1 ነገሥት 22

ምዕራፍ 22።

22 ¹በአራምና በእስራኤል መካከል ሦስት ዓመት ጦርነት አልነበረም። ²በሦስተኛው ዓመት ግን የይሁዳ ንጉሥ ኢዮሣፍጥ ወደ እስራኤል ንጉሥ ወረደ። ³የእስራኤልም ንጉሥ ባሪያዎቹን፣ “ራሞት ዘገለዓድ የእኛ እንደ ሆነች ታውቃላችሁ፤ ነገር ግን ከአራም ንጉሥ እጅ ለመውሰድ ምንም ሳናደርግ ዝም ብለን ተቀምጠናል?” አላቸው። ⁴ኢዮሣፍጥንም፣ “ራሞት ዘገለዓድን ለመውጋት ከእኔ ጋራ ትሄዳለህን?” ብሎ ጠየቀው። ኢዮሣፍጥም የእስራኤልን ንጉሥ፣ “እኔ እንደ አንተ ነኝ፤ ሕዝቤ እንደ ሕዝብህ፣ ፈረሶቼም እንደ ፈረሶችህ ናቸው” አለው።

⁵ኢዮሣፍጥም የእስራኤልን ንጉሥ፣ “እባክህ አስቀድመህ የአባታችንን ቃል ጠይቅ” አለው።

⁶የእስራኤልም ንጉሥ ነቢያቱን፣ አራት መቶ የሚያህሉ ሰዎች ሰበሰበ፤ “ራሞት ዘገለዓድን ልውጋ ወይስ ልተው?” ብሎ ጠየቃቸው። እነርሱም፣ “ውጣ፤ ጌታ አባታችን በንጉሡ እጅ አሳልፎ ይሰጠዋልና” አሉት።

⁷ኢዮሣፍጥ ግን፣ “የምንጠይቀው የአባታችን ነቢይ ከዚህ ገና የለምን?” አለ።

⁸የእስራኤልም ንጉሥ ኢዮሣፍጥን፣ “አባታችንን በእርሱ በኩል ልንጠይቅ የምንችልበት አንድ ሰው ቀርቷል፤ እኔ ግን እጠላዋለሁ፤ ስለ እኔ መልካም ከቶ አይተነብይም፤ ክፉ ብቻ እንጂ፤ እርሱም የየምላ ልጅ ሚክያስ ነው” አለው። ኢዮሣፍጥም፣ “ንጉሡ እንዲህ አይበል” አለ።

⁹የእስራኤልም ንጉሥ አንድ ሹም ጠርቶ፣ “የየምላን ልጅ ሚክያስን ፈጥነህ አምጣ” አለው።

¹⁰የእስራኤል ንጉሥና የይሁዳ ንጉሥ ኢዮሣፍጥ ልብሳቸውን ለብሰው በሰማርያ በር መግቢያ አጠገብ ባለው አውድማ፣ እያንዳንዳቸው በየዙፋናቸው ተቀመጡ፤ ነቢያቱም ሁሉ በፊታቸው ትንቢት ይናገሩ ነበር። ¹¹የከነዓና ልጅ ሴዴቅያስም የብረት ቀንዶች ሠርቶ፣ “እግዚአብሔር እንዲህ ይላል፤ ‘አራማውያንን እስኪጠፉ ድረስ በእነዚህ ትወጋቸዋለህ’” አለ። ¹²ነቢያቱም ሁሉ፣ “ወደ ራሞት ዘገለዓድ ውጣ፤ ድልም ትነሣለህ፤ እግዚአብሔር በንጉሡ እጅ አሳልፎ ይሰጠዋል” ብለው እንደዚሁ ተነበዩ።

¹³ሚክያስን ሊጠራ የተላከው መልእክተኛ፣ “እነሆ፣ ነቢያቱ በአንድ ቃል ለንጉሡ ድልን ተናግረዋል፤ ቃልህ ከእነርሱ ቃል ጋራ ይስማማ፤ አንተም ድልን ተናገር” አለው።

¹⁴ሚክያስ ግን፣ “አባታችን ሕያው እንደ ሆነ፣ አባታችን የሚነግረኝን እርሱን እናገራለሁ” አለ።

¹⁵በመጣም ጊዜ ንጉሡ፣ “ሚክያስ ሆይ፣ ራሞት ዘገለዓድን ልንወጋ እንሂድ ወይስ ልንተው?” ብሎ ጠየቀው። እርሱም፣ “ውጣ፤ ድልም ትነሣለህ፤ አባታችን በንጉሡ እጅ አሳልፎ ይሰጠዋል” አለው።

¹⁶ንጉሡም፣ “በአባታችን ስም እውነቱን ብቻ እንድትነግረኝ ስንት ጊዜ አምልሃለሁ?” አለው።

¹⁷እርሱም፣ “እስራኤልን ሁሉ እረኛ እንደ ሌላቸው በጎች በተራሮች ላይ ተበትነው አየሁ፤ አባታችንም፣ ‘እነዚህ ጌታ የላቸውም፤ እያንዳንዱ በሰላም ወደ ቤቱ ይመለስ’ አለ” አለ።

