Hakim-Hakim 4 FHB Father's Heart Bible™

4 ¹Sanggeus Ehud maot, urang Israil ngalampahkeun deui kajahatan di payuneun Rama urang. ²Nya ku Rama urang maranehna diselehkeun kana kakawasaan Yabin raja Kanaan, anu marentah di Hasor. Panglima baladna ngaran Sisera, anu matuhna di Haroset-Hagoyim. ³Tuluy urang Israil sasambat ka Rama urang, sabab Sisera boga kareta perang beusi salapan ratus, sarta geus meres maranehna kalawan telenges salila dua puluh taun. ⁴Harita anu jadi hakim di Israil teh Debora, hiji wanita nabi, garwana Lapidot. ⁵Anjeunna sok calik di handapeun Tangkal Korma Debora, antara Rama jeung Betel di pagunungan Epraim, sarta urang Israil daratang ka anjeunna menta kaputusan. ⁶Anjeunna ngutus jelema sina nyandak Barak bin Abinoam ti Kedes di wewengkon Naptali, tuluy saurna ka Barak, “Kapan Rama urang, Allah Israil, geus marentah ka maneh: Geura indit ngabaris ka Gunung Tabor, bawa jelema sapuluh rebu urang ti Naptali jeung Sebulun. ⁷Kami rek nuyun Sisera, panglima baladna Yabin, sina mapagkeun maneh di Walungan Kison jeung kareta-kareta perang katut baladna, tuluy rek diselehkeun kana leungeun maneh.”

⁸ Saur Barak ka anjeunna, “Upami Ibu kersa ngiring, abdi bade angkat; nanging upami Ibu teu kersa ngiring, abdi moal angkat.”

⁹Waler Debora, “Kami tangtu rek ngiring ka maneh, ngan dina jalan nu rek disorang ku maneh teh maneh moal meunang kamulyaan, sabab Sisera ku Rama urang baris diselehkeun kana leungeun hiji wanita.” Tuluy Debora cengkat, angkat jeung Barak ka Kedes. ¹⁰Barak nyalukan urang Sebulun jeung Naptali ka Kedes; sapuluh rebu jelema naraek nuturkeun anjeunna, sarta Debora ngiring sareng anjeunna. ¹¹Harita Heber urang Keni, salah sahiji turunan Hobab mertua Musa, geus misah ti urang Keni sejenna sarta masang kemahna nepi ka tangkal kiara di Saananim, deukeut Kedes. ¹²Waktu Sisera dibejaan yen Barak bin Abinoam geus naek ka Gunung Tabor, ¹³Sisera ngumpulkeun sakabeh kareta perangna—kareta perang beusi salapan ratus—jeung sakabeh baladna, ti Haroset-Hagoyim nepi ka Walungan Kison.

¹⁴Saur Debora ka Barak, “Geura maju! Poe ieu Sisera ku Rama urang diselehkeun kana leungeun maneh. Lain Rama urang geus angkat ti heula ti payuneun maneh?” Tuluy Barak ngagidig turun ti Gunung Tabor, diiring ku sapuluh rebu jelema. ¹⁵Nya ku Rama urang Sisera jeung sakabeh kareta perangna katut sakabeh baladna digempur ku pedang di payuneun Barak; Sisera turun tina keretana tuluy kabur leumpang. ¹⁶Barak ngudag kareta-kareta perang jeung baladna nepi ka Haroset-Hagoyim, tuluy sakabeh baladna Sisera tiwas ku pedang; teu aya nu kari saurang-urang acan.

¹⁷Ari Sisera kabur leumpang ka kemahna Yael, bojona Heber urang Keni, sabab Yabin raja Hasor jeung kulawarga Heber teh keur raruket. ¹⁸Yael kaluar mapagkeun Sisera, “Mangga lebet, juragan, lebet ka kemah abdi; ulah salempang.” Tuluy Sisera asup ka jero kemahna, terus ku Yael ditutupan ku simbut.

¹⁹Sisera ngomong, “Mangga pangnyandakkeun cai saeutik; abdi halabhab.” Tuluy Yael muka wadah susu, dibikeunkeun sina diinum, tuluy ditutupan deui.

²⁰Ceuk Sisera ka Yael, “Jaga di lawang kemah. Lamun aya nu datang nanya, ‘Aya lalaki di dieu?’ jawab, ‘Euweuh.’”

²¹Tapi Yael, bojona Heber, nyokot pasak kemah jeung palu, ngendep-ngendep lalaunan nyampeurkeun, tuluy pasak teh dipantekkeun kana pilipisanana nepi ka tembus kana taneuh, sabot Sisera keur tibra kacida tunduhna jeung kacapean. Nya maot. ²²Harita keneh Barak datang ngudag Sisera, tuluy Yael kaluar mapagkeun anjeunna. Ceuk Yael, “Mangga ka lebet, ku abdi rek dituduhkeun lalaki anu diteangan ku anjeun.” Barak asup jeung Yael, breh katembong Sisera ngagoler geus maot, pilipisanana katembus pasak kemah. ²³Dina poe eta Yabin raja Kanaan ku Rama urang ditalukkeun di payuneun urang Israil. ²⁴Kakawasaan urang Israil beuki lila beuki nyingsieunan ka Yabin raja Kanaan, nepi ka ahirna manehna dibasmi.