Onidajọ 3

3 ¹Wọ̀nyí ni àwọn orílẹ̀-èdè tí Baba wa fi sílẹ̀ láti fi dán Israẹli wò—gbogbo àwọn tí kò tí ì mọ ogun èyíkéyìí ti Kenaani. ²(Ó ṣe èyí kìkì kí àwọn ìran Israẹli tí kò tí ì mọ ogun rí lè kọ́ ọ.). ³Àwọn orílẹ̀-èdè náà ni: àwọn alákòóso Filistini márùn-ún, gbogbo àwọn ará Kenaani, àwọn ará Sidoni, àti àwọn ará Hifi tí ń gbé ní àwọn òkè Lebanoni, láti Òkè Baali-Hermoni dé Lebo-Hamati. ⁴Wọ́n wà láti dán Israẹli wò—bóyá wọn yóò pa àṣẹ Baba wa mọ́, tí a ti ipasẹ̀ Mose fi fún àwọn baba ńlá wọn. ⁵Nítorí náà àwọn ọmọ Israẹli ń gbé láàrin àwọn ará Kenaani, àwọn ará Hiti, àwọn ará Amori, àwọn ará Perisi, àwọn ará Hifi, àti àwọn ará Jebusi. ⁶Wọ́n fẹ́ àwọn ọmọbìnrin àwọn ènìyàn wọ̀nyí, wọ́n sì fi àwọn ọmọbìnrin ara wọn fún àwọn ọmọkùnrin wọn, wọ́n sì ń sin àwọn òrìṣà wọn.

Baba Gbé Otnieli Dìde

⁷Israẹli ṣe búburú ní ojú Baba wa, wọ́n gbàgbé Baba wọn, wọ́n sì ń sin àwọn Baali àti àwọn Aṣerah. ⁸Nítorí náà ìbínú Baba wa ru sí Israẹli; ó sì tà wọ́n fún Kuṣani-Riṣataimu ọba Aramu-Naharaimu, ẹni tí Israẹli sìn fún ọdún mẹ́jọ. ⁹Nígbà tí àwọn ọmọ Israẹli ké pe Baba wa, ó gbé olùgbàlà dìde—Otnieli ọmọ Kenasi, àbúrò Kalebu—ẹni tí ó gbà wọ́n là. ¹⁰Ẹ̀mí Baba wa bà lé e, ó sì ṣe ìdájọ́ Israẹli. Ó lọ sí ogun, Baba wa sì fi Kuṣani-Riṣataimu ọba Aramu lé e lọ́wọ́, ọwọ́ rẹ̀ sì borí Kuṣani-Riṣataimu. ¹¹Nígbà náà ilẹ̀ náà sì sinmi fún ogójì ọdún, títí Otnieli ọmọ Kenasi fi kú.

Baba Gbé Ehudi Dìde

¹²Àwọn ọmọ Israẹli tún ṣe búburú ní ojú Baba wa, àti nítorí wọ́n ṣe búburú yìí, Baba wa sọ Egloni ọba Moabu di alágbára sí Israẹli. ¹³Egloni kó àwọn ará Ammoni àti àwọn ará Amaleki jọ, ó lọ ó sì kọlu Israẹli, wọ́n sì gba Ìlú Ọ̀pẹ. ¹⁴Àwọn ọmọ Israẹli sin Egloni ọba Moabu fún ọdún méjìdínlógún. ¹⁵Àwọn ọmọ Israẹli tún ké pe Baba wa; ó gbé Ehudi ọmọ Gera dìde, ọmọ Benjamini tí ó jẹ́ amọ̀wọ́-òsì, gẹ́gẹ́ bí olùgbàlà. Wọ́n sì fi ọwọ́ rẹ̀ rán ọrẹ sí Egloni ọba Moabu. ¹⁶Ehudi sì rọ idà olójú méjì fún ara rẹ̀, tí ó tó bíi inṣì méjìdínlógún ní gígùn, ó sì so ó mọ́ abẹ́ aṣọ rẹ̀ ní itan ọ̀tún rẹ̀. ¹⁷Ó sì gbé ọrẹ náà wá fún Egloni ọba Moabu, ẹni tí ó jẹ́ ọkùnrin tí ó sanra gidigidi. ¹⁸Nígbà tí Ehudi parí gbígbé ọrẹ náà wá, ó rán àwọn ènìyàn tí ó ru u lọ. ¹⁹Ó padà sẹ́yìn kúrò ní ibi àwọn ère tí ó wà nítòsí Gilgali, ó wí pé, “Mo ní ọ̀rọ̀ ìkọ̀kọ̀ kan fún ọ, ọba.” Ọba náà sì wí pé, “Dákẹ́!” gbogbo àwọn ìránṣẹ́ rẹ̀ sì fi í sílẹ̀.

