ପିତା ଦବୋରା ଓ ବାରାକଙ୍କୁ ଉତ୍ଥାପିତ କରନ୍ତି

ସୀଷରାର ନଅ ଶହ ଲୁହାର ରଥ ତଳେ କୋଡ଼ିଏ ବର୍ଷ ଶେଷ ହୁଏ, ଯେତେବେଳେ ନିଜ ଖଜୁରୀ ଗଛ ତଳେ ବିଚାର କରୁଥିବା ଦବୋରା ବାରକଙ୍କୁ ଡକାନ୍ତି। ସେ ଗଲେ ହିଁ ବାରକ ଯିବେ, ତେଣୁ ଗୌରବ ଜଣେ ସ୍ତ୍ରୀଲୋକଙ୍କୁ ଯାଏ। ଆମ ପିତା ରଥଗୁଡ଼ିକୁ ଛିନ୍ନଭିନ୍ନ କରନ୍ତି, ଏବଂ ଯାୟେଲ ପଳାୟନ କରୁଥିବା ସୀଷରାର କପାଳରେ ତମ୍ବୁର କଣ୍ଟା ପିଟି ପୂରାଇଦିଅନ୍ତି।

ଅଧ୍ୟାୟ 4।

ଏହୂଦଙ୍କ ମୃତ୍ୟୁ ପରେ ଇସ୍ରାଏଲ ସନ୍ତାନମାନେ ପୁନର୍ବାର ଆମ୍ଭମାନଙ୍କ ପିତାଙ୍କ ଦୃଷ୍ଟିରେ କୁକର୍ମ କଲେ। ଏଣୁ ଆମ୍ଭମାନଙ୍କ ପିତା ସେମାନଙ୍କୁ ହାସୋରରେ ରାଜତ୍ଵ କରୁଥିବା କିଣାନୀୟ ରାଜା ଯାବୀନ୍‍ର ହସ୍ତରେ ବିକ୍ରୟ କଲେ। ତାହାର ସେନାପତି ସୀଷରା ଥିଲା, ଯେ ହରୋଶେତ-ହଗୋୟୀମ୍‍ରେ ବାସ କରୁଥିଲା। ତେବେ ଇସ୍ରାଏଲ ସନ୍ତାନମାନେ ଆମ୍ଭମାନଙ୍କ ପିତାଙ୍କ ନିକଟରେ କ୍ରନ୍ଦନ କଲେ, କାରଣ ସୀଷରାର ନଅ ଶହ ଲୌହ ରଥ ଥିଲା ଓ ସେ କୋଡ଼ିଏ ବର୍ଷ ପର୍ଯ୍ୟନ୍ତ ସେମାନଙ୍କ ଉପରେ ଅତ୍ୟନ୍ତ ଉପଦ୍ରବ କରିଥିଲା। ସେହି ସମୟରେ ଲପ୍ପୀଦୋତ୍‍ର ଭାର୍ଯ୍ୟା ଦବୋରା ନାମ୍ନୀ ଏକ ଭବିଷ୍ୟଦ୍‍ବକ୍ତ୍ରୀ ଇସ୍ରାଏଲର ବିଚାର କରୁଥିଲେ। ସେ ଇଫ୍ରୟିମର ପର୍ବତମୟ ଦେଶସ୍ଥିତ ରାମା ଓ ବେଥେଲ ମଧ୍ୟରେ ଥିବା ଦବୋରାର ଖର୍ଜ୍ଜୁର ବୃକ୍ଷ ତଳେ ବସୁଥିଲେ, ପୁଣି ଇସ୍ରାଏଲ ସନ୍ତାନମାନେ ବିଚାର ନିମନ୍ତେ ତାହାଙ୍କ ନିକଟକୁ ଆସୁଥିଲେ। ସେ ନପ୍ତାଲିର କେଦଶରୁ ଅବୀନୋୟମ୍‍ର ପୁତ୍ର ବାରାକଙ୍କୁ ଡକାଇ ଆଣି ତାହାଙ୍କୁ କହିଲେ, “ଇସ୍ରାଏଲର ଈଶ୍ଵର ଆମ୍ଭମାନଙ୍କ ପିତା କି ତୁମ୍ଭକୁ ଏହି ଆଜ୍ଞା ଦେଇ ନାହାଁନ୍ତି: ଯାଅ, ତାବୋର ପର୍ବତକୁ ଅଗ୍ରସର ହୁଅ ଓ ନପ୍ତାଲି ଓ ସବୂଲୂନ ବଂଶରୁ ଦଶ ହଜାର ଲୋକ ଆପଣା ସଙ୍ଗରେ ନିଅ। ଆଉ ମୁଁ ଯାବୀନ୍‍ର ସେନାପତି ସୀଷରାକୁ ତାହାର ରଥ ଓ ଲୋକସମୂହ ସହିତ କୀଶୋନ ନଦୀ ନିକଟକୁ ତୁମ୍ଭ ସଙ୍ଗେ ସାକ୍ଷାତ କରିବା ପାଇଁ ଟାଣି ଆଣିବି ଓ ତାକୁ ତୁମ୍ଭ ହସ୍ତରେ ସମର୍ପଣ କରିବି।”

