Pororyosyek che ki kibagakta si kotyem Israel
Kibagaakta pororyosyek eng' emet si kotyem Israel ngot koyan. Ye kagoutye Israel Kwandanywa, kilaitorane Kusan-risataim kenyiisyek sisiit agoi king'eetyi Othniel. Yeityo kouny Ehud ne po eunet ne po tai rotweet eng' togonyi ne po tai, kobar laitoryat Eglon ne nyogen eng' kootap parak, ak kokel oriit.
3 1Chuuto pororyosyek che ki kibagaakta Kwandanyo si kotyem Israel, kobooto che tugul che ki ma kingen lugoosyek age tugul che po Kanaan. 2(Ki yai nooto si konai lugeet piik che po Israel che ki tomo kongen lugeet taunet.). 3Pororyosyek: laitorinik muut che po Philistiik, ak Kanaanik tugul, ak Sidonik, ak Hibik che menyei tulweetap Lebanon, kobooch tulweetap Baal-hermon kot koit ye kimandoe kebendi Lebo-hamath. 4Ki mi si kotyem Israel, si keger ngot koyan ng'atuutigap Kwandanyo, che ki king'at kwanisyekwak eng' Musa. 5Ki meny anyun piigap Israel kwenutap Kanaanik, ak Hitik, ak Amorik, ak Perisik, ak Hibik, ak Jebusik. 6Ki tun tiibiigap pororyosyechooto, ak ki goochi tiibiikwak weeriikwak, ak ki ot kamuktaikwak.
Ing'eeti Kwanda Othniel
7Ki yai piigap Israel yaityet eng' taitap Kwandanyo, ak ki utye Kwandanywa, ak koot Baalik ak Asera. 8Ki lal angeet Kwandanyo agobo Israel; ak ki aldochi icheek Kusan-risataim laitoryatap Aram-naharaim, ne ki ot Israel kenyiisyek sisiit. 9Ye kingo riirchi piigap Israel Kwandanyo, koing'eetyi icheek saruunindet, Othniel weeriitap Kenas, ng'eetap kametap Kaleb ne ming'in, ne saru icheek. 10Ki chut Kabuusetap Kwandanyo ineendet, ak ki rwak Israel. Ki wo pooryeet, ak ki aldochi Kwandanyo ineendet Kusan-risataim laitoryatap Aram, ak ki terteeris eunnyi Kusan-risataim. 11Yeityo komi silem emet kenyiisyek artam, agoi kome Othniel weeriitap Kenas.
Ing'eeti Kwanda Ehud
12Ki wendi piigap Israel koyai yaityet kogeny eng' taitap Kwandanyo, ak amu ki yai yaityennyi, ki igimit Kwandanyo Eglon laitoryatap Moab agobo Israel. 13Ki tui Eglon lagogap Ammon ak Amelegik, ak kwo kobar Israel, ak ki nam nganaseetap sosik. 14Ki ot piigap Israel Eglon laitoryatap Moab kenyiisyek taman ak sisiit. 15Ki riirchi piigap Israel Kwandanyo kogeny; koing'eetyi icheek saruunindet, Ehud weeriitap Gera, Benjaminindet ne boisyei eunnyi ne po kadeet. Ki iyookyi icheek aisuruut eng' ineendet koba Eglon laitoryatap Moab. 16Ki yaigei Ehud rotweet ne tinyei kutik aeng', ne koindonyi ko mitainik artam ak muut, ak ki ratyi oriit ngoroikyik eng' moeng'nyi ne po tai. 17Ki igoito aisuruut koba Eglon laitoryatap Moab, ne ki chiito ne iboot miising'. 18Ye kingo pata Ehud kogoito aisuruut, ki iyookto piik che ki ibu aisuruut. 19Ki weektegei kobun kaboronik che neegit Gilgal, koleenji, “Atinye ng'olyoot ne uny ne amwaiwuni, laitoryat.” Kole laitoryat, “Silem!” ak ki mong' kiboitiinikyik tugul.
20Ki nyoiti Ehud ineendet, ko tebi ineegei eng' kot ne po parak ne ki kaaititit. Kole Ehud, “Atinye ng'olyoot ne punu Kamuktaindet ne amwaiwuni.” Ki ng'eet laitoryat eng' ng'echerennyi. 21Ki iyogoito Ehud eunnyi ne po kadeet, ak koip rotweet eng' moeng'nyi ne po tai, ak kotoor moetap Eglon. 22Ki chut agot kabutetap rotweet koosup kipget; ak ki tuch moony kiyooto. Amu ki ma koip Ehud rotweet eng' moetap Eglon, ki mong' agutanikyik. 23Ki mong' Ehud koba keterut, ak ki ger kurgotigap kot ne po parak eng' let, ak ki rat.
24Ye kingo mong' ineendet, ki nyooru otwogikyik kurgotigap kot ne po parak kerotin, koleenji, “Imuuchi ko ichuuye ineegei eng' kot ne ki kaaititit.” 25Ki igen kot koriuren, ago ki tomo koyaat kurgotigap kot ne po parak. Ki ip anyun yaateiwot, ak ki yaat, ak ki nyooru kiptaiyandennywa ko kagobut ng'wony, ko kagome.
26Ye kingo gagei icheek, ki chilil Ehud. Ki sir kaboronik, ak ki chililsogei koba Seira. 27Ye kingo it, ki guut iryageet eng' tulweetap Ephraim, ak ki choorgei piigap Israel kobooto ineendet kobunu tulwek, ko mandoi Ehud eng' tai. 28Kole, “Osup ane, amu ki goochin Kwandanyo puuniguk Moabik eng' eung'wong'.” Ki choorgei koosup ineendet, ak ki nam tabarwegap Jordan koger Moab, ak ma koyanchi chii age tugul kolanda. 29Eng' sainooto, ki bar Moabik olo eliphuusyek taman, murenik tugul che kiim ak che tinyei kimnateet; ak ma chilil agot chii agenge. 30Ki terteeris Moab eng' peetuunooto eng' eutap Israel, ak ki tebi silem emet kenyiisyek tamanwogik sisiit.
31Ki isup Shamgar weeriitap Anat, ko bar Philistiik pogol lo eng' kirokto ne po tuuga; ak ki saru agine Israel.