Wungva̱-Wungvā 3

3 ¹Canaanwui rai kachikathā matheikahai Israelnaobing saikorali chāng yangkhavai ithumwui Avāna ngachakyāng kahai yurbing chi hina. ²(Achā rai matheikasa Israelwui ara̱-azābing rai tamkhui khavai maningla ana hikathā sai.) ³Yurbing chi: Philistinewui khamungabing phangā, Canaannaobing saikora, Sidonnaobing, kala Baal-harmon Kaphung eina thuilaga Hamath vāzang khavai, Lebanon phungreili kapam Hivnaobing china. ⁴Moses eina athumwui avā ngarāli mikahai ithumwui Avāwui ningkhami chi Israelna nganaira maningmana da theikhavai, athum Israelli chāng yangkhavaina. ⁵Chithāda Israelwui mibingna Canaannaobing, Hitnaobing, Amornaobing, Periznaobing, Hivnaobing, kala Jebusnaobing ngachaili pama. ⁶Athumna hi mibingwui ngalānaobingli ngakumda, athum khalattawui ngalānaobingli chibingwui naomayarabingli mihaida, athumwui varebingli otram ngatha̱ya.

Avāna Huikhame Othni-elli Khāngmi

⁷Israelna ithumwui Avāwui mangāli makhayā otmāng sāhaida, athumwui Avāli malaihaida, Baal eina asheebingli otram ngatha̱ya. ⁸Chiwui vang ithumwui Avāwui malungkhavāt Israelwuitungli leihaowa; ana athumli Aram-naharaimwui awunga Cushan-rishathaimli yorsanghaowa, chili Israelna zingkum chishat otram ngatha̱ya. ⁹Israelwui mibingna ithumwui Avāli khangakao chitharan, ana Calebwui agato Kenazwui naomayara Othni-elli huikhame akha khāngmi, kala ana athumli kankhui. ¹⁰Ithumwui Avāwui Manglā awuitungli leihaowa, kala ana Israelli bichar sāmi. Ana rai ngararkhavai vai, kala ithumwui Avāna Aramwui awunga Cushan-rishathaimli awui pāngli horsangmi, kala awui pāngna Cushan-rishathaimwuitungli yuihaowa. ¹¹Chiwui thili Kenazwui naomayara Othni-el thiranglakha eina tangda ngalei chi zingkum hangmati chingri-va̱rihaowa.

Avāna Huikhame Ehudli Khāngmi

¹²Israelwui mibingna ithumwui Avāwui mangāli makhayā otmāng sāluishita, kala athumna hi makhayā sākahaiwui vang, ithumwui Avāna Moabwui awunga Eglonli Israelwuitungli pang ngasakhaowa. ¹³Eglonna Ammonnaobing eina Amaleknaobingli kazipkhuida, vāda Israelli yuihaowa, kala athumna Khaneirong Keinung chi khuikhuiya. ¹⁴Israelwui mibingna Moabwui awunga Eglonli zingkum tharāda chishat otram ngatha̱ya. ¹⁵Israelwui mibingna ithumwui Avāli khangakao luishita; ana Benjaminwui mi yāvāk pāng ma̱zata Gerawui naomayara Ehudli huikhame akha khāngmi. Athumna awui pāng eina Moabwui awunga Eglonli shai chihovāhaowa. ¹⁶Ehudna akhalattawui vang asān khuiningkha shakha zankhangasunga raighai akha sākhui, kala awui kachonwui azingli yāvākwui akhaishāngli thāngkhuiya. ¹⁷Ana Moabwui awunga Eglonli shai chi samphang ngasaka; ana kachungkha nganaipat kahai mina. ¹⁸Ehudna shai khuirā chi kupkahaiwui thili, shai phungkazata mibing chili shiunhaowa. ¹⁹Ana Gilgal nganaili khalei meoma̱wui eina ngalanhaowa, kala hānga, "Awunga, nawui vang ina ngathum kahai pao akha lei." Awungana, "Chingrihaolu!" da hānga, kala awui otram khangatha̱ raobing saikora awui eina thuiserhaowa.

²⁰Awungana awui kharāmakui ato kāli amāngna pamlakha, Ehudna awuili rānganaimeida vai. Ehudna hānga, "Nawui vang ina Varewui eina tui akha lei." Chieina awungana awui pamkhongwui eina ngakarthuihaowa. ²¹Ehudna awui uipang khangkāda, awui yāvākwui akhaishāngwui eina raighai chi khuilaga, Eglonwui awukli kāpsangmihaowa. ²²Raighai chiwui thishurda atukla azanga; athaona raighai chi tumhaowa. Ehudna awukwui eina raighai chi makhuishokmana kajiwui vang awui akhari-akharā ngapophātserhaowa. ²³Ehudna shimpholi thuihaowa, ato kāwui khāmongbing awui khanukshong shungnamhaida lonkazak sanghaowa.

²⁴Ana thuikahaiwui thili, awui raobingna ato kāwui khāmongbing lonkazak kahaikasā thei, kala hānga, "Ana kharāmakui kāli apheizing horda leipai." ²⁵Athum khayā eina tangda ngaraipama, kha ana ato kāwui khāmong arui eina tangda mashomana. Chieina athumna sho chi khuilaga khāmong shohaowa, kala athumwui akhavā chi ngaleili pitāda thikahaikasā thei.

²⁶Athum huihaoda leilakha, Ehud yāmshokhaowa. Ana meoma̱ chi kānlaga Seirli yāmvāhaowa. ²⁷Ana vākashung eina, Ephraimwui kaphungli talla̱ khonga, kala Ehudna athumwui mangāli thānda Israelnaobing ali ngasoda kaphungwui eina katāhaowa. ²⁸Ana hānga, "Ili shurlu, kaja ithumwui Avāna nathumwui yangkashe Moabnaobing chi nathumwui pāngli horsangmihaira." Chieina athum awui thili katāhaowa, Moabnaobing mayāmshok khavai Jordan raipan chi ngapaikhui, kala khipākha makān ngasakmana. ²⁹Atam chitharan athumna saikora kapangpanga kala kapingpinga mibing Moabnaobing thingtharā shakha sāthata; mi akhala mayāmshokmana. ³⁰Chithāda chithang Moab chi Israelwui azingli maishi ngasaka, kala ngalei chi zingkum hangchishat chingri-va̱rihaowa.

³¹Awui thili Anathwui naomayara Shamgarna mukkā kharomwui thing eina Philistinenaobing shātharuk sāthathaowa; kala anala Israelli huimihaira.