1 Wungnaobing 22

22 ¹Zingkum kathum Aram eina Israelwui ngachaili rai maleimana. ²Kha kum kakathumali Judahwui awunga Jehoshaphatna Israelwui awungali tunga. ³Israelwui awungana awui raobingli hānga, "Ramoth-gilead ithumwuina kaji nathum thei, chithālala Aramwui awungawui pāng eina chi khuikhavai ithumna khiotkha masāmala?" ⁴Ana Jehoshaphatli ngahāna, "Nana I ngasoda Ramoth-gileadli rai sākhavai vārala?" Jehoshaphatna Israelwui awungali hānga, "I nava kathāna, iwui mibing nawui mibing kathāna, iwui sigui nawui sigui kathāna."

⁵Chieina Jehoshaphatna Israelwui awungali hānga, "Ina nali kapona, khare ithumwui Avāwui tui ngahānkhuilu."

⁶Chieina Israelwui awungana marān mi shāmati shakha kazipkhuilaga hānga, "Ramoth-gileadli rai vākhavai varakā, makasā phāmeirakhala?" Athumna hānga, "Vangararlu, kaja Proho Avāna awungawui pāngli horsangmira."

⁷Kha Jehoshaphatna hānga, "Hili aruila ngahānkhui khavai ithumwui Avāwui marān akha maleithula?"

⁸Israelwui awungana Jehoshaphatli hānga, "Ithumwui Avāli ngasanmi khavai Imlahwui nao Micaiah kaho mi akha aruila lei, kha ina alili yangkharinga; iwui vang ana atam kachida kaphā akha mamarānmimana, kalākashi maningla marānmi." Kha Jehoshaphatna hānga, "Awunga, chithāda mahāngmialu."

⁹Chieina Israelwui awungana otva̱ akhali kohokhuilaga, "Imlahwui nao Micaiahli thaklak eina hokhuilu" da hānga.

¹⁰Israelwui awunga kala Judahwui awunga Jehoshaphat ani aniwui wungnao sāri shaksālaga Samariawui kongvei ngaveili zangkhavai apamwui ranpumli aniwui wungpamkhongli pama; kala marān saikorana aniwui mangāli marānsai. ¹¹Kala Chenaanahwui nao Zedekiahna mariwui seingaji akha sākhuilaga "Varena hithāda hānga, 'Aramnaobing mashimān ngasakranglakha eina tangda nathumna hieina ngasoda muivāra'" da hānga. ¹²Marān saikorana chi tākam eina marānmisera, "Ramoth-gileadli vāda maikhayā ngasalu; kaja Varena awungawui pāngli horsangmira."

¹³Micaiahli akahopa china ali hānga, "Yanglu, marān saikorana khokkha sāda awungali maikhayā mira da ngashithaira. Nawui tui athumwui tui eina ngaraichaimilu; maikhayā mira da hānglu."

¹⁴Kha Micaiahna ngahānkai, "Ithumwui Avā ringda kahāngna, ithumwui Avāna ili kahāng chi ina hāngra."

¹⁵Awungawuili khavā chitharan awungana hānga, "Micaiah, Ramoth-gileadli ithumna ngararkhavai varakā, makasā phāmeirakhala?" Ana ngahānkai, "Vāda maikhayā ngasalu; ithumwui Avāna chi awungawui pāngli horsangmira."

¹⁶Awungana hānga, "Nana ithumwui Avāwui ming singda ili khamashung tui maningla hāngkhavai ina kayākhashida pohairakhala?"

¹⁷Ana hānga, "Israel saikorali kaphungli chaiyāng kahai, yaokahoma makhalei yao thāda, chi ina thei. Kala ithumwui Avāna, 'Hibing hi akhavā maleimana, kachichā shimli chingri eina latunghaoranu' da hānga."

¹⁸Israelwui awungana Jehoshaphatli hānga, "Ana iwui vang kalākashi maningla khamathā akha mamarānmimara da ina nali hāngkahai maningmala?"

¹⁹Micaiahna hānga, "Chieina ithumwui Avāwui tui shāmilu: Ina ithumwui Avā awui wungpamkhongli pamda, kazingramwui ashangva̱ saikora awui ngalemli, yāshong eina uishongli anganingda theiya.

²⁰Chieina ithumwui Avāna, 'Ahabli Ramoth-gileadli rai sālaga kongluira khavai khipāna asuira jikhala?' da hānga. Mi akhana akha da, kala khangateina khangatei da hānga.

²¹Chieina manglā akhana ithumwui Avāwui mangāli mangāshong rāda anganinglaga, 'Ina ali asuira,' da hānga.

²²Chieina ithumwui Avāna ali, 'Kathāda sārakhala?' da ngahāna. Ana hānga, 'Ina vālaga awui marānbing saikorawui khamorli kakapik manglā akha ngasakra.' Ithumwui Avāna hānga, 'Nana ali asuira ungshungra; vālu, chithāda vāsālu.'

²³Chiwui vang eina ara ithumwui Avāna nawui marānbing saikora hiwui khamorli kakapik manglā akha zanghaira, kala ithumwui Avāna nawui vang kalākashi hāngkhamihaira."

²⁴Chieina Chenaanahwui nao Zedekiahna shong vālaga Micaiahli amaisorli kapheda hānga, "Nali hāngkhavai Varewui Manglā china iwui eina kachishong lam shoklaga hongkhala?"

²⁵Micaiahna hānga, "Nana alung kāli zangyāmngathumthang theinaora."