ତହିଁରେ ବାରାକ ତାହାଙ୍କୁ କହିଲେ, “ଯଦି ଆପଣ ମୋʼ ସଙ୍ଗେ ଯିବେ, ତେବେ ମୁଁ ଯିବି; କିନ୍ତୁ ଯଦି ଆପଣ ମୋʼ ସଙ୍ଗେ ନ ଯିବେ, ତେବେ ମୁଁ ଯିବି ନାହିଁ।”

ତହିଁରେ ସେ କହିଲେ, “ମୁଁ ଅବଶ୍ୟ ତୁମ୍ଭ ସଙ୍ଗେ ଯିବି, ମାତ୍ର ତୁମ୍ଭେ ଯେଉଁ ପଥରେ ଯିବ, ସେଥିରେ ତୁମ୍ଭର କୌଣସି ଗୌରବ ହେବ ନାହିଁ, କାରଣ ଆମ୍ଭମାନଙ୍କ ପିତା ସୀଷରାକୁ ଜଣେ ସ୍ତ୍ରୀର ହସ୍ତରେ ବିକ୍ରୟ କରିବେ।” ତେଣୁ ଦବୋରା ଉଠି ବାରାକଙ୍କ ସଙ୍ଗେ କେଦଶକୁ ଗଲେ। ପୁଣି ବାରାକ ସବୂଲୂନ ଓ ନପ୍ତାଲିକୁ କେଦଶକୁ ଡାକିଲେ; ଦଶ ହଜାର ଲୋକ ତାହାଙ୍କ ପଛେ ପଛେ ଯାତ୍ରା କଲେ ଓ ଦବୋରା ତାହାଙ୍କ ସଙ୍ଗେ ଗଲେ। ସେସମୟରେ ମୋଶାଙ୍କ ଶ୍ଵଶୁର ହୋବବ୍‍ର ସନ୍ତାନମାନଙ୍କ ମଧ୍ୟରୁ ଜଣେ କେନୀୟ ହେବର କେନୀୟମାନଙ୍କଠାରୁ ଅଲଗା ହୋଇ କେଦଶ ନିକଟସ୍ଥ ସାନନ୍ନୀମ୍‍ର ଅଲୋନ ବୃକ୍ଷ ପର୍ଯ୍ୟନ୍ତ ଆପଣା ତମ୍ବୁ ସ୍ଥାପନ କରିଥିଲା। ଅବୀନୋୟମ୍‍ର ପୁତ୍ର ବାରାକ ତାବୋର ପର୍ବତକୁ ଯାଇଅଛନ୍ତି ବୋଲି ଲୋକମାନେ ସୀଷରାକୁ କହନ୍ତେ, ସୀଷରା ହରୋଶେତ-ହଗୋୟୀମ୍‍ଠାରୁ କୀଶୋନ ନଦୀ ପର୍ଯ୍ୟନ୍ତ ଆପଣାର ସମସ୍ତ ରଥ—ନଅ ଶହ ଲୌହ ରଥ—ଓ ଆପଣା ସଙ୍ଗେ ଥିବା ସମସ୍ତ ଲୋକଙ୍କୁ ଏକତ୍ର କଲା।

ତେବେ ଦବୋରା ବାରାକଙ୍କୁ କହିଲେ, “ଉଠ! କାରଣ ଆଜି ଆମ୍ଭମାନଙ୍କ ପିତା ସୀଷରାକୁ ତୁମ୍ଭ ହସ୍ତରେ ସମର୍ପଣ କରୁଅଛନ୍ତି। ଆମ୍ଭମାନଙ୍କ ପିତା କି ତୁମ୍ଭ ଆଗେ ଆଗେ ଯାଇ ନାହାଁନ୍ତି?” ତେଣୁ ବାରାକ ଦଶ ହଜାର ଲୋକଙ୍କୁ ଆପଣା ପଛେ ପଛେ ନେଇ ତାବୋର ପର୍ବତରୁ ଓହ୍ଲାଇ ଆକ୍ରମଣ କଲେ। ଆଉ ଆମ୍ଭମାନଙ୍କ ପିତା ବାରାକଙ୍କ ସମ୍ମୁଖରେ ଖଡ୍ଗଧାର ଦ୍ଵାରା ସୀଷରାକୁ, ତାହାର ସମସ୍ତ ରଥ ଓ ସମସ୍ତ ସୈନ୍ୟକୁ ଛିନ୍ନଭିନ୍ନ କଲେ; ତହିଁରେ ସୀଷରା ଆପଣା ରଥ ଛାଡ଼ି ପାଦଗତିରେ ପଳାୟନ କଲା। ମାତ୍ର ବାରାକ ହରୋଶେତ-ହଗୋୟୀମ୍ ପର୍ଯ୍ୟନ୍ତ ସେହି ରଥ ଓ ସୈନ୍ୟଙ୍କ ପଛେ ପଛେ ଗୋଡ଼ାଇଲେ, ପୁଣି ସୀଷରାର ସମସ୍ତ ସୈନ୍ୟ ଖଡ୍ଗଧାର ଦ୍ଵାରା ପତିତ ହେଲେ; ଜଣେ ହେଁ ଅବଶିଷ୍ଟ ରହିଲା ନାହିଁ।

