መሳፍንት 3

3 ¹እስራኤልን ለመፈተን አባታችን ያስቀራቸው ሕዝቦች እነዚህ ናቸው፤ ከከነዓን ጦርነቶች አንዱንም ያላወቁት ሁሉ ናቸው። ²(ይህን ያደረገው ቀደም ሲል ጦርነትን ያላወቁት የእስራኤል ትውልዶች ጦርነትን እንዲማሩ ብቻ ነበር።) ³ሕዝቦቹም፦ አምስቱ የፍልስጥኤም ገዦች፣ ከነዓናውያን ሁሉ፣ ሲዶናውያንና ከባዓል ኀርሞን ተራራ አንሥቶ እስከ ሌቦ ሐማት ድረስ በሊባኖስ ተራሮች የሚኖሩ ኤዊያውያን ነበሩ። ⁴በሙሴ በኩል ለአባቶቻቸው የተሰጠውን የአባታችንን ትእዛዛት ይጠብቁ እንደ ሆነ እስራኤልን ለመፈተን ነበሩ። ⁵ስለዚህ እስራኤላውያን በከነዓናውያን፣ በኬጢያውያን፣ በአሞራውያን፣ በፌርዛውያን፣ በኤዊያውያንና በኢያቡሳውያን መካከል ኖሩ። ⁶የእነዚህን ሕዝቦች ሴቶች ልጆች አገቡ፤ የራሳቸውንም ሴቶች ልጆች ለወንዶች ልጆቻቸው ሰጡ፤ አማልክቶቻቸውንም አመለኩ።

አባታችን ጎቶንያልን አስነሣ

⁷እስራኤልም በአባታችን ፊት ክፉ አደረጉ፤ አባታቸውንም ረሱ፤ በኣሎችንና አሼራዎችንም አመለኩ። ⁸ስለዚህ የአባታችን ቍጣ በእስራኤል ላይ ነደደ፤ ለአራም ናሐራይም ንጉሥ ለኵሳ ርሻታይም ሸጣቸው፤ እስራኤልም ስምንት ዓመት አገለገሉት። ⁹እስራኤላውያን ወደ አባታችን በጮኹ ጊዜ፣ አባታችን አዳኝን አስነሣላቸው፤ እርሱም የካሌብ ታናሽ ወንድም የቄኔዝ ልጅ ጎቶንያል ነበር፤ እርሱም አዳናቸው። ¹⁰የአባታችንም መንፈስ በእርሱ ላይ መጣ፤ እስራኤልንም ዳኘ። ወደ ጦርነት ወጣ፤ አባታችንም የአራምን ንጉሥ ኵሳ ርሻታይምን በእጁ አሳልፎ ሰጠው፤ እጁም በኵሳ ርሻታይም ላይ ኀይል አደረገ። ¹¹ከዚያም የቄኔዝ ልጅ ጎቶንያል እስኪሞት ድረስ ምድሪቱ አርባ ዓመት ዐረፈች።

አባታችን ናዖድን አስነሣ

¹²እስራኤላውያን እንደ ገና በአባታችን ፊት ክፉ አደረጉ፤ ይህን ክፉ ነገር ስላደረጉም፣ አባታችን የሞዓብን ንጉሥ ኤግሎምን በእስራኤል ላይ አበረታው። ¹³ኤግሎምም አሞናውያንንና አማሌቃውያንን ሰብስቦ ሄደ፤ እስራኤልንም መታ፤ የዘንባባዪቱንም ከተማ ያዙ። ¹⁴እስራኤላውያንም የሞዓብን ንጉሥ ኤግሎምን ዐሥራ ስምንት ዓመት አገለገሉ። ¹⁵እስራኤላውያንም እንደ ገና ወደ አባታችን ጮኹ፤ አባታችንም ግራኝ የሆነውን የብንያማዊውን የጌራን ልጅ ናዖድን አዳኝ አድርጎ አስነሣላቸው። በእርሱም እጅ ለሞዓብ ንጉሥ ለኤግሎም ግብር ሰደዱ። ¹⁶ናዖድም ሁለት አፍ ያለው ርዝመቱ አንድ ክንድ የሚያህል ሰይፍ ለራሱ ሠራ፤ ከልብሱም በታች በቀኝ ጭኑ ላይ ታጠቀው። ¹⁷ግብሩንም ለሞዓብ ንጉሥ ለኤግሎም አቀረበ፤ ኤግሎምም እጅግ ወፍራም ሰው ነበር። ¹⁸ናዖድም ግብሩን አቅርቦ በጨረሰ ጊዜ፣ የተሸከሙትን ሰዎች አሰናበተ። ¹⁹ከጌልገላም አጠገብ ካሉት ጣዖታት ተመልሶ፣ “ንጉሥ ሆይ፣ ለአንተ የተሰወረ መልእክት አለኝ” አለ። ንጉሡም፣ “ዝም በሉ!” አለ፤ አገልጋዮቹም ሁሉ ከእርሱ ወጡ።

