦ ውረድ። እንሆ፥ ኣብ ወይኒ ናቦት ኣሎ፤ ክወርሶ ድማ ወሪዱ ኣሎ። ¹⁹ከምዙይ ድማ በሎ፦ ‘ኣቦና ከምዙይ ይብል ኣሎ፦ ቀቲልካዶ ርስቱ ድማ ወሲድካ?’ ሽዑ ድማ ‘ኣቦና ከምዙይ ይብል ኣሎ፦ ኣብቲ ኣኽላባት ደም ናቦት ዝለሓስሉ ቦታ፥ ንደምካ ኣብኡ ኽለሓስዎ እዮም፤ እወ፥ ንደምካ’ በሎ።”

²⁰ኣክኣብ ከዓ ንኤልያስ “ኦ ፀላእየይ፥ ረኺብካንስ!” በሎ። ንሱ ኸዓ “ኣብ ቅድሚ ኣቦና ክፉእ ክትገብር ንርእስኻ ስለ ዝሸጥካያ፥ ረኺበካ” ኢሉ መለሰ።

²¹“እንሆ፥ ኣባኻ መከራ ከምፅእ፥ ክፀርገካ፥ ካብ ኣክኣብ ድማ ኣብ እስራኤል ዘሎ ነፍሲ ወከፍ ተባዕታይ፥ ባርያ ኾነ ናፃ ከጥፍእ እየ። ²²ንገዛኻ ድማ ከም ገዛ ኢዮርብዓም ወዲ ናባጥን ከም ገዛ ባኦስ ወዲ ኣኪያን ክገብራ እየ፤ ንስኻ ስለ ዘቘጣዕካንን ንእስራኤል ስለ ዘስሓትካን።” ²³ብዛዕባ ኤልዛቤል ድማ ኣቦና ከምዙይ ተዛረበ፦ “ኣኽላባት ንኤልዛቤል ኣብ ጥቓ መንደቕ ኢይዝራኤል ክበልዕዋ እዮም። ²⁴ነቲ ካብ ወገን ኣክኣብ ኣብ ከተማ ዝመውት፥ ኣኽላባት እዮም ዝበልዕዎ፤ ነቲ ኣብ መሮር ዝመውት ከዓ፥ ኣዕዋፍ ሰማይ እየን ዝበልዓኦ።”

²⁵ከም ኣክኣብ ዝበለ ሓደ እኳ ኣይነበረን፤ ንሱ ብሰበይቱ ብኤልዛቤል ተለዓዒሉ፥ ኣብ ቅድሚ ኣቦና ክፉእ ክገብር ንርእሱ ዝሸጠ ነበረ። ²⁶ንሱ ኸምቶም ኣቦና ካብ ቅድሚ እስራኤል ዝሰጐጎም ኣሞራውያን፥ ንጣዖታት እናሰዓበ፥ ኣዝዩ ዘፅይፍ ነገር ገበረ።

²⁷ኣክኣብ ነዝ ቓል እዙይ ምስ ሰምዐ፥ ክዳውንቱ ቐደደ፤ ኣብ ስጋኡ ወጮ ተኸድነ፤ ፆመ፤ ብወጮ ደቀሰ፤ ጕህዩ ኸዓ ይመላለስ ነበረ።

²⁸ሽዑ ናብ ኤልያስ ቴስቢያዊ ካብ ኣቦና ከምዙይ ዝብል ቃል መፀ፦

²⁹“ኣክኣብ ኣብ ቅድመይ ርእሱ ኸም ዘትሓተ ረአኻዶ? ኣብ ቅድመይ ርእሱ ስለ ዘትሓተ፥ በ ዘመኑ መከራ ኣየምፅእን እየ፤ ኣብ ዘመን ወዱ ግና ኣብ ቤቱ ኸምፅኦ እየ።”