1 Wungnaobing 21

21 ¹Hi ot saikorawui thili Samariawui awunga Ahabwui konungwui nganaili Jezreelpa Nabothwui Jezreelli drakhā yāmgui akha leisai. ²Ahabna Nabothli hānga, "Nawui drakhā yāmgui chi hanthing-hanrā yāmgui sākhavai ili khamilu, kaja hi iwui shimli nganaihaira. Ina nali phāmei drakhā yāmgui akha mira, lah nana mangachee kaje, lupāsā eina chiwui aman mira."

³Nabothna Ahabli ngahānkai, "Ithumwui Avāwui mangāli iwui avāva̱ ngarāwui shimlui chi nali katongla makhamira!" ^a a v3 ithumwui Avāwui ain athishurda, shimkhurwui ngalei chi khazua khazuali khamitha̱ katang mavaiwui kagasona, kala katangla mayorsang khavai maningmana; Nabothna ninghārarwui vang maningla, ngavaptitwui vang eina mamayāmana.

⁴Jezreelpa Nabothna, "Iwui avāva̱ ngarāwui shimlui chi nali makhamira" da hāngkahai tuiwui vang eina, Ahab ning khājir wukkhananglak eina awui shimli unghaowa. Ana awui petli pilaga mai ngareiunghaida kashazā mamayāmana. ⁵Awui preiva̱ Jezebelna rāda ahāna, "Khisāda na ning khājir wukkhananglak eina mazākhala?"

⁶Ana ngahānkai, "Ina Jezreelpa Nabothli hānga, 'Nawui drakhā yāmgui chi ina lokhuiga, lah nana mangachee kaje, chiwui mahutle khangatei drakhā yāmgui akha mira,' kha ana, 'Iwui drakhā yāmgui chi nali makhamira' da hānga."

⁷Awui preiva̱ Jezebelna hānga, "Na Israelli hithāda sāda mungla? Ngakarthuida shailu, kala nawui ning mathānlu. Jezreelpa Nabothwui drakhā yāmgui chi ina nali mira."

⁸Ana Ahabwui ming eina chithi kapida awui seal eina mahor namlaga awui keinungli Nabothli ngasoda pam khalei khararnaobing eina khangambingli chihovāserhaowa. ⁹Chithili ana hithāda kapida: "Kakhum akha vaosanglu, kala mibingwui khareili Nabothli pamngasaklu. ¹⁰Ali makhamayā shākhi sākhavai makānkhanā mi khani ali kāroda pamngasaklu: 'Nana Vare eina awunga chili khonshihaira.' Chieina ali shimen thānshoklaga lunggui eina horthatlu."

¹¹Awui keinungwui mibing, chili pam khalei khararnaobing eina khangambingna, Jezebelna athumli chihovā chithili kahāng athishurda sai. ¹²Athumna kakhum akha vaosangda mibingwui khareili Nabothli pamngasaka. ¹³Makānkhanā mi khani rāda ali yangkhangasung eina pama, kala mibingwui mangāli Nabothli makhamayā shākhi sāda hānga: "Nabothna Vare eina awunga chili khonshihaira." Chieina athumna ali keinungwui ayarli thānshoklaga lunggui eina horthatta shaothathaowa. ¹⁴Chieina athumna Jezebelli pao chihovāda, "Nabothli lunggui eina horthatta shaothathaira" da hānga.

¹⁵Nabothli lunggui eina horthatta shaothathaira kaji Jezebelna kashā eina, ana Ahabli hānga, "Ngakarthuida Jezreelpa Nabothna nali yorsang khavai mamayā drakhā yāmgui chi khuiphunglu. Naboth maringmana, a thihaira."

¹⁶Naboth thihaira kaji Ahabna kashā eina Jezreelpa Nabothwui drakhā yāmgui chi khuikhavai ngakarthuida tunhaowa.

¹⁷Chieina ithumwui Avāwui tui china Tishbewui Elijahli rāhānga:

¹⁸Ngakarthuilu, Samariali khalei Israelwui awunga Ahabli ungsamphang khavai tunglu. Ana Nabothwui yāmgui chi sāman khuikhavai tunglaga chili leida lei. ¹⁹Ali unghānglu, 'Ithumwui Avāna hithāda hānga: Nana mi shaothatta, kala awui lan seizatlā?' Chieina hānglu, 'Ithumwui Avāna hithāda hānga: Fana Nabothwui ashee rāmalek apam chili, athumna nawui asheela malekra—mha, nawuina.'

²⁰Ahabna Elijahli hānga, "Iwui yangkashe, nana ili phaihaira lā!" Ana ngahānkai, "Nana ithumwui Avāwui mikyanli makaphā sākhavai na khalatta yorsang kahaiwui vang ina nali phaihaira."

²¹"Ina nawuitungli makaphā khuirāmida, nali shimān ngasakchaora, kala Ahabwui eina Israelli khalei raobingla khān khaleibingla mayarnao kachiva̱ katathaora. ²²Nawui shimkhur Nebatwui naomayara Jeroboamwui shimkhur thāda, kala Ahijahwui naomayara Baashawui shimkhur thāngasakhaora, khikhalajila nana ili malungvāt ngasakta, kala Israelli morei sākhangasaka." ²³Kala Jezebelwui pongli ithumwui Avānala hānga, "Jezreelwui phākholi fabingna Jezebelli shaira. ²⁴Ahabshiwui mi keinungli kathebing chi fana shaira, kala khararli kathebing chi kazingramwui vānaobingna shaira."

²⁵Ahab thāda khipākha maleimana; apreiva̱ Jezebelna ning rāza̱ ngasakta ana ithumwui Avāwui mangāli makaphā sākhavai akhalatta yorsang kahaina. ²⁶Ithumwui Avāna Israelwui mangāli khuithui kahai Amornaobing thāda meoma̱ shurda, ana ningkakachai meikap eina ot sai.

²⁷Tui hi kashā tharan, Ahabna awui kachon serkhāklaga asāli bora ngavaida khumhaida borali pithaida ning suitālak eina okthuisai.

²⁸Chieina ithumwui Avāwui tui Tishbewui Elijahli rāhānga,

²⁹"Ahabna iwui mangāli hamkasang kahai chi nana theihairalā? Ana iwui mangāli hamkasangwui vang, awui atamli ina makaphā makhuirāmira; kha awui naomayarawui atamli awui shimkhurli chi khuirāmira."