²⁰Ehudi sì súnmọ́ ọ̀dọ̀ rẹ̀, bí ó ti jókòó ní òun nìkan ní yàrá òkè rẹ̀ tí ó tutù. Ehudi sì wí pé, “Mo ní ọ̀rọ̀ kan láti ọ̀dọ̀ Ọlọ́run fún ọ.” Ọba náà sì dìde kúrò lórí ìtẹ́ rẹ̀. ²¹Ehudi sì na ọwọ́ òsì rẹ̀, ó mú idà náà kúrò ní itan ọ̀tún rẹ̀, ó sì gbún un bọ inú Egloni. ²²Èèkù rẹ̀ sì wọ inú lẹ́yìn ojú idà; ọ̀rá sì bò ó mọ́lẹ̀. Nítorí tí Ehudi kò fa idà náà jáde kúrò nínú rẹ̀, ìfun rẹ̀ sì tú jáde. ²³Ehudi sì jáde lọ sí ìloro, ó ti àwọn ìlẹ̀kùn yàrá òkè náà pa sí ẹ̀yìn rẹ̀, ó sì tì wọ́n.

²⁴Lẹ́yìn tí ó lọ, àwọn ìránṣẹ́ rẹ̀ rí àwọn ìlẹ̀kùn yàrá òkè náà tí a tì, wọ́n sì wí pé, “Ó ṣe tán ló ń yàgbẹ́ nínú yàrá tí ó tutù náà.” ²⁵Wọ́n dúró títí ojú fi tì wọ́n, ṣùgbọ́n kò tí ì ṣí àwọn ìlẹ̀kùn yàrá òkè náà. Nítorí náà wọ́n mú kọ́kọ́rọ́ náà, wọ́n ṣí wọn, wọ́n sì rí olúwa wọn tí ó ṣubú lulẹ̀, tí ó ti kú.

²⁶Nígbà tí wọ́n ń falẹ̀, Ehudi sá àsálà. Ó kọjá àwọn ère náà, ó sì sá àsálà lọ sí Seira. ²⁷Ó dé, ó fọn ìwo àgbò ní àwọn òkè Efraimu, àwọn ọmọ Israẹli sì bá a sọ̀kalẹ̀ láti àwọn òkè náà, Ehudi ń ṣáájú wọn. ²⁸Ó wí pé, “Ẹ tẹ̀lé mi, nítorí Baba wa ti fi Moabu àwọn ọ̀tá yín lé yín lọ́wọ́.” Wọ́n sì tẹ̀lé e sọ̀kalẹ̀, wọ́n gba àwọn ibùréré Jordani lọ́wọ́ Moabu, wọn kò sì jẹ́ kí ẹnikẹ́ni rékọjá. ²⁹Ní àkókò náà wọ́n pa bíi ẹgbẹ̀rún mẹ́wàá àwọn ará Moabu, gbogbo wọn jẹ́ alágbára, ọkùnrin tí ó lera; kò sí ọ̀kan tí ó sá àsálà. ³⁰Nítorí náà a tẹ Moabu lórí ba ní ọjọ́ náà lábẹ́ ọwọ́ Israẹli, ilẹ̀ náà sì sinmi fún ọgọ́rin ọdún.

³¹Ṣamgari ọmọ Anati sì tẹ̀lé e, ó pa ẹgbẹ̀ta àwọn Filistini pẹ̀lú ẹ̀gún màlúù; òun náà gba Israẹli là pẹ̀lú.