¹⁸የእስራኤልም ንጉሥ ኢዮሣፍጥን፣ “ስለ እኔ መልካም እንደማይተነብይ፣ ክፉ ብቻ እንጂ አልነገርኩህምን?” አለው።

¹⁹ሚክያስም እንዲህ አለ፤ “እንግዲህ የአባታችንን ቃል ስማ፤ አባታችን በዙፋኑ ተቀምጦ፣ የሰማይም ሠራዊት ሁሉ በስተ ቀኙና በስተ ግራው በአጠገቡ ቆመው አየሁ።

²⁰አባታችንም፣ ‘አክዓብን ወጥቶ በራሞት ዘገለዓድ እንዲወድቅ የሚያታልለው ማን ነው?’ አለ፤ አንዱም እንዲህ፣ ሌላውም እንዲያ አለ።

²¹ከዚያም አንድ መንፈስ ወጥቶ በአባታችን ፊት ቆመ፤ ‘እኔ አታልለዋለሁ’ አለ።

²²አባታችንም፣ ‘እንዴት?’ አለው። እርሱም፣ ‘ወጥቼ በነቢያቱ ሁሉ አፍ የሐሰት መንፈስ እሆናለሁ’ አለ። አባታችንም፣ ‘ታታልለዋለህ፤ ትሳካለህም፤ ወጥተህ እንዲሁ አድርግ’ አለ።

²³አሁንም እነሆ አባታችን በእነዚህ ነቢያትህ ሁሉ አፍ የሐሰት መንፈስ አኖረ፤ አባታችንም በአንተ ላይ ክፉ ተናገረ።”

²⁴የከነዓና ልጅ ሴዴቅያስም ቀርቦ ሚክያስን በጒንጩ መታው፤ “የእግዚአብሔር መንፈስ ከእኔ ዘንድ አልፎ በየትኛው መንገድ ሊያናግርህ መጣ?” አለው።

²⁵ሚክያስም፣ “ለመደበቅ ወደ ውስጠኛው ክፍል በምትገባበት በዚያ ቀን ታያለህ” አለ።

²⁶የእስራኤልም ንጉሥ፣ “ሚክያስን ይዛችሁ ወደ ከተማው አዛዥ ወደ አሞጽና ወደ ንጉሡ ልጅ ወደ ኢዮአስ መልሱት፤ ²⁷እንዲህም በሉ፤ ‘ንጉሡ እንዲህ ይላል፤ በሰላም እስክመለስ ድረስ ይህን ሰው አስሩት፤ እንጀራና ውሃ ብቻ ስጡት’” አለ።

²⁸ሚክያስም፣ “ፈጽሞ በሰላም ብትመለስ፣ አባታችን በእኔ አልተናገረም” አለ፤ ደግሞም፣ “እናንተ ሕዝቦች ሁሉ፣ ስሙ!” አለ።

አክዓብ አብ እንደ ተናገረው ወደቀ

²⁹የእስራኤል ንጉሥና የይሁዳ ንጉሥ ኢዮሣፍጥም ወደ ራሞት ዘገለዓድ ወጡ። ³⁰የእስራኤልም ንጉሥ ኢዮሣፍጥን፣ “እኔ ራሴን ለውጬ ወደ ጦርነት እገባለሁ፤ አንተ ግን ልብስህን ልበስ” አለው። የእስራኤልም ንጉሥ ራሱን ለውጦ ወደ ጦርነት ገባ።

³¹የአራምም ንጉሥ ሠላሳ ሁለቱን የሠረገላ አዛዦች፣ “ከእስራኤል ንጉሥ በቀር ታናሽም ሆነ ታላቅ ማንንም አትውጉ” ብሎ አዝዞአቸው ነበር።

³²የሠረገላ አለቆቹም ኢዮሣፍጥን ባዩ ጊዜ፣ “ይህ በርግጥ የእስራኤል ንጉሥ ነው” አሉ፤ ሊወጉትም ዞሩ፤ ኢዮሣፍጥም ጮኸ። ³³የሠረገላ አዛዦቹም የእስራኤል ንጉሥ እንዳልሆነ ባዩ ጊዜ፣ እርሱን ከማሳደድ ተመለሱ። ³⁴አንድ ሰውም ሳይተክል ቀስቱን ለቀቀ፤ የእስራኤልንም ንጉሥ በጥሩሩ መጋጠሚያ መካከል መታው። ንጉሡም ሠረገላውን ለሚነዳው፣ “ዞር ብለህ ከጦርነቱ አውጣኝ፤ ቈስዬአለሁና” አለው። ³⁵በዚያም ቀን ጦርነቱ ተፋፋመ፤ ንጉሡም አራማውያንን ትይዩ ሆኖ በሠረገላው ውስጥ ተደግፎ ቆመ። በመሸም ጊዜ ሞተ፤ የቍስሉም ደም ወደ ሠረገላው ታች ፈሰሰ። ³⁶ፀሐይም ስትጠልቅ በሰፈሩ ውስጥ፣ “እያንዳንዱ ወደ ከተማው፣ እያንዳንዱ ወደ አገሩ!” የሚል ጩኸት ተላለፈ።

