መሳፍንት 2 FHB Father's Heart Bible™

2 ¹መልኣኽ ኣቦና ካብ ጌልገላ ናብ ቦኪም ደይቡ ከምዙይ በለ፦ “ካብ ግብፂ ናብታ ነቦታትኩም ዝመሓልኩላ ምድሪ ኣደየብኩኹም። ከምዙይ ድማ በልኩ፦ ‘ምሳኻትኩም ዝኣተኽዎ ኪዳን ንዘለኣለም ኣይስዕርን እየ። ²‘ምስ ህዝቢ እዛ ምድሪ እዚኣ ኪዳን ኣይትኣትዉን፤ መሰውኢታቶም ኣፍርሱ።’ ንስኻትኩም ግና ቃለይ ኣይሰማዕኹምን። እንታይ ደኣ ገበርኩም?” ³“ስለዙይ ሕዚ ከምዙይ እብል ኣለኹ፦ ካብ ቅድሜኹም ኣይሰጎምን እየ፤ ኣብ ጎኒኹም እሾዅ ክኾኑኹም እዮም፤ ኣማልኽቶም ድማ መፈንጠር ክኾኑኹም እዮም።”

⁴መልኣኽ ኣቦና እዝ ዘረባ እዙይ ንዅሎም ደቂ እስራኤል ምስ ተዛረቦም፥ እቶም ህዝቢ ድምፆም ዓው ኣቢሎም በኸዩ። ⁵ነታ ቦታ እቲኣ ድማ ቦኪም ኢሎም ሰመይዋ፤ ኣብኡ ኸዓ ንኣቦና መስዋእቲ ሰውኡ። ^a a v5 ቦኪም ማለት "በኸይቲ" ማለት እዩ — ኻብ ኣቦኦም ክሳዕ ክንደይ ርሒቖም ከም ዝነበሩ ምስ ሰምዑ ዝተላዕለ ብኽያት ምኽንያት ጌሮም፥ እቶም ህዝቢ ነታ ቦታ ሰመይዋ።

ወለዶ ኢያሱ ይሓልፍ

⁶ኢያሱ ነቶም ህዝቢ ምስ ኣሰናበቶም፥ ደቂ እስራኤል ነፍሲ ወከፎም ነናይ ርስቶም ምድሪ ክወርሱ ኸዱ። ⁷እቶም ህዝቢ ብዅሉ ዘመን ኢያሱን በቶም ብድሕሪ ኢያሱ ነዊሕ ዝፀንሑ ዓበይትን፥ እቲ ኣቦና ንእስራኤል ዝገበረሎም ኵሉ ዓብዪ ግብሪ ርእዮም፥ ንኣቦና የገልግሉ ነበሩ። ⁸ባርያ ኣቦና ኢያሱ ወዲ ነዌ፥ ወዲ ሚእትን ዓሰርተን ዓመት ምስ ኮነ ሞተ። ⁹ኣብ ርስቱ ኣብ ኰረብታታት ኤፍሬም፥ ኣብ ሰሜን ጎቦ ጋዓሽ ኣብ ዘላ ቲምናት ሔረስ ድማ ቐበርዎ።

ወለዶ ንኣቦ ይርስዕ

¹⁰እቲ ዅሉ ወለዶ እቲ ድማ ናብ ኣቦታቱ ተኣከበ፤ ድሕሪኦም ከዓ፥ ንኣቦናን ነቲ ንእስራኤል ዝገበሮ ግብርን ዘይፈልጥ ካልእ ወለዶ ተንሰአ። ¹¹ደቂ እስራኤል ድማ ኣብ ቅድሚ ኣቦና ክፉእ ገበሩ፥ ነቶም በዓሊም ኣምለኹ። ¹²ነቦና፥ ነቲ ካብ ምድሪ ግብፂ ዘውፅኦም ኣምላኽ ኣቦታቶም ሓደጉ። ናይቶም ኣብ ዙርያኦም ዝነበሩ ህዝብታት ንኻልኦት ኣማልኽቲ ሰዓቡ፤ ሰገዱሎም ከዓ፤ ንኣቦና ድማ ኣቘጥዕዎ። ¹³ንኣቦና ሓዲጎም ድማ ንበዓልን ነስታሮትን ኣምለኹ። ¹⁴ስለዙይ ቍጥዓ ኣቦና ኣብ ልዕሊ እስራኤል ነደደ፤ ናብ ኢድ ዘመትቲ ኣሕሊፉ ሃቦም፤ ንሳቶም ድማ ዘመትዎም፤ ናብ ኢድ ኣብ ዙርያኦም ዝነበሩ ፀላእቲ ሸጦም፤ ኣብ ቅድሚ ፀላእቶም ደጊም ክቖሙ ኣይከኣሉን። ¹⁵ናብ ዝወፁሉ ዅሉ፥ ከምቲ ዝበሎምን ዝመሓለሎምን፥ ኢድ ኣቦና ንኽፉእ ኣብ ልዕሊኦም ነበረት። ኣብ ከቢድ ፀበባ ድማ ወደቑ።

¹⁶ሽዑ ኣቦና ካብ ኢድ ዘመትቶም ዘድሕንዎም ፈረድቲ ኣተስአሎም። ¹⁷ንፈረድቶም እኳ ግና ኣይሰምዕዎምን። ንኻልኦት ኣማልኽቲ ኣመንዘሩ፥ ሰገዱሎም ከዓ፤ ካብታ ትእዛዛት ኣቦና ዝሰምዑ ኣቦታቶም ዝኸድዋ መንገዲ ቀልጢፎም ኣግለሱ፤ ከምኡ ክገብሩ ኣይደለዩን። ¹⁸ኣቦና ፈረድቲ ምስ ኣተንስአ፥ ምስ ነፍሲ ወከፍ ፈራዲ ነበረ፤ ብዅሉ ዘመን እቲ ፈራዲ ድማ ካብ ፀላእቶም ኣናገፎም፤ ኣቦና በቲ ብሰንኪ ገፋዕቶም ዝገብርዎ ኣውያት ራህርሀሎም እዩ እሞ። ¹⁹እቲ ፈራዲ ምስ ሞተ ግና፥ ተመሊሶም ካብ ኣቦታቶም ኣዝዮም ተበላሸዉ፤ ንኻልኦት ኣማልኽቲ ሰዒቦም ኬምልኽዎምን ክሰግዱሎምን። ካብ ተግባራቶምን ካብ ተሪር መንገዶምን ሓደ እኳ ኣይሓደጉን።

²⁰ስለዙይ ቍጥዓ ኣቦና ኣብ ልዕሊ እስራኤል ነደደ፤ ከምዙይ ድማ በለ፦ “እዝ ህዝቢ እዙይ ነቲ ነቦታቶም ዝኣዘዝክዎ ኪዳነይ ስለ ዝሰዓረ፥ ቃለይውን ስለ ዘይሰምዐ፥ ²¹ኣነ ድማ ካብተን ኢያሱ ምስ ሞተ ዝሓደገን ህዝብታት፥ ደጊም ሓንቲ እኳ ኣይሰጎን እየ፤ ²²ብእኣተን ገይረ ንእስራኤል ክፍትኖም እየ፤ ከምቲ ኣቦታቶም ዝኸድዋ፥ ንመንገዲ ኣቦና ሓልዮም ዝኸድዋ እንተ ኾይኖም ወይ ዘይኮይኖም ምእንቲ ኽፈልጥ።”

²³ስለዙይ ኣቦና ነተን ህዝብታት እቲኣን ቀልጢፉ ኸይሰገገን ሓደገን፤ ናብ ኢድ ኢያሱውን ኣይሃበንን።