Malakaiyatap Kwanda eng' Bochim
Kotogosta Malakaiyatap Kwandanyo koleenji Israel eng' Bochim agobo kagoyai kaalyeet ak piik che menyei emet, ak koriir icheek. Kome poisyegap Joshua, ak kong'eetune poisyet age tugul ne ma ngen Kwandanyo. Kiteech kergeindap bukuit: meiset, puuniik, kirwoogindet ne king'eetune eng' chameet, ak mogornateet ne yaacha kosiir eng' let.
Ng'alaali Kwandanyo eng' mustarisyek 1–3, 20–22
2 1Ki togosta Malakaiyatap Kwandanyo kong'eetee Gilgal agoi Bochim, ak kole, “Ka aibun okweek kobun emetap Misiri agoi emet ne ki ayasyechi kwanisyekwok. Ki ale, ‘Ma awal arorutyennyu ak okweek koigeny. 2Amat oyai arorutyet ak piik che menyei emoni; obut kapkorosusyekwak.’ Ago ma ogas iit kutinnyu. Nee ne kaoyai? 3Nooto anyun ale: Ma aoon icheek koba eng' taing'wong'; koegu katook eng' tabanwekwong', ak kamuktaikwak koegu mesteet eng' okweek.”
4Kingo ng'alaalji Malakaiyatap Kwandanyo ng'aleechu piigap Israel tugul, kowaach piik koriir. 5Ki kiguur oldanooto Bochim, ak ki ieny tiseiywek Kwandanyo eng' olooto. a a v5 Bochim koboru le “piik che riirei.” Ki kiguur piik oldanooto amu riireet ne ki ng'eetyo, ye kingo kagas kole kiga koeendegei kong'aam miising' ak Kwandanywa.
Kabeti Iboruutap Joshua
6Kingo imanda Joshua piik, koba piigap Israel chiito age tugul kwo konam kiwotetap porotennywa. 7Kiboisyechi piik Kwandanyo eng' peetuusyek tugul che po Joshua ak eng' peetuusyek tugul che po poisyek che kita komi ko kagome Joshua, che ki keer poisyet tugul ne oo ne kiga koyai Kwandanyo agobo Israel. 8Ki kome Joshua weeriitap Nun, otwogindetap Kwandanyo, ko po kenyiisyek pogol ak taman. 9Kitup icheek ineendet eng' kiwotetap porotennyi eng' Timnat-heres, ne mi emetap tuloonook che po Ephraim, murot kaataam ne po tulweetap Gaas.
Koutye Iboruut Kwanda
10Ki kiyum kora iboruunooto tugul kobooto kwanisyekwak, ak kong'eet iboruut age ne po let, che ma ngen Kwandanyo anan poisyet ne kiga koyai agobo Israel. 11Ki yai piigap Israel yaityet eng' taitap Kwandanyo ak koot Baalik. 12Ki kimete Kwandanyo, Kamuktaindetap kwanisyekwak, ne ki ibu icheek kong'eetee emetap Misiri. Koosup kamuktaik alak che po pororyosyek che ki mi ole neegitee icheeget, kosaa icheek, ak kotach Kwandanyo. 13Ki kimete Kwandanyo ak koot Baal ak Astarot. 14Kong'waneegitu angeet ne po Kwandanyo agobo Israel, ak koinde icheek eng' eunegap luulik che nyaban icheek, koalda icheek puunik che ki mi ole neegitee icheeget, si ma imuuch kotonon kogeny eng' taitap puunikwak. 15Ole tugul ne ki kobendi, ki mi eutap Kwandanyo agobo icheek si koyaun ne ya, ko uu ye ki komwachi ak ki koyasyechi icheek. Ki mi icheek eng' mogornateet ne oo miising'.
16Ki ng'eetyi anyun Kwandanyo kirwoogik, che ki sar icheek eng' eutap luulikwak. 17Ago ma kogas iit kirwoogikwak kora. Ki koibotkei ak kamuktaik alak ak kosaa icheek, komasta chapchapindo eng' ooreet ne ki bendi kwanisyekwak, che ki kogas iit ng'atuutigap Kwandanyo; ago ma yae icheek ko uu nooto. 18Ye ki ng'eetyi Kwandanyo kirwoogik, ki mi kobooto kirwoogindet age tugul, ak kityaachi icheek eng' eutap puunikwak eng' peetuusyek tugul che po kirwoogindonooto; amu ki rir Kwandanyo tigenoikwak che ki ng'eetee eng' icheeget amu usiikwak che inyalili icheek. 19Ago ye kingo kagome kirwoogindet, koweektagei ak kong'emegitu kosiir kwanisyekwak, koosup kamuktaik alak si koot ak kosaa icheek. Ma kobagaakta kiy age tugul eng' atebosyekwak anan uuyeenatap metowekwak.
20Kong'waneegitu angeet ne po Kwandanyo agobo Israel, ak kole, “Amu kagowal pororyoni arorutyennyu ne ki ang'at kwanisyekwak, ak koma kogas iit kutinnyu, 21Ma aoon kogeny pororyet age tugul ne ki pagaakta Joshua ye kingo kome, 22si kobiit ketyeme Israel eng' icheeget, ngo keriip ooreetap Kwandanyo kobendi eng' yoo ko uu ye ki yai kwanisyekwak, anan ko ma.”
23Ki pagaakta anyun Kwandanyo pororyosyechooto, ama koon icheek chapchapindo, ak ma koinde icheek eng' eutap Joshua.