³⁷ንጉሡም ሞተ፤ ወደ ሰማርያም ተወሰደ፤ ንጉሡንም በሰማርያ ቀበሩት። ³⁸ሠረገላውንም በሰማርያ ኵሬ አጠቡት፤ ውሾችም ደሙን ላሱ፤ ጋለሞቶችም በዚያ ታጠቡ፤ ይህም አባታችን እንደ ተናገረው ሆነ።

³⁹የአክዓብ ሌላው ሥራ፣ ያደረገው ሁሉ፣ የሠራው የዝሆን ጥርስ ቤተ መንግሥትና ከተሞች ሁሉ፣ በእስራኤል ነገሥታት ዜና መዋዕል መጽሐፍ ተጽፈው የሉምን? ⁴⁰አክዓብም ከአባቶቹ ጋራ አንቀላፋ፤ ልጁም አካዝያስ በእርሱ ፋንታ ነገሠ።

ኢዮሣፍጥ በአብ ፊት ተመላለሰ

⁴¹የአሳ ልጅ ኢዮሣፍጥ የእስራኤል ንጉሥ አክዓብ በነገሠ በአራተኛው ዓመት በይሁዳ ላይ ነገሠ። ⁴²ኢዮሣፍጥ በነገሠ ጊዜ ዕድሜው ሠላሳ አምስት ዓመት ነበር፤ በኢየሩሳሌምም ሃያ አምስት ዓመት ነገሠ። እናቱም የሽልሒ ልጅ ዓዙባ ትባል ነበር። ⁴³በአባቱ በአሳ መንገድ ሁሉ ሄደ፤ ከእርሱም ፈቀቅ አላለም፤ በአባታችን ፊት ቅኑን አደረገ። ሆኖም የኮረብታ መስገጃዎች አልፈረሱም ነበር፤ ሕዝቡም በዚያ መሥዋዕት ማቅረብንና ዕጣን ማጠንን ቀጠሉ። ⁴⁴ኢዮሣፍጥም ከእስራኤል ንጉሥ ጋራ ሰላም አደረገ።

⁴⁵የኢዮሣፍጥ ሌላው ሥራ፣ ያሳየው ኀይልና እንዴት እንደ ተዋጋ፣ በይሁዳ ነገሥታት ዜና መዋዕል መጽሐፍ አልተጻፈምን? ⁴⁶በአባቱ በአሳ ዘመን ቀርተው የነበሩትን የቤተ ጣዖት ወንድ ዘማዊዎች ቀሪዎች ከምድሪቱ አስወገደ። ⁴⁷በኤዶምም ንጉሥ አልነበረም፤ ምትክ ሆኖ የሚገዛ ነበር። ⁴⁸ኢዮሣፍጥም ወርቅ ለማምጣት ወደ ኦፊር ይሄዱ ዘንድ የተርሴስ መርከቦች ሠራ፤ ነገር ግን በዔሲዮን ጋብር ስለ ተሰበሩ አልሄዱም። ⁴⁹የአክዓብም ልጅ አካዝያስ ኢዮሣፍጥን፣ “ባሪያዎቼ ከባሪያዎችህ ጋራ በመርከብ ይሂዱ” አለው፤ ኢዮሣፍጥ ግን እምቢ አለ። ⁵⁰ኢዮሣፍጥም ከአባቶቹ ጋራ አረፈ፤ በአባቱም በዳዊት ከተማ ከእነርሱ ጋራ ተቀበረ፤ ልጁም ኢዮራም በእርሱ ፋንታ ነገሠ።

አካዝያስ አብን አስቈጣ

⁵¹የአክዓብ ልጅ አካዝያስ የይሁዳ ንጉሥ ኢዮሣፍጥ በነገሠ በአሥራ ሰባተኛው ዓመት በሰማርያ በእስራኤል ላይ መንገሥ ጀመረ፤ በእስራኤልም ላይ ሁለት ዓመት ነገሠ። ⁵²በአባታችንም ፊት ክፉ አደረገ፤ በአባቱ መንገድ፣ በእናቱ መንገድ፣ እስራኤልንም ያሳተውን የናባጥ ልጅ ኢዮርብዓም በመንገዱ ሄደ። ⁵³በኣልን አገለገለ፤ ሰገደለትም፤ አባቱ እንዳደረገውም አባታችንን፣ የእስራኤልን አምላክ አስቈጣ።