ଏହି ସମୟରେ ସୀଷରା ପାଦଗତିରେ ଯାଇ କେନୀୟ ହେବରର ଭାର୍ଯ୍ୟା ଯାୟେଲର ତମ୍ବୁ ନିକଟକୁ ପଳାୟନ କଲା, କାରଣ ହାସୋରର ରାଜା ଯାବୀନ୍ ଓ ହେବରର ବଂଶ ମଧ୍ୟରେ ଶାନ୍ତି ଥିଲା। ଆଉ ଯାୟେଲ ସୀଷରା ସଙ୍ଗେ ସାକ୍ଷାତ କରିବାକୁ ବାହାରିଯାଇ କହିଲା, “ହେ ମୋʼ ପ୍ରଭୁ, ଭିତରକୁ ଆସନ୍ତୁ, ମୋʼ ନିକଟକୁ ଭିତରକୁ ଆସନ୍ତୁ; ଭୟ କରନ୍ତୁ ନାହିଁ।” ତେଣୁ ସେ ତାହାର ତମ୍ବୁ ଭିତରକୁ ଗଲା, ପୁଣି ସେ ତାକୁ ଏକ କମ୍ବଳରେ ଆଚ୍ଛାଦନ କଲା।

ସେ କହିଲା, “ମୋତେ ଅନୁଗ୍ରହ କରି ଅଳ୍ପ ଜଳ ପିଇବାକୁ ଦିଅ; ମୁଁ ତୃଷାର୍ତ୍ତ ଅଛି।” ତହିଁରେ ସେ ଏକ ଦୁଗ୍ଧର କୁମ୍ପା ଫିଟାଇ ତାକୁ ପିଇବାକୁ ଦେଲା ଓ ତାକୁ ପୁନର୍ବାର ଆଚ୍ଛାଦନ କଲା।

ସେ ତାହାକୁ କହିଲା, “ତମ୍ବୁ ଦ୍ଵାର ନିକଟରେ ଠିଆ ହୁଅ। ଯଦି କେହି ଆସି ‘ଏଠାରେ କୌଣସି ଲୋକ ଅଛି କି?’ ବୋଲି ପଚାରେ, ତେବେ ‘ନାହିଁ’ ବୋଲି କୁହ।”

ମାତ୍ର ହେବରର ଭାର୍ଯ୍ୟା ଯାୟେଲ ତମ୍ବୁର ଏକ ଗୁଞ୍ଜ ଓ ଏକ ହାତୁଡ଼ି ନେଇ ଧୀରେ ଧୀରେ ତାହା ନିକଟକୁ ଯାଇ, ସେ ପରିଶ୍ରାନ୍ତ ହୋଇ ଘୋର ନିଦ୍ରାରେ ଶୟନ କରିଥିବା ବେଳେ, ସେହି ଗୁଞ୍ଜ ତାହାର କାନପଟା ଦେଇ ଭୂମିରେ ପୋତିଦେଲା। ଏଣୁ ସେ ମଲା। ସେହିକ୍ଷଣି ବାରାକ ସୀଷରାର ପଛେ ପଛେ ଗୋଡ଼ାଇ ଆସିଲେ, ଆଉ ଯାୟେଲ ତାହାଙ୍କ ସଙ୍ଗେ ସାକ୍ଷାତ କରିବାକୁ ବାହାରିଯାଇ କହିଲା, “ଆସନ୍ତୁ, ଆପଣ ଯେଉଁ ଲୋକକୁ ଖୋଜୁଅଛନ୍ତି, ତାକୁ ମୁଁ ଆପଣଙ୍କୁ ଦେଖାଇବି।” ତେଣୁ ସେ ତା ସଙ୍ଗେ ଭିତରକୁ ଗଲେ, ଆଉ ଦେଖ, ସୀଷରା ମରି ପଡ଼ିଅଛି ଓ ତାହାର କାନପଟାରେ ସେହି ଗୁଞ୍ଜ ବିଦ୍ଧ ହୋଇ ରହିଅଛି। ସେହି ଦିନ ଆମ୍ଭମାନଙ୍କ ପିତା ଇସ୍ରାଏଲ ସନ୍ତାନମାନଙ୍କ ସମ୍ମୁଖରେ କିଣାନୀୟ ରାଜା ଯାବୀନ୍‍କୁ ଦମନ କଲେ। ପୁଣି ଇସ୍ରାଏଲ ସନ୍ତାନମାନଙ୍କ ହସ୍ତ କିଣାନୀୟ ରାଜା ଯାବୀନ୍ ବିରୁଦ୍ଧରେ କ୍ରମଶଃ ଅଧିକ ବଳବାନ ହୋଇ ଚାଲିଲା, ଶେଷରେ ସେମାନେ ତାହାକୁ ବିନାଶ କଲେ।