Bouei Debora si Barak Longtikuda
Siseraeibü nameibü kailong 900 ik ka po saoche kaangbü khonkutibü kho, Debora, haoeibü pünglong phanga matjembou saoei, Barak ngaan lenbü chalou maukei. Hao sao yoa haulonga ong haulabü dogo laukei, aishanga soneikangbü yaksa che to leilangkei. Seneibü Bouei kailong shuong khonkutikei, hoba Jaelei paian kibü Siseraeibü khu to neichem khü che litikei.
4 1Ehud haian phaia, Israel shousi shuongei toukei Bou thedanga amaibü kümbei. 2Kheijinei Bouei haoen Hazora songdakbü Kanan Choba Jabin ik to yaakkei. Haoeibü sepai tan leiyeibou kho Sisera kikei, haoei Haroshet Hagoyima kikei. 3Hobaje Israel shousi shuongei Bou to ngekkei, aishanga Siseraeibü nameibü kailong 900 kikei hoba haoei haoen po saoche kaangko khonkutikei. 4Tou kho jihsiphaia thuseibü yaksa che, Lappidoteibü yak Deboraei, Israel matjembei. 5Saoei Rama si Bethel kanglanga Efraim shongh kaodaka Debora pünglong phanga setda, hoba Israel shousi shuong mat jemla shanga sao jungto angda. 6Saoei Naftali ka kibü Kadesh ka Abinoameibü shou Barak ngaan hao to lenkei, “Bou, Israelbü Mühghaüei, ka la asakkukei lo? Hauashi, Tabor shongh to meimeiashi, hoba Naftali si Zebulun ka müt hajar an ka yoa leian hauashi. 7Ngei Jabineibü sepai tan leiyeibou Sisera to, haoeibü kailong hoba sepai tan yoa, ka to haüyola shanga Kishon shumang ka leian loulabü, hoba hao ka ik to khümbo kulabü.”
8Barakei sao to laukei, “No ngo yoa haulonga, ngo haulabü; lausikei no ngo yoa ohaulonga, ngo ohaulabü.”
9“Ngo ka yoa tükde haulabü,” saoei laukei, “lausikei no haubü lama soneikangbü ahaplabü, aishanga Bouei Sisera yaksa che ik to khümbo kulabü.” Hibü Deboraei loenan Barak yoa Kadesh to haukei. 10Barakei Zebulun hoba Naftali Kadesh to ngakei; hao phainei müt hajar an angkei, hoba hao yoa Debora haukei. 11Kenbü Heberei, Mosa kou Hobabeibü thensilen yoa che, Kenbü ka janyinan, Kadesh napheinei Zaanammina yembulong sühko haoeibü neichem dangkei. 12Ladang haoenei Abinoameibü shou Barak Tabor shongh to angkei dogo Sisera to lenkei, 13Siseraei haoeibü kailong pendou, nameibü kailong 900, hoba haoeibü sepai tan pendou, Haroshet Hagoyim ka Kishon shumang to takshattikei.
14Deboraei Barak to laukei, “Meimeiashi! Tat Bouei Sisera ka ik to khümbo kua. Bou ka thedanga ohaukei lo?” Hibü Barak müt hajar an hao phainei leian Tabor shongh ka yankei. 15Hobaje Bouei Barak thedanga Sisera, haoeibü kailong pendou hoba haoeibü sepai tan pendou, inei yoongtikei; Siseraei haoeibü kailong apyoan youei satkei. 16Barakei kailong hoba sepai tan Haroshet Hagoyim to shijung haukei, hoba Siseraeibü sepai tan pendou inei tuongkei; müt che ongkei ajou.
17Tou Siseraei Kenbü Hebereibü yak Jael neichem to youei satkei, aishanga Hazorbü Choba Jabin si Heber chempen kanglanga sangmai kikei. 18Jaelei Sisera shuokla longkei hoba laukei, “Kü jungto sepeiashi, ngeibü bunyu, kü jungto sepeiashi; tehüt.” Kheijinei haoei saoeibü neichem to sepeian atkei, hoba saoei hao nei chenei khuilepbei.
19Haoei laukei, “Sanoudambo küla dei shijo yungtishi; ngo deilako kia.” Saoei sendei jephot ipbukei, hoba hao la yungtikei, hoba toukei hao khuilepbei.
20Haoei sao to laukei, “Neichem koukhün to loashi. Müt at loulaje hoba, ‘Hanei müt che kia lo?’ dogo phelaje, nyi ‘Aying,’ dogo lenshi.”
21Lausikei Hebereibü yak Jaelei neichem jaangbü bu hoba bungüma haoeibü ika jungkei, hoba hao jungto semeshoko louan, hoba hao semthetan yepan kijinei, bu kho haoeibü nilit danko kaoa jaangtikei. Kheijinei hao haikei. 22Tou Barakei Sisera shijung louan longkei, hoba Jaelei hao shuokla longkei. Saoei laukei, “Kaiya, hoba nyi lamda müt ngei ka la lenlabü.” Haoei sao yoa maang to atkei, hoba chühashi, Sisera haian, hoba bu kho haoeibü nilit danko jaangtian kikei. 23Kho chaloua seneibü Bouei Kanan Choba Jabin kho Israel shousi shuong thedanga thükkei. 24Israelbü shousi shuongeibü ikei Kanan Choba Jabin khulimbo aei aei kaangan apan, hoba haoenei hao mautikei.
