መሳፍንት 4

4 ¹አሁድ ከሞተ በኋላ፣ እስራኤላውያን እንደ ገና በአባታችን ፊት ክፉ አደረጉ። ²ስለዚህ አባታችን በአሶር ይነግሥ ለነበረው ለከነዓን ንጉሥ ለኢያቢስ እጅ ሸጣቸው። የሰራዊቱ አዛዥ በአሕሮሴት ሀጎይም ይኖር የነበረው ሲሳራ ነበር። ³ሲሳራ ዘጠኝ መቶ የብረት ሠረገሎች ነበሩትና ለሃያ ዓመት ክፉኛ ስለ ጨቈናቸው፣ እስራኤላውያን ወደ አባታችን ጮኹ። ⁴በዚያን ጊዜ የላጲዶት ሚስት ነቢይቲቱ ዲቦራ እስራኤልን ትፈርድ ነበር። ⁵በኤፍሬም ተራራማ አገር በራማና በቤቴል መካከል ባለው በዲቦራ ዘንባባ ሥር ትቀመጥ ነበር፤ እስራኤላውያንም ለፍርድ ወደ እርሷ ይወጡ ነበር። ⁶በንፍታሌም ምድር ከምትገኘው ከቄዴስ የአቢኖዓምን ልጅ ባራቅን አስጠራች፤ እንዲህም አለችው፤ “የእስራኤል አምላክ አባታችን እንዲህ ብሎ አላዘዘህምን፤ ሂድ፣ ወደ ታቦር ተራራ ዝመት፤ ከንፍታሌምና ከዛብሎን ዐሥር ሺሕ ሰዎች ይዘህ ሂድ። ⁷የኢያቢስን የሰራዊት አዛዥ ሲሳራን ከሠረገሎቹና ከጭፍሮቹ ጋር ወደ ቂሶን ወንዝ ወዳንተ አወጣዋለሁ፤ በእጅህም አሳልፌ እሰጠዋለሁ።”

⁸ባራቅም፣ “ከእኔ ጋር ብትሄጂ እሄዳለሁ፤ ከእኔ ጋር ባትሄጂ ግን አልሄድም” አላት።

⁹እርሷም፣ “በርግጥ ከአንተ ጋር እሄዳለሁ፤ ነገር ግን በምትሄድበት መንገድ ክብር አታገኝም፤ አባታችን ሲሳራን በሴት እጅ አሳልፎ ይሰጣልና” አለች። ስለዚህ ዲቦራ ተነሥታ ከባራቅ ጋር ወደ ቄዴስ ሄደች። ¹⁰ባራቅም ዛብሎንንና ንፍታሌምን ወደ ቄዴስ ጠራ፤ ዐሥር ሺሕ ሰዎች ተከትለውት ወጡ፤ ዲቦራም ከእርሱ ጋር ሄደች። ¹¹የሙሴ ዐማች የሖባብ ዘር ከሆኑት አንዱ የሆነው ቄናዊው ሔቤር ከቄናውያን ተለይቶ፣ በቄዴስ አጠገብ እስካለው እስከ ጸዓናይም ዋርካ ድረስ ድንኳኑን ተከለ። ¹²የአቢኖዓም ልጅ ባራቅ ወደ ታቦር ተራራ እንደ ወጣ ለሲሳራ በነገሩት ጊዜ፣ ¹³ሲሳራ ሠረገሎቹን ሁሉ፣ ዘጠኝ መቶ የብረት ሠረገሎችን፣ ጭፍሮቹንም ሁሉ ከአሕሮሴት ሀጎይም እስከ ቂሶን ወንዝ ድረስ ጠራ።

¹⁴ዲቦራም ባራቅን፣ “ተነሥ! አባታችን ዛሬ ሲሳራን በእጅህ አሳልፎ ይሰጣል። አባታችን በፊትህ አልወጣምን?” አለችው። ስለዚህ ባራቅ ዐሥር ሺሕ ሰዎች ተከትለውት ከታቦር ተራራ ወረደ። ¹⁵አባታችንም ሲሳራን፣ ሠረገሎቹን ሁሉና ሰራዊቱን ሁሉ በባራቅ ፊት በሰይፍ ድል ነሣ፤ ሲሳራም ሠረገላውን ትቶ በእግሩ ሸሸ። ¹⁶ባራቅም ሠረገሎቹንና ሰራዊቱን እስከ አሕሮሴት ሀጎይም ድረስ አሳደደ፤ የሲሳራም ሰራዊት ሁሉ በሰይፍ ወደቀ፤ አንድም ሰው አልቀረም።

¹⁷ይህ በእንዲህ እንዳለ፣ ሲሳራ በእግሩ ወደ ቄናዊው ሔቤር ሚስት ወደ ያዔል ድንኳን ሸሸ፤ በአሶር ንጉሥ በኢያቢስና በሔቤር ቤት መካከል ሰላም ነበርና። ¹⁸ያዔልም ሲሳራን ልትቀበለው ወጥታ፣ “ጌታዬ ሆይ፣ ግባ፤ ወደ እኔ ግባ፤ አትፍራ” አለችው። እርሱም ወደ ድንኳንዋ ገባ፤ እርሷም በብርድ ልብስ ሸፈነችው።

¹⁹እርሱም፣ “እባክሽ ጥቂት ውሃ ስጪኝ፤ ተጠምቻለሁ” አላት። እርሷም የወተት አቁማዳ ከፍታ አጠጣችው፤ ደግማም ሸፈነችው።

²⁰እርሱም፣ “በድንኳኑ ደጃፍ ቁሚ፤ አንድ ሰው መጥቶ፣ ‘እዚህ ሰው አለን?’ ብሎ ቢጠይቅ፣ ‘የለም’ በዪ” አላት።

²¹ነገር ግን የሔቤር ሚስት ያዔል የድንኳን ችካልና መዶሻ ይዛ፣ ቀስ ብላ ተጠግታ፣ በጥልቅ እንቅልፍ ተኝቶ ደክሞት ሳለ ችካሉን በናላው ሰክታ እስከ መሬት ድረስ አ ቸነከረችው። እንዲህም ሞተ። ²²ባራቅም ሲሳራን እያሳደደ በዚያ ጊዜ መጣ፤ ያዔልም ልትቀበለው ወጥታ፣ “ና፤ የምትፈልገውን ሰው አሳይሃለሁ” አለችው። ከእርሷም ጋር ገባ፤ እነሆም፣ ሲሳራ ሞቶ፣ ችካሉ በናላው ሰክቶ ተኝቶ ነበር። ²³በዚያ ቀን አባታችን የከነዓንን ንጉሥ ኢያቢስን በእስራኤላውያን ፊት አስገዛ። ²⁴የእስራኤላውያንም እጅ የከነዓንን ንጉሥ ኢያቢስን እስኪያጠፉት ድረስ እየበረታ እየበረታ ሄደ።