²⁰ናዖድም ብቻውን በቀዝቃዛው ሰገነቱ ተቀምጦ ሳለ ወደ እርሱ ቀረበ። ናዖድም፣ “ከእግዚአብሔር ዘንድ ለአንተ የምነግርህ ቃል አለኝ” አለ። ንጉሡም ከወንበሩ ተነሣ። ²¹ናዖድም በግራ እጁ ዘርግቶ ሰይፉን ከቀኝ ጭኑ ወሰደ፤ በኤግሎምም ሆድ ውስጥ ሰደደው። ²²እጀታውም ከምላጩ በኋላ ገባ፤ ስቡም በላዩ ተከደነ። ናዖድ ሰይፉን ከሆዱ ስላልመዘዘ፣ አንጀቱ ወጣ። ²³ናዖድም ወደ መመላለሻው ወጣ፤ የሰገነቱንም ደጆች ከኋላው ዘጋ፤ ቈለፋቸውም።

²⁴እርሱ ከወጣ በኋላ፣ ባሪያዎቹ የሰገነቱ ደጆች ተቈልፈው አገኙ፤ “በቀዝቃዛው ክፍል ውስጥ ገላውን እያቃለለ ይሆናል” አሉ። ²⁵እስኪያፍሩም ድረስ ጠበቁ፤ እርሱ ግን የሰገነቱን ደጆች አልከፈተም። ስለዚህ ቍልፉን ወስደው ከፈቱ፤ ጌታቸውም ወለሉ ላይ ወድቆ ሞቶ አገኙት።

²⁶እነርሱ በዘገዩ ጊዜ፣ ናዖድ አመለጠ። ጣዖታቱንም አልፎ ወደ ሴይራ አመለጠ። ²⁷በደረሰም ጊዜ፣ በኤፍሬም ተራሮች ላይ መለከቱን ነፋ፤ እስራኤላውያንም ከተራሮች ከእርሱ ጋር ወረዱ፤ ናዖድም ይመራቸው ነበር። ²⁸እርሱም፣ “ተከተሉኝ፤ አባታችን ጠላቶቻችሁን ሞዓብን በእጃችሁ ሰጥቷልና” አለ። እነርሱም ተከትለውት ወረዱ፤ የዮርዳኖስንም መሻገሪያዎች ከሞዓብ ላይ ያዙ፤ ማንም እንዲሻገር አልፈቀዱም። ²⁹በዚያም ጊዜ ዐሥር ሺህ የሚያህሉ ሞዓባውያንን መቱ፤ ሁሉም ብርቱና ጤነኞች ሰዎች ነበሩ፤ አንድም አላመለጠም። ³⁰ስለዚህ በዚያ ቀን ሞዓብ በእስራኤል እጅ ሥር ተገዛ፤ ምድሪቱም ሰማንያ ዓመት ዐረፈች።

³¹ከእርሱም በኋላ የዓናት ልጅ ሠምጋር መጣ፤ ስድስት መቶ ፍልስጥኤማውያንን በበሬ መውጊያ ገደለ፤ እርሱም ደግሞ እስራኤልን አዳነ።