²⁶Israelwui awungana kasoi, "Micaiahli tukkhuilaga, ali keinungwui rammunga Amon kala awungawui nao Joashwui pāngli khuivāmihaolu, ²⁷kala hānglu, 'Awungana kahāngna: Hi mipā phātop shimli zangkhuilaga, ina hapkakhano hanungranglakha eina tangda ali kashakazā kala tara̱ maningla mikhamilu.'"

²⁸Micaiahna hānga, "Nana hapkakhano hanungakha kaje, ithumwui Avāna iwui eina hāngkahai maningmana." Kala ana hānga, "Mibing saikora, nganākhuilu!"

Avāna Sāngngarānda Hāngkahai thāda Ahab Kongluihaora

²⁹Chieina Israelwui awunga kala Judahwui awunga Jehoshaphat, ani Ramoth-gileadli kālaga vai. ³⁰Israelwui awungana Jehoshaphatli hānga, "Ina azak ngacheikhuilaga raipamli vāra, nava wungsāri shaksāpapamlu." Chieina Israelwui awungana azak ngacheikhuilaga raipamli vāhaowa.

³¹Aramwui awungana awui siguigari kathānabing thumrāda khanili kasohaisai: "Kharei kateo khipālikha mangararalu; Israelwui awungali chimāng ngararlu."

³²Siguigari kathānabingna Jehoshaphatli theilaga, "Hi Israelwui awunga chinina" da hānglaga ali ngararkhavai ngareiunga; chieina Jehoshaphatna panglāk eina vaowa. ³³Siguigari kathānabingna Israelwui awunga maningmana da kathei eina, ali makharomluila latunghaowa. ³⁴Kha mi akhana malā eina arema kāpta Israelwui awungali chāngveiwui ngachai thikomli thaiphutsangmihaowa. Chiwui thili awungana awui siguigari kasingali hānga, "Ngareikhuida ili raipamwui eina khuithuihaolu, kaja ili khamā za̱haira." ³⁵Chithang rai khangarar pangshunhaida awungana siguigarili shailaga Syriawui raimili ngasungyanga. Ngazin eina a thihaowa. Awui khamāwui ashee siguigariwui azinglungli okhaowa. ³⁶Zimik katun eina rāmrahlungli khavao akha shoka, "Mi kachiva̱ akhalattawui keinungli unghaolu, mi kachiva̱ akhalattawui ngaleili unghaolu!"

³⁷Chithāda awunga thihaoda awunga chi Samariali khuivāhaowa, kala athumna awunga chi Samariali chifahaowa. ³⁸Ithumwui Avāna hānghaikasā athishurda athumna siguigari chi Samariawui ra̱khongli pheora, kala fabingna awui ashee malek, kala khayorva̱ sha̱naobingna apam chili ra̱vaira.

³⁹Ahabwui otsak sākahai kateibing, awui otmāng saikora, mafahā konung kala awui sākahai keinung saikora chi, Israel Awungabingwui Thotrinchān Lairikli makapiserhaimala? ⁴⁰Chithāda Ahab avāva̱ ngarāli ngasoda thihaowa, kala anaomayara Ahaziahna awui mahut thuishina.

Jehoshaphatna Avā Mangāli Zatmi

⁴¹Israelwui awunga Ahabwui mungda khamate kum, Asawui naomayara Jehoshaphatna Judahwui awunga sāphoka. ⁴²Jehoshaphatna mungkaphok tharan kum thumrāda phangā kāshunghairasai, kala Jerusalemli kum maga̱da phangā munga. Ava̱va̱wui ming Azubah hoi, Shilhiwui naongalāva̱na. ⁴³Ana avāva̱ Asawui shongfa saikora shurda chi mahorhaimana, ithumwui Avāwui mangāli khamashung otmāng sai. Chithalala kajujuiwui kameopambing chi makhuithuimihaimana; apamli mibingna pha̱kaphayā nganamkaphā kala thao rikkatā ot sāchinga. ⁴⁴Kala Jehoshaphatna Israelwui awungali ngasoda chingri sai.

⁴⁵Jehoshaphatwui kasā otsakbing, awui sākahai pangshap, kala kathāda rai sāsai chi, Judah Awungabingwui Thotrinchān Lairikli makapiserhaimala? ⁴⁶Avāva̱ Asawui atamli haipapama khayora mayarnao kateibing chi ana ngalei chili kashamserhaowa. ⁴⁷Edomli awunga maleimana; otshina akhana awunga sai. ⁴⁸Jehoshaphatna sinā khuikhavai Ophirli vāki Tarshishwui jahasbing sākhui; kha jahasbing chi Ezion-geberli kaihaida mavāpaithuwa. ⁴⁹Chiwui thili Ahabwui naomayara Ahaziahna Jehoshaphatli hānga, "Iwui raobingna nawui raobingli ngasoda jahasli tongranu." Kha Jehoshaphatna mamayāmana. ⁵⁰Jehoshaphat avāva̱ ngarāli ngasoda thihaoda, avāva̱ Davidwui keinungli athumli ngasoda chifahaowa, kala anaomayara Jehoramna awui mahut thuishina.

Ahaziahna Avāli Malungvāt Ngasakmi

⁵¹Judahwui awunga Jehoshaphatli mungda tharāda kashine kum, Ahabwui naomayara Ahaziahna Samariali Israelli mungphoka, kala Israelli zingkum khani munga. ⁵²Ana ithumwui Avāwui mikyanli makaphā ot sai, kala avāva̱wui shongfa, āva̱va̱wui shongfa, kala Israelli morei sākhangasak kahai Nebatwui nao Jeroboamwui shongfali zata. ⁵³Ana Baalli otram ngatha̱da ali khoruma, kala avāva̱na kasā thāda ithumwui Avā, Israelwui Vareli malungvāt